Read O Debleskro Drom - I Bibla an o Romano Rakepen 2021 Sikepaskro 4 Bible Online

Sikepaskro 4 - O Debleskro Drom - I Bibla an o Romano Rakepen 2021 bible

Sikepaskro 4

¹Palle dikom halauter, hoi gar tchatcho hi ap i phub. Me dikom i swa kolendar, kai dan le lenge gar lengro tchatchepen, un kolenge kek ap i rig was. Kolla, kai kran lenge tchilatchepen, his sorelo. Doleske was kek ap lengri rig.

²Kote penom mange, bachteles hi kolla, kai meran un paskedo hi, kolenge hi feteder har kolenge, kai kanna djiwenna.

³Un feteder har kol dujenge hi koleske, kai was gar boldo un dikas gar ko tselo tchilatchepen, hoi well kerdo ap i phub.

⁴Un me dikom, har marenn pen i menshe tele un krenn latchi budi, te wenn le feteder har kol wawar, jaake te silwerenn kolla ap lende. Kowa hi ninna tchi-moldo, un jaake har te nashals jek pal o ducho, hoi djal pral i phub.

⁵Koon kamell gar te budrell, tchiwell peskre wasta glan peskri betch khetne. Job hi dinelo un leske atchell tchi te chal.

⁶Feteder i wast pherdo djipaske un tsirja, kai kreh tchi, har dui wasta pherdo djipaske un bud budi un i naashepen pal o ducho, hoi djal pral i phub.

⁷Un palle dikom i wawar koowa ap i phub, hoi hi phares te haiwell.

⁸Kote hi jek kokres, un kek hi pash leste. Kek tchawo hi les un kek phraal. Un job budrell un budrella, te well lo brawelo. Job hunte putchals pestar: Koneske budrau man tele, un mukau les mange gar mishto te djal? Sawo koowa hi phares te haiwell un i bibacht.

⁹Dujenge djal feteder har jekeske. Te budrenn dui khetne, well jek o wawareske pash o wast.

¹⁰Te perell jek, hadell les ko wawar pre. Har djungeles djal koleske, kai kokres hi, un perella! Palle hi kek wawar koi, kai hadell les pre.

¹¹Ninna, dui te hi an o tchiben tchiddo, nai tatsrenn le pen khetne. Har nai tatsrell pes jek, te hi lo kokres?

¹²Jek te hi lo kokres, nai well sik khetne dino. Dui te hi khetne, nai wenn le sorleder har kowa, kai djal ap lende pre. Triin pesse thaba krenn i dori, hoi djal gar sik paash.

¹³I terno mursh, kai gosewo hi, ninna te hi lo gar brawelo, hi feteder har i phuro baro rai, kai dinelo hi, un mukell peske tchi te penell.

¹⁴Kowa hi tchatcho, ninna te his ko terno mursh i pandlo budepaskro un was win ginlo, te well lo baro rai, ninna te was lo boldo an i tchorweli familja an ko them, pral leste job o rai well.

¹⁵Un me dikom, har i tsele djide menshe ap kai phub pengro djipen djiwenn. Ninna dikom i wawar terno murshes, kai pal leste o baro rai wals.

¹⁶Un me dikom bud menshe, jaake bud te penau nai gar, kitse jon hi. Kolla kai his glan leste, un kolla, kai wan pal leste, kek lendar his bachtelo pral kowa, hoi job kras. Kowa hi ninna tchi-moldo, un jaake har te nashals jek pal o ducho, hoi djal pral i phub.

¹⁷De garda, hoi kreh, te djah tu an o Debleskro kheer! Ab glan o Debleste un shun ap leskre laba! Kowa hi feteder, har te aneh leske viechen kokres, har dinele menshe krenn. Kolla djinenn gar, kai krenn le dinelo koowa.