Read O Debleskro Drom - I Bibla an o Romano Rakepen 2021 Sikepaskro 7 Bible Online

Sikepaskro 7 - O Debleskro Drom - I Bibla an o Romano Rakepen 2021 bible

Sikepaskro 7

¹Well penlo: Hi feteder, te well jek latches an-diklo mank i menshende, har te makell lo pes latcho djeteha. Me penau: O diwes, kai i mensho merella, hi feteder har ko diwes, kai i mensho ap kai phub wella.

²O mensheske hi feteder te djal lo an i kheer, kai jek meras un i menshe rowenna, har te djal lo an i kheer, kai krenn le i bijab. Kote, kai jek meras, well diklo, kai hako mensho hunte merella. Un koon gomme djido hi, mukell pes kowa an o dji te djal.

³Ropen hi feteder har sapen; pash o ropen nai well jekeskro dji feteder.

⁴O gosewo djal kote, kai jek meras un i menshe rowenna. O dinelo djal kote, kai sapaske hi.

⁵O mensheske hi feteder te shunell lo ap i goseweste, kai tchingrell leha, har te shunell lo ap i gilja, kolentsa i dinele les sharenn.

⁶O sapen i dinelendar hi menge gar budeder moldo har i gole, hoi denn sane kashta tel i piri, te wenn le chatchedo.

⁷Ninna o gosewo well har i dinelo, te mukell lo pes te ginell. Dell jek leste lowe, te krell lo, hoi gar tchatcho hi, un job lell kol lowe an, palle nai djal lo buder gar pal o tchatchepen.

⁸Feteder hi, te pandess tiro mui, har te kress tiro mui pre o rakepaske. Feteder hi, te dess gar sik pre, har te wess pre-phurdo.

⁹De garda te wess gar sik chojedo! Koon choirell pes pral halauter, hi dinelo.

¹⁰Ma pen: An o phuro tsiro his halauter feteder har kanna! Te wals tu gosewo, penals tu kowa gar!

¹¹O goswepen hi jaake mishto har i brawlepen, hoi o dad peskro tchaweske mukas. Hakeneske ap kai phub hi o goswepen bud moldo.

¹²O goswepen hi har lowe. Kones kolestar doha hi, kowa hunte darell gar. Leskro goswepen rikrell o gosewes an o djipen.

¹³Dik, hoi o Dewel halauter kras! Kek nai krell wawartchandes, hoi job bango kras!

¹⁴Te hi tut i latcho tsiro, palle muk les tuke latches te djal. Te hi tut i djungelo tsiro, palle dikess dren: O Dewel kras ko jek tsiro har ko wawar, te djinell o mensho gar, hoi wella an kol diwessa, kai wenna.

¹⁵Me dikom bud koowa an miro djipen, hoi haiwom me gar: Koi hi i latcho mursh, kai djiwas i tchatcho djipen, un job merella glan te was lo phuro. Un koi hi i chocheno mursh, ko djiwell an o tchilatchepen, un job djiwell i rah djipen.

¹⁶Ma rike o tchatchepen sorleder dren har tchinlo hi! Un ma kre tut gosweder har hal! Hoske kameh tut paash te krell?

¹⁷Rike tut pale o tchilatchepastar! Un ma ab har i dinelo! Hoske kameh te merell glan tiro tsiro?

¹⁸Mishto hi, te rikreh tut ap ko jek lab, un bistreh witar gar ko wawar lab. Koon djiwell o Debleha, rikrell pes ap kowa lauter.

¹⁹Leskro goswepen krell o gosewes sorleder har deesh sorele pralstune, kai an o foro garda denna.

²⁰Kek mensho hi jaake an o tchatchepen tardo, te krell lo kokres latcho koowa un anell kek doosh ap peste.

²¹De tchi ap ko tselo rakepen, hoi i menshe rakrenna! Nai wals te shuneh, har tiro budepaskro pral tute tchingrell.

²²Tu djineh, bud kope tchingral pral wawarende.

²³Kowa halauter kamom te haiwell i gosewo djijeha. Me penom mange ‘me kamau gosewo te well’. Un me nai haiwom les gar.

²⁴Lauter, hoi koi hi, hi phares te haiwell. Un hoske kowa jaake hi, djinell kek.

²⁵Palle penom mange, tu hunte rodess budeder, te hatsess win, hoske tchomone jaake hi. Jaake lom bud koowa an i jak, te haiwap len. Kamom te djinap, well o tchilatchepen dran o dinlepen un o pre-phurdepen dran narwlepen?

²⁶Un me hatsom tchomone, hoi shutleder hi har o merepen, — i djuwel[2], kai i murshen taprell; kolakro kamlepen hi har dorja, kolentsa len pandell li; lakre mussja, hoi le trul lende tchiwell hi har shelle. I mursh, kai mishto hi glan o Debleskre jaka, kowa nai nashell peske latar; o dinelo well latar tapedo.

²⁷Dik, penell o sikepaskro, kowa hi, hoi hatsom win, har dikom ap jek koowa pal o wawar, te haiwap kau tselo koowa feteder.

²⁸Har rodom kate te kote, hatsom win: Me nai haiwau gar halauter. Jek koowa dikom: Mank serja menshe hatsom jek mursh, kai his, har hunte wals lo. Sawi djuwel hatsom me gar mank kol bud djuwjende.

²⁹Dik, kowa kokres hatsom: O Dewel kras o menshes jaake, te djiwell lo an o tchatchepen; i menshe rodenn penge bud dromma, kai nai krenn le tchilatchepen.