Read O Debleskro Drom - I Bibla an o Romano Rakepen 2021 Sikepaskro 5 Bible Online

Sikepaskro 5 - O Debleskro Drom - I Bibla an o Romano Rakepen 2021 bible

Sikepaskro 5

¹Ma kre tiro mui sik pre, te rakreh glan o Debleste. O Dewel hi an o bolepen, un tu hal ap i phub. Doleske kre gar bud laba, te rakreh.

²Koneske bud an o shero trujel djal, kowa dell phare sunja. Un koon bud laba krell, rakrell sik dinelo koowa.

³Te deh tu tut sowel glan o Debleste, palle muk tut tchitchestar pale te rikrell, te kress kowa, hoi glan leste penal! O Dewel dikell gar latches ap ko dineleste, kai nai rikrell gar, hoi lo sowel das.

⁴Feteder hi, te deh tut gar sowel, har te deh tut sowel un rikreh gar, hoi penal.

⁵De garda te rakress gar sawo koowa, hoi nai rikreh gar dren! Ma pen glan i Debleskro mursheste: ‘Kowa kamom gar te penell’. O Debles nai well i choli pral tire laba, un job nai mukals kowa gar mishto te djal, hoi tire wastentsa kral.

⁶Tchatchepah, bud sunja un bud laba molenn tchi. Dran kowa kre kowa, hoi o Debles sharell!

⁷Te dikeh tu, har an o them o tchorwelo tele rikedo well, un o tchatchepen tele stakedo well, un kek peskro tchatchepen lell, palle kre kek bare jaka: I pralstune rikrenn khetne, un pral lende hi wawar pralstune, kai rikrenn i wasta pral kolende.

⁸Hi feteder o themeske, te hi les i baro rai, kai dikell koi pre, te well ap o hachetikro them budedo, te well i menshen doha djipaske.

⁹Kowa, kai i lowe kamella, koles nai well gar doha lowe. Un kowa, kai lell pes brawlepen khetne, koles nai well witar gar doha. Ninna kau koowa hi tchitcheske.

¹⁰Kote kai bud brawlepen hi, kote hi ninna bud, kai chan o brawlepen pre; un koles, kai kowa lauter hi, leske atchell tchi, har te dikell lo les an!

¹¹Gudlo hi o sopen koleske, kai budrella, te chas lo bud oder gar bud; o brawlepen o brawelestar mukell les gar te sowell.

¹²I djungelo koowa dikom ap i phub: Hi menshe koi, kai garenn pengro brawlepen pash peste un denn mishto jak ap kowa.

¹³Un i bibacht well un jon nashrenn halauter. Un te hi i tchawo koi, atchell leske tchi an o wast.

¹⁴Jaake har jek nanges boldo was, jaake djal lo pale, har lo was. Ninna te budras lo bud, nai lell lo tchi pestar peha, te merell lo.

¹⁵Job hunte djal, har lo was. Kowa hi i bari bibacht leske. Leskri phari budjatar atchell leske tchi. Kowa hi, har te marals lo pes tele tchitcheske.

¹⁶Peskro tselo djipen mukas lo pes gar mishto te djal. Bud pharo koowa djas leske an o shero trujel un kras leske daar. Un koi pashel was nasslepen un choli an leskro djipen.

¹⁷Kowa hi, hoi me dikom dren, un hoi mishto hi, un ko feteder, hoi nai krah an maro tikno djipen, hoi o Dewel men das, te chas mer un pijas un kras i bachtelo djijeha mari budi. Jaake kamell kowa o Dewel mendar.

¹⁸Te dell o Dewel i menshes brawlepen un latcho kowa, te nai chal lo un pijella, un te nai mukell lo peske mishto te djal, un leskro dji sal pral halauter, hoi leske dran peskri phari budi was, palle hi kowa tchomone, hoi o Deblestar was.

¹⁹O Dewel das les bacht an o dji. Doleske hunte krell lo peske kek shero pral o tikno tsiro, kai hi lo ap kai phub.