Read O Debleskro Drom - I Bibla an o Romano Rakepen 2021 Sikepaskro 11 Bible Online

Sikepaskro 11 - O Debleskro Drom - I Bibla an o Romano Rakepen 2021 bible

Sikepaskro 11

¹Witse tiro maro ap o pani; un tu hatseh les pale pal bud diwessa.

²Phage tiro maro an kotja, un de les efta, ochta menshenge; tu djineh gar, hawi bibacht well pral kai phub.

³Te hi i wolke pherdo pani, palle denn le brishin ap i phub. Un te perell i ruk — nai well ap i tchatchi rig, nai well ap i serwi rig — kote kai lo perella, kote atchell lo tchiddo.

⁴Koon ap o phurdepen garda della, ko tchiwell kek djob an i phub, te well kowa baro. Un koon ap i wolke garda della, ko anell gar o baro djob an peskro kheer dren.

⁵Tu djineh gar hawo drom o phurdepen djala, un har i kokale kerdo wenna an i dakro per. Jaake nai djineh tu witar gar, hoi o Dewel halauter krella, un har job halauter krella.

⁶Doleske tchip o djob taissarla an i phub, un muk gar tele bis an i rati. Tu djineh gar, hoi bares wella, kawa te kowa, oder hake dui.

⁷Shukar hi menge, te dikas i momeli. Un mare jakentsa hi mishto, te dikenn le o kham.

⁸I mensho, te djiwell lo bud bersha, mu well lo bachtelo pral hako bersh, kai djiwell lo. Mu bistrell lo gar, te wenn kale diwessa. Ninna kolla hi bud. Halauter, hoi wella, hi menge khatedo.

⁹Terno mursh, muk tiro dji te giwell an tire terne bersha! Ab bachtelo jaake rah, har terno hal. Kre, hoi tiro dji tuke penella un tire jakentsa mishto hi; un biste gar, te well i diwes, kai rakrell o Dewel o tchatchepen win pral tute un halauter, hoi kral.

¹⁰Dja koleske dran o drom, hoi anell tuke choli un duka. Ko tsiro, kai hal i tchawo un i terno mursh, hi sik trujel.