Read O Debleskro Drom - I Bibla an o Romano Rakepen 2021 Jesaja 1 Bible Online

Jesaja 1 - O Debleskro Drom - I Bibla an o Romano Rakepen 2021 bible

Jesaja 1

¹Kowa hi, hoi mukas o baro Dewel o murshes Jesaja te dikell pral o them Juda un pral o foro Jerusalem. O Jesaja his o tchawo ko murshestar Amoz. Kowa his an ko tsiro, kai his o Usija, o Jotam, o Ahas, un o Hiskija i bare raja pral o them Juda.

²Tu, o bolepen, un tu, i phub, shunenn, hoi me, o baro Dewel, penau: Me tserdom tchawen bares. Un har jon baro wan, phagan le mantsa.

³Haki grumni prindjrell koles, koneske joi hi. Un haki burika[1] djinell koi platsa, kai lakro rai dell lat te chal. O Israel prindjrell kowa gar. Mire menshe haiwenn kowa gar.

⁴Tumenge djal djungelo, tumer tchilatche menshe, kai anan jaake bud doosh ap tumende! Tumer han bede, tchawe, kai molenn tchi! Tumer mukan o baro Debles, kamenn tchi buder te djinell o Israeleskro Deblestar, kai kokres o Dewel hi, un sikran leske tumaro dumo.

⁵Han gomme gar doha dino? Hoske rikrenn tumare djia pandlo un djan dureder ap tumaro tchilatcho drom? Tumaro tselo shero hi pherdo dukepen, un tumaro tselo dji hi nasselo.

⁶Fun o shero bis pash i pire hi kek kotar ap tumende, hoi sasto wals. Tumaro mass hi pherdo dukepen, phuro un newo dukepen, kai dino wan. Tumaro tchinepen hi gar wi-thodo, witar gar dren pandlo. Kek djet was pre tchiddo.

⁷Tumaro them hi i mulo them, tumare forja wan tele chatchedo. Glan tumare jaka chan i wi-themarja kowa, hoi ap tumari phub bares was. Lauter hi mulo un paash, har te perans i diwje koi pral.

⁸Kokres o foro Jerusalem atchas pral, i foro trul koleste i lurde tardo hi. Ko foro hi kokres har i tikno kheer an i drakengro them, har i kheer, kai jek jak dell an i rati ap kowa, hoi ap peskri phub bares well.

⁹Te mukals o baro Dewel, ko rai pral o bolepen un i phub, gar mendar pral, djals menge har i forjenge Sodom un Gomorra.

¹⁰Tumer raja dran Sodom, shunenn o lab o baro Deblestar! Tumer menshe dran Gomorra, shunenn, hoi kamell maro Dewel tumenge te penell!

¹¹“Hoi krap me kol tsele viechentsa, hoi tumer mange anenn”, putchell o baro Dewel. “Man hi doha tumare bakrendar, hoi mange chatchran, hom tchalo ko thulepastar i pesse grumjendar. Ko rat i murshkane grumjendar un tikne bakrendar un busjendar kamau me gar.

¹²Te wenn tumer glan mande, glan miro kheer, stakrenn tumer i platsa glan miro kheer khetne. Koon penas tumenge te krenn tumer kowa?

¹³Ma anenn buder kek chapen chatchepaske! Kowa hi tchitcheske. Ma chatchrenn mange buder kek sungepaskro koowa! Man hi o nak doha. Tumer wenn mange khetne ap o newo tchon, ap o Debleskro diwes un ap wawar bare diwessa. Kowa hi mange gar mishto, jaake rah har mukenn tumer gar tumaro djungelo koowa.

¹⁴Kol bare diwessa, kai tumer rikrenn, te well i newo tchon, un ninna i wawar bare diwessa nai dikau gar buder. Jon wan mange phares te hidjrap len, un me wom khino tel lende.

¹⁵Un te hadenn tumer tumare wasta pre, te mangenn man an, palle tchakrau me mire jaka tele, te dikap tumen gar. Un ninna te mangenn mandar pale te pale, me shunau tumen gar: Tumare wasta hi pherdo rat.

¹⁶Thowenn tumen, krenn tumen djudjo! Anenn tumaro tchilatcho koowa, hoi kran, dran mire jaka krik. Mukenn o tchilatchepen!

¹⁷Dikenn, har te krenn o latchepen, denn jak, te lell hakeno peskro tchatchepen. Awenn ap i rig kolenge, kai tele rikedo wenn. Kol tchawe, kolen kek dai un kek dad hi, kolenge krenn o tchatchepen win. Un kol djuwja, kolenge o rom meras, kolengro koowa lenn an tumaro wast!”

¹⁸“Awenn”, penell o baro Dewel, “te kras men tel mende o tchatchepen win! Te hi i doosh, hoi tumer ap tumende anan jaake lolo har o rat, palle well li parno, jaake parno har gib. Un te hi li lolo har o purpur, palle well li jaake parno har o bakrengro bal.

¹⁹Kamenn tumer ap mande te shunell? Palle nai chan tumer o tselo latchepen, hoi o them win anell.

²⁰Kamenn tumer gar te shunell, un pandenn tumare djia glan mande, palle wenn o chareha mulo dino. Kowa penau me, o baro Dewel!”

²¹Har nai was kowa? Kau foro, hoi rikras pes ap mande peskro tselo djijeha, was har i lubni! O foro his pherdo tchatchepen, un i menshe djiwan pal o Debleskre tchatchepaskre laba. Un kanna djiwenn kate lauter marepangre, kai wawaren mulo denn!

²²Tu Jerusalem, hals har djudjo rup, kanna wal har tchik, hoi rupenes win dikell. Tu hals har latchi mool, kanna hal har mool, kai pani dren hi.

²³Tire pralstune hadan pen pral mande un djan khetne i tchorepangre. Un hakeno lendar mukell pes te ginell. Un kol tchawe, kolen kek dai un kek dad hi, kolenge krenn le kek tchatchepen win. Un ko koowa kol djuwjendar, kolengro rom meras, mukenn le gar glan pende te well.

²⁴Doleske penell o baro Dewel, ko rai pral o bolepen un i phub, kai hi o Israeleskro sorelo Dewel: Dikenn tumen glan! Me dau tumen pale, hoi ap mande kran, tumen, kai kamenn man gar. Miri bari choli well pral tumende, kai krenn lauter wawartchandes, har me kamau.

²⁵Jerusalem, miro wast hadau ap tute, te dap tut, te chatchap i tchik tutar win, har kowa o rupeha kerdo well, jaake te atchell o latcho rup pale.

²⁶Me dau tut pale tchatchepangre murshen un rakepangren, kai o tchatchepen win krenn, jaake har an i phure tsirja his. Un palle kharenn le tut ‘tchatchepaskro foro’ un ‘foro kolendar, kai ap o Debleste patsenna.’

²⁷Tumer menshe an Zion, te djiwenn pale pal o tchatchepen, un djan pale ap o Debleskro drom, plaissrom tumenge, te wenn win lino dran o pandepen.

²⁸Khetne phagedo wenn kolla, kai o Debleskro dromestar tele djan, khetne kolentsa, kai doosh ap pende anan. Un kolla, kai o baro Debles mukan, hunte merenn.

²⁹Tumer, kai mangan i bare ruka an, hunte ladjenn tumen koleske. Awa, tumer wenna lolo an o mui dran ladj pral kol wawar deblen, hoi rodan win un mangan len an ap lengre shukar platse.

³⁰Un tumer kokres wenn har i ruk, koleskre patria buder gar senelo hi, un har i baar[2], an kolate kek pani buder hi.

³¹Un ko mursh, hoi sorelo his har i ruk, well har mulo kasht. Un ko sorelo koowa, hoi lo kras, well har i jag, hoi ko mulo kasht pre chatchell. Jaake djal lauter an i jag pre, un kek nai krell koi jag win.