Read O Debleskro Drom - I Bibla an o Romano Rakepen 2021 Kamlepaskri gili 2 Bible Online

Kamlepaskri gili 2 - O Debleskro Drom - I Bibla an o Romano Rakepen 2021 bible

Kamlepaskri gili 2

¹I tikni bluma hom me, har hi le tardo ap o telstuno them Sharon, i lilja an i tala.

²Awa, har i lilja — i lilja mank i subjengre burra, jaake hi miri pirni mank i tchende.

³Har i phabjengro ruk mank i diwje ruka an o weesh, jaake hi miro pirno mank i terne murshende. Bachteles hom beshdo an leskro shatto, un leskre phabja hi gudlo mange.

⁴Job anas man an o moljengro kheer, un tchakras man peskro kamlepah.

⁵Krenn man pale soreles drakentsa, denn man newi soor phabjentsa! Miro kamlepen tuke krell man nasselo.

⁶Leskro serwo wast hi tel miro shero tchiddo, un leskro tchatcho wast taprell man trujel.

⁷Tumer tcha dran o foro Jerusalem, i wesheskre busja un i tserfe[2] shunenn, har mangau tumen: Mukenn men kokres jaake rah har khetne ham, bis te stah pre.

⁸Miro pirno dell gole pal mande! Dik, oke well lo, un stell pral i bare un tikne berge.

⁹Miro pirno hi har i terni wesheskri busni har i terno tserfo. Kate hi lo! Pal maro kheer! Un dikell an i wochni, mank i kashta dren.

¹⁰Miro pirno dell pal mande gole: Ste pre, miri pirni, miri shukester, un ab!

¹¹Dik, o wend hi buder gar, un o brishin djas peske.

¹²I blume djan pre an o them, O tsiro o gipaske hi koi, un i tchirkle mukenn pen te shunell an maro them.

¹³I faige wenn baro ap o ruk, un i drakengre ruka sungenna jaake gudlo. Ste pre, miri pirni, miri shukester, un ab mantsa!

¹⁴Miri tauba, ma khate tut glan mande, har i tchirklo khatrell pes mank i bare barra, an o khatepen ap i berge! Muk man tut te dikell, muk man tut te shunell! Gudlo hi tiro rakepen, un kamles dikeh tu win.

¹⁵Taprenn menge i diwje djukle, kol tikne diwje djukle, hoi krenn o moljengro them paash! Mare drakengre ruka hidjrenn knospe.

¹⁶Miro pirno hi miro, un me hom leskri. Job hatsell peskri bacht mank i lilja.

¹⁷O diwes te well shila, un o kham djal tele, ab pash mande, miro pirno! Ab sik har i wesheskri busni, har i terno tserfo ap i barrengre berge!