Read O Debleskro Drom - I Bibla an o Romano Rakepen 2021 Sikepaskro 8 Bible Online

Sikepaskro 8 - O Debleskro Drom - I Bibla an o Romano Rakepen 2021 bible

Sikepaskro 8

¹Kai hi ko mensho, kai hi tchatchepah gosewo? Kai hi kowa, kai haiwell te penell, hoske tchomone jaake hi har kowa hi? Dik i menshes an i jaka, palle nai peneh, hi lo gosewo oder gar. Te hi lo gosewo, palle dikell lo latches ap i wawareste. Leskro goswepen lell leskri choli krik.

²Te dan tumen sowel glan o baro Debleste, te shunenn ap kowa, hoi o baro rai tumenge penell, palle rikrenn tumen ap kowa!

³Ma djan sik lestar krik! Ma krenn, hoi djungeles hi glan leskre jaka! O baro rai nai krella, hoi job kamella.

⁴An o baro rajeskro lab hi sorlepen, un kek nai penell ap leste: Hoske kreh tu kowa?

⁵Kowa, kai rikrell pes ap o baro rajeskro lab, kowa djal gar khetne kolentsa, kai hadenn pen pral o baro rajeste. O gosewo djinell, o tsiro well, kai lenn le i phagi.

⁶Lautereske, hoi i mensho krella, well o tsiro, kai well o tchatchepen pral leste wi-rakedo. Un o mensheskro tchilatchepen hi phares ap leste tchiddo.

⁷Mer djinah gar, hoi wella. Koon nai penell menge, har halauter wella?

⁸O menshes hi kek soor, te nai rikrell lo o phurdepen pre. Un les hi kek soor pral ko diwes, kai merell lo. Ninna glan o kurepen nai nashell peske kek. Un peskro tchilatcho koowa nai lell gar o tchilatches win dran i bibacht.

⁹Kowa halauter dikom, un lom halauter an o jak, hoi well kerdo ap kai phub, kai hadell pes jek pral o wawareste un krell les bibachtelo.

¹⁰Un pale dikom, har tchilatche menshe shukar paskedo wan. Un kolla, kai o tchatcho koowa kran, hunte mukan o Debleskro kheer, un wan bistedo an o foro. Kowa hi ninna phares te haiwell.[3]

¹¹Ko mensho, kai kras tchilatcho koowa, lell gar sik pal kowa peskri phagi. Doleske rikrenn pen i menshe gar pale, te krenn le pengro djungelo koowa dureder.

¹²Ninna te djiwell kowa i lengsto djipen, kai krell sheel kope fullo koowa, djinau me, te djal kolenge kokres mishto, kai djiwenn o Debleha un mukenn les lengro rai te well.

¹³O tchilatcheske djal gar mishto. Un jaake har i shatto gar rah koi hi, djiwenn kolla gar rah, kai kamenn tchi o Deblestar te djinell.

¹⁴Phares te haiwell hi kowa, hoi hi kerdo ap kai phub: Kote hi menshe kai djiwenn an o tchatchepen, un kolenge djal har i menshenge, kai djiwenn i djungelo djipen. Un pale hi menshe koi, kai djiwenn i fullo djipen, kolenge djal har te djiwans le an o tchatchepen. Kote penom: Kowa hi ninna phares te haiwell.

¹⁵Doleske penau me: Men hunte wals i dji, hoi bachtelo hi. O mensheske dell tchi ap kai phub, hoi feteder hi, har te chal lo un te pijell lo, un te mukell lo les peske mishto te djal. Kowa hi, hoi nai krah pash mari tseli budi an maro djipen, hoi o Dewel men das ap kai phub.

¹⁶Me kamom win te hatsell, har te nai wau gosewo, un lom halauter an o jak, hoi i menshe ap kai phub krenna. Diwes un rati nai sowom gar.

¹⁷Un me dikom halauter, hoi o Dewel kras. Tchatchepah, i menshe nai haiwenn gar halauter, hoi job kras ap kai phub. Ninna te rodell o mensho phares, te haiwell lo ko koowa, nai hatsell lo gar win, hoske halauter jaake hi. Un ninna o gosewo, te penell lo: “Me djinau les”, nai hatsell lo les gar win.