Read O Debleskro Drom - I Bibla an o Romano Rakepen 2021 Kamlepaskri gili 1 Bible Online

Kamlepaskri gili 1 - O Debleskro Drom - I Bibla an o Romano Rakepen 2021 bible

Kamlepaskri gili 1

¹Kate hi i shukester gili, tchinlo o Salomeske.

²Ab un tchumme man! Tiro kamlepen hi latcheder har mool.

³Tiro sungepaskro djet sungell jaake latcho. Hakeno prindjrell tut. I tsele tcha kamenn tut.

⁴Le miro wast, tradas men! Miro pirno mu anell man khere pash peste! Mer kamah khetne te sanell un bachteles te well. Tiro kamlepen hi mange shukeder har mool. Kol tchen hi tchatcho, kai tut kamenna.

⁵Kales hom un shukar hom, tumer tcha dran o foro Jerusalem, kalo har i plachtene khera an o them Kedar un har o Salomeskre stakepangre.

⁶Ma dikenn tele ap mande, har kalo hom! O kham chatchas man kales. Mire phrala his chojedo ap mande, un kaman te dap garda ap i drakengre ruka. Ap miro shukapen nai dom kek garda.

⁷Tu, koles miro dji kamell, pen mange, kai aneh tire bakre, te chan le? Kai besheh tu tut tele mashkral o diwes? Te nashap gar trujel mank i bakre, te rodap tut pash i wawar bakrengre!

⁸Djineh tu kowa gar, tu shukester mank i djuwjende, palle dja win, un naash pal i bakre un le tire tikne busja tuha, te chan le pash o plachtene khera, kai i bakrengre djiwenn!

⁹Tu, miri pirni, hal shukar har i grai glan o wurdin o baro rajestar an o them Egiptia.

¹⁰Tire tchamja hi shukar mank i kanengre, un tiri meen hi shukar an werklia dran mirklia[1].

¹¹Sonakangre werklia kamah mer tuke te krell, kai rupene mirklia dren hi.

¹²Miro pirno, miro rai, his tchiddo ap peskro tchiben, un miro sungepaskro djet sungas latches.

¹³Miro pirno hi mange har i tikno gono pherdo sungepaskro kasht, tchiddo ap miro betch.

¹⁴Har i diwje blume mank i drakengre ruka an En-Gedi hi lo mange.

¹⁵Har shukar tu hal, miri pirni, tu hal jaake shukar, tire jaka hi har taube.

¹⁶Un tu, miro pirno, har shukar hal tu! Har kreh man bachtelo! Maro tchiben hi an o senlepen.

¹⁷Shukar sorele ruka hi maro kheer, un ruka bud senele patjentsa krenn pen buchles pral mende.