Read O Debleskro Drom - I Bibla an o Romano Rakepen 2021 Jesaja 13 Bible Online

Jesaja 13 - O Debleskro Drom - I Bibla an o Romano Rakepen 2021 bible

Jesaja 13

¹Kawa hi, hoi sikras o Dewel o Jesajes pral o foro Babilon. O Jesaja hi o tchawo o murshestar Amoz.

²Ap i bari nangi berga tchiwenn i sikepen pre! Denn soreles i lurden khetne gole! Sikrenn len i wastentsa, te djan le dren an o foreskre wudja, kai i raja djiwenn.

³Me, o baro Dewel, dom mire sorele kurepangren khetne gole. Kolla, kai hadenn man bachteli goljah, tchiwom mange ap i rig, te anenn le miri choli pral lende.

⁴Shunenn i bari gole ap i berge har bud bud menshendar! Shunenn koi bari gole, hoi denn i menshe dran bud themma, kai kate khetne wan. O baro Dewel, ko rai pral o bolepen un i phub, anell peskre lurden o marepaske khetne.

⁵Dran dur themma wenn le koi, i palstuni rigjatar i phubjatar. O baro Dewel well kolentsa, kai leskri choli pral o tselo them anenna, te krenn le halauter paash.

⁶Rowenn, o diwes, kai o baro Debleskri choli well, hi buder gar dur. Ap ko diwes anell o sorelo Dewel bari bibacht pral tumende.

⁷Doleske hi i menshen buder kek soor, te krenn le tchomone, un daar peras ap lende.

⁸Un jon perenn an pende khetne, tserdenn pen khetne i dukatar har i djuwel, te lell li i ternepen. Jek dikell darenes ap o wawareste, un lengre muja hi lolo har jag.

⁹Kanna well lo, ko diwes, kai o baro Debleskri choli well! Djungeles hi ko diwes, pherdi choljah. An leskri bari choli krell o baro Dewel i phub[15] paash, un tradell i tchilatchen latar win.

¹⁰I bolepangre momlia chatchenn buder gar. Hi sawe koi, kai dikeh buder gar. O kham well kalo, sik pal kowa kai lo pre djas. Un o tchon[16] hi buder gar djelto.

¹¹O baro Dewel penell: Me anau bibacht ap i phub, un mukau o tselo tchilatchepen, hoi i tchilatche kran, ap lende pale te well. I pre-phurden hi buder tchi, koleha nai sharenn le pen. Un me krau kol pre-phurden tikno, kai rikran pengri sorjah kolen tele, kai len kek soor hi.

¹²Me krau, te atchenn gar bud menshe djido. Tu hunte rodess budeder, te hatsess jek menshes, har te rodeh pal latcho sonakai. Awa, hi phareder te hatsess menshen har te hatsess o sonakai dran Ofir.

¹³Me mukau o bolepen te trissell. Un i phub atchell buder gar kote tardo, kai li kanna hi, ap ko diwes, kai me, o baro Dewel, o rai pral o bolepen un i phub, anau miri choli pral i phub.

¹⁴Un kol wi-themarja, kai djiwenn an o foro Babilon, kolla nashenn pash pengre menshende, hakeno an peskro them. Jon hi har wesheskre busja, kai tradede hi, un har bakre, kolen kek bakrengro hi.

¹⁵Koon an o foro Babilon hatslo well, well tele tchurje dino. Un koon tapedo well, well o chareha mulo dino.

¹⁶Lengre tikne tchawe wenn glan lengre jaka ap bare barra mules witsedo, un lengre khera wenn win tchoredo, un lengre romjen taprenn le sorjah an.

¹⁷Me, o baro Dewel, dau i menshenge an o them Media an o dji, te djan le ap kolende pre an o them Babilonia. Kolla denn tchi ap rup, un putchenn gar pal o sonakai.

¹⁸I terne murshen denn le karje mulo pengre bogentsa. Un len hi kek dji i tikne tchawenge; i tchawe khaitenn len gar.

¹⁹O Babilon his i shukester foro mank i rajengre themma. Koleha sharenn pen i Kaldearja. O Dewel krell kau foro paash, jaake har lo i forja Sodom un Gomorra paash kras.

²⁰Kek djiwell buder an ko foro kek tsireske, un kek mukell pes buder kote tele. Kek Arabari tchiwell kote peskro plachteno kheer pre. Un kolla, kai denn jak ap i bakre, mukenn kolen gar kote te chal.

²¹Diwje vieche dran o mulo them djiwenn koi. I khera wenn pherde ratsjakre tchirkle. Bare diwje tchirkle[17] djiwenn koi, un diwje busja khelenn koi.

²²Diwje djukle rowenna an i rajengre khera, kai his jaake shukar un railo. I tsiro o foreske Babilon was, te lell li peskri phagi. Un leskre diwessa hi trujel.