Read O Debleskro Drom - I Bibla an o Romano Rakepen 2021 Sikepaskro 2 Bible Online

Sikepaskro 2 - O Debleskro Drom - I Bibla an o Romano Rakepen 2021 bible

Sikepaskro 2

¹Me penom mange: Mishto palle, me kamau latches te djiwell un mukau les mange mishto te djal! Kote haiwom, kai kowa ninna tchitcheske hi.

²Me hatsom win, kai ninna o sapen dinlepen hi! Un o gipen an tiro dji anell tuke tchi.

³An miro rodepen pal o goswepen rakrom miro djijeha, un penom mange: Pi tuke i mool, te wess bachtelo. Un jaake har i dinelo wom mato. Koi putchom mandar: Hi sawo koowa mishto o mensheske an peskro tikno djipen?

⁴Me krom baro koowa: Me krom mange khera un drakengre themma,

⁵un wawar kotja them, kai tchiwom shukar burra un ruka an i phub, ninna sawe ruka, kai hidjrenn rukengre.

⁶Me krom mange tikne panja, te well man doha pani kol bud rukenge.

⁷Me ginom mange budepangren, murshen un djuwjen. Un man his ninna budepangre, kai wan boldo an miro kheer. Man his budeder grumja un bakre har halauter, kai glan mande i bare raja an o foro Jerusalem his.

⁸Me lom mange ninna rup un sonakai khetne, un hoi wawar raja un themma man dan. Me mukom gipangren pash mande khetne te well, murshen un djuwjen. Un man his jaake bud djuwja har kamom, te krenn le man bachtelo.

⁹Un me wom baro un bareder har hakeno, kai glan mande o rai an o foro Jerusalem his. Un ko tselo koowa, hoi kote krom, krom o goswepah.

¹⁰Halauter hoi mire jaka kaman, kowa dom len. Un miro djijeske dom halauter, hoi mukas les te bashrell. Jaake wom bachtelo pral halauter hoi krom. Un halauter, koleske man tele marom, anas mange tchatchepah bacht an o dji.

¹¹Un har dikom ko tselo koowa, hoi mire wasta kran, un koi budi, hoi man koi pashel his, kote haiwom, lauter hi tchitcheske, har te nashoms pal o ducho, hoi djal pral i phub. Un tchi well win dran halauter, hoi krom an miro djipen.

¹²Kote djom trujel, te dikap, hoi well dran o goswepen win? Hi kowa wawartchandes har kowa, hoi well dran o narwlepen un o dinlepen win? Hoi krell ko mursh, kai pal mande o baro rai hi? Kowa hoi glan leste kerdo was, krell job ninna!

¹³Me dikom, o goswepen hi feteder har o dinlepen, jaake har o diwes feteder hi har i rati.

¹⁴Kowa, kai gosewo hi, dikell, kai lo djal. O dinelo nashell an i rati. Un ninna haiwom, jekeske djal har o wawareske.

¹⁵Kote penom mange: Te djal mange har o dineleske, hoske rodom palle pal o goswepen? Ninna kowa hi tchitcheske.

¹⁶I gosewe hunte merenn, un i dinele ninna. Un ko gosewo well jaake sik bistedo har ko dinelo. An i tsirja kai wenna, hi halauter bistedo.

¹⁷Kote his mange miro djipen buder gar shukar. Kowa, hoi i menshe krenna ap kai phub, hi tchitcheske. Halauter hi tchitcheske, un jaake har te nashals jek pal o ducho, hoi djal pral i phub.

¹⁸Un kowa halauter, koleske man tele marom an miro djipen, hunte mukap jekeske, kai pal mande well. Doleske his mange kowa witar gar shukar.

¹⁹Koon djinell, koon kowa hi, kai pal mande well, i gosewo mursh oder i dinelo mursh? Well har wella! Job well o rai pral halauter, koleske man tele marom un gosewes pre tchiwom an miro djipen. Jaake hi kowa ninna tchitcheske.

²⁰Awa, miro dji peras an i rati pral koleste me man tele marom an miro djipen.

²¹Kowa, hoi i mensho goswepah un latche wastentsa kras, hunte mukell lo halauter i wawareske, kai kras tchi koleske. Kowa hi ninna tchitcheske un i bari bibacht.

²²Hoi atchell o mensheske, kai pes tele budras un tele maras pash peskri budi?

²³Leskro tselo djipen hi pherde duka, un leskro budepen pherdo ropen. Ninna an i rati nai sowell lo gar. Kowa hi ninna tchitcheske.

²⁴Tchi hi feteder o mensheske, har te chal lo un pijell lo un well bachtelo pral kowa, hoi lo krell. I bachtelo dji, kowa dikom, well dran o Debleskro wast.

²⁵Kekes hi chapen, un kek nai mukell les peske mishto te djal, te dell les o Dewel kowa gar!

²⁶Kol menshe, kai djiwenn jaake har glan o Debleste mishto hi, kolla lenna lestar goswepen un bacht an o dji. Kolla, kai djan o Debleskro dromestar tele, kolen mukell lo te budrell un brawlepen khetne anell, hoi pal i tsiro i wawareske well, jekeske, kai djiwell jaake har glan o Debleste mishto hi. Palle his leskri tseli budi tchitcheske, un jaake har te nashals lo pal o ducho, hoi djal pral i phub.