Read O Debleskro Drom - I Bibla an o Romano Rakepen 2021 Kamlepaskri gili 6 Bible Online

Kamlepaskri gili 6 - O Debleskro Drom - I Bibla an o Romano Rakepen 2021 bible

Kamlepaskri gili 6

¹Kai djas kanna tiro pirno koi, tu shukester mashkral i djuwjende? Hawo drom nashas tiro pirno, te nai rodas les tuha?

²Miro pirno djas tele an peskri baar, kote, kai i sungepaskre burra tardo hi, te well lo bachtelo koi, un te lell lo peske lilja khetne.

³Miro pirno hi miro, un me hom leskri. Job hatsell peskri bacht mank i lilja.

⁴Shukar hal tu, miri pirni, har ko rajeskro foro Tirza, un kamlo har ko foro Jerusalem. Te dikau tut, atchell mange o rakepen krik.

⁵Ma dik jaake ap mande! Tire jaka krenn man dineles! Tire balla hi har i kale busja, kai stenn tele i berga Gilead.

⁶Tire danda hi parno har bakre, kai wenn win kotar, kai le thodo wan. Tire tsele danda hi shukar tardo, un i tsele pralstune danda un telstune danda hi koi.

⁷Lolo har i phabi hi tire tchamja pal tiro diklo.

⁸Shob-deesh romja hi o baro rajes, un ochta-deesh wawar djuwja, un jaake bud tcha, te nai djinell kek, kitse jon hi.

⁹Jek kokres hi miri tauba, miri gudli. Lakri dat hi kek wawar tchai. Lake hi li i latcheder tchai. I wawar tcha dikan lat un penan: Har bachteli hi li! O baro rajeskre romja un wawar djuwja dikan lat un sharan lakro shukapen.

¹⁰Dikenn kolat, kai stell pre har o newo diwes, shukar har o tchon hi li, un djudjo har o kham! Koon dikell lat, koleske atchell o rakepen krik.

¹¹An i rukengro baar djom tele, te dikap, har i ruka senelo wenn, un har i drakengre ruka newe patria lenn, un har i phabjengre ruka tikne phabja hidjrenn.

¹²Hoi djal mantsa? Miro dji nashell pal tute, har te djoms an o rajeskro wurdin[6].