Read O Debleskro Drom - I Bibla an o Romano Rakepen 2021 Sikepaskro 9 Bible Online

Sikepaskro 9 - O Debleskro Drom - I Bibla an o Romano Rakepen 2021 bible

Sikepaskro 9

¹Kowa halauter lom ap miro dji, te haiwap kowa: Tchatche un gosewe, un halauter hoi jon krenna, hi an o Debleskro wast. Kek djinella, wenn i wawar latches ap leste? Wenn le chojedo ap leste? Kowa lauter well diklo an ko tsiro, hoi wella.

²Halauter hunte merenna. Kowa djal jaake jekeske har ko wawareske, koleske, kai shunell ap o Debleste har koleske, kai kamell tchi o Deblestar te djinell, koleske, kai krell o latchepen un koleske, kai krell o tchilatchepen, koleske, kai hi erligo un koleske, kai hi pale-tchiddo, koleske, kai chatchrell viechen o Debleske har koleske, kai chatchrell kek viechen leske. Jaake har o latcheske djal, jaake djal o tchilatcheske. Un kowa, kai dell pes sowel, koleske djal jaake har koleske, kai kamell pes gar sowel te dell.

³Kowa hi koi bibacht pash halauter, hoi djal ap kai phub, te djal ko jekeske har ko wawareske djala. Un koi pashel hi o dji o menshendar pherdo tchilatchepen un pherdo dinlepen, jaake rah har jon djiwenna; pal kowa merenn le!

⁴Kowa, kai gomme djido hi, dikell ap ko tsiro, hoi wella. I djido djukleske djal feteder har i mulo leweske.

⁵I djide djinenna, kai hunte merenn le, i mule djinenn tchi. Koleske, hoi le kran, well len witar buder tchi. Bistedo hi le.

⁶Har i menshe kaman len, un har choiran le pen pral lende, un har silweran jon ap lende, kowa lauter hi buder gar koi. Len hi tchi buder i menshentsa ap kai phub khetne, un koleha, hoi kerdo well ap kai phub.

⁷Doleske cha tiro maro un pi tiri mool i bachtelo djijeha; kowa kamell o Dewel jaake tutar.

⁸Rib shukar ripja un tchip sungepaskro djet ap tire balla!

⁹Muk les tuke mishto te djal an tiro djipen tiri romjah, kai tu kameh, jaake rah har tut kau djipen hi, hoi tut o Dewel das, un hoi jaake sik trujel hi. Sawi bacht was tuke o Deblestar pash tiri tseli budi, hoi tu hunte kress kate ap kai phub.

¹⁰Halauter, hoi tuke glan o wast well, te kress, kowa kre o tselo djijestar! Pash i mulende, kai tu ninna hunte djas, kote well buder tchi kerdo. Un kek krell peske kote i shero, hoi nai krell lo, har nai djinell lo tchomone, un har nai well lo gosewo.

¹¹Pale dikom, har ap kai phub djala: O sikeder naashepaskro well gar glanstunes an. O sorleder kurepaskro hi gar o feteder lurdo. Sikle menshe hi gar kolla, konen o budeder chapen hi. I gosewe hi gar i brawele. Kowa, kai tchomone mishto haiwell, hi gar kowa, kai an-diklo hi. O tsiro un i bacht penenn, har hakeneske djal.

¹²Ninna djinell o mensho peskro tsiro gar, un well tapedo an o tchilatcho tsiro, hoi ap jek kopo pral leste perell, jaake har i matche tapedo wenn an i netsa, un i tchirkle an pandle dorja.

¹³Ninna dikom ap kai phub, hoi i gosewo kras, un kowa his mange bares:

¹⁴Kote his i tikno foro, un gar bud lurde his an ko foro. Un palle was i baro sorelo rai, un tchiwas pes un peskre lurden trul ko tselo foro trujel, un kras phubjakre dromma, hoi djan ap o foreskre massurja, te djal lo an o foro dren.

¹⁵Un an ko foro his i tchorwelo, gosewo mursh. Peskro goswepah nai lals kowa ko foro win dran o wawareskro wast. Un kek his koi, kai rakras leha un putchas ko tchorwelo murshes.

¹⁶Kote penom mange: Ninna te hi o goswepen feteder har o sorlepen, well o tchorweleskro goswepen gar an-diklo, un ap leskre laba well gar shunlo.

¹⁷I gosewo rakepen, hoi kek goljah rakedo was, hi budeder moldo har i rajeskri bari gole mashkral i dinelendar.

¹⁸O goswepen hi budeder moldo har i sorelo charo; un jek dinelo koowa krell bud latcho koowa paash.