Read O Debleskro Drom - I Bibla an o Romano Rakepen 2021 Jesaja 14 Bible Online

Jesaja 14 - O Debleskro Drom - I Bibla an o Romano Rakepen 2021 bible

Jesaja 14

¹O baro Dewel krell peskro dji peskre menshenge pre. Un pale rodell lo peske i Israelitarjen win, un mukell len an pengro them te djiwell. Un wi-themarja wenna un djiwenna khetne lentsa.

²Un menshe dran wawar themma anenn i Israelitarjen an ko them pale, hoi o baro Dewel len das. Un kol wi-themarja, mursha un djuwja, wenn lengre budepangre. Un kolla, kai i Israelitarjen pandles krik lan, kolen lenn jon pandles, un wenn i raja pral kolende, kai rikran len tele.

³Un an ko tsiro lell o baro Dewel i Israelitarjen win dran lengre duka un lengro ropen un lengri phari budi, hoi jon hunte kran.

⁴Palle giwenn le kai sapaskri gili pral o baro rajeste pral Babilon: Har nai djal kowa? Tu, kai menge i pharo djipen kral, wal dino. Kekes nai dukreh buder.

⁵O baro Dewel phagas tiro kasht, tu tchilatcho, awa, o rajeskro kasht phagas lo an kotja.

⁶Tu dal i menshen an bud themma, un dal un dal un mukal gar tele. Diwji choljah rikral tu len tele, un lal len palla kek latchepah.

⁷Kanna dell kowa lauter buder gar. Latchepen un bacht wan pale ap i phub. Hakeno giwell i bachtjatar.

⁸Ninna i zipresstikre ruka hi bachtele pral tute, un kol zedertikre ruka ap o Libanon penenn: “Jaake rah har tu koi tchiddo hal well kek kai pre, un dell men trujel.”

⁹O tselo mulengro them hi ap i herja un djinell, te weh. I mulen mukenn le gar te sowell, tu te weh. Kolla, kai bare raja his ap i phub, awa, i raja pral bud menshende, stenn pre fun pengre rajengre beshepangre.

¹⁰Un lauter penenn tuke: Ninna an tute atchas kek soor, tuke djas har menge!

¹¹Tiro railepen, hoi trul tute his, was witsedo an o telstunepen, un i bashepangre[18] bashrenn buder gar tuke. I kirme hi kanna tiro tchiben, un kirmentsa tchakreh tut.

¹²Tu shukar bolepaskri momeli, har nai was, kai peral tu tele? Tu, kai stakral i tsele themma tel tute, har djas, kai wal ap i phub tele dino?

¹³Un tu penal tuke an tiro dji: “Me kamau pre te djal an o bolepen, pral i tsele bolepaskre momlia o Deblestar kamau me miri beshepaskri pre te tchiwell, un man beshell kote ap i berga, kai i debla khetne wenn, kote kai o kham gar diklo well.

¹⁴Me djau dureder pre har i wolke hi, un krau man jaake bares har o Dewel, ko pralstuno, hi.”

¹⁵Awa, tele pash i mulende djal tu, an o telstuno mulengro them!

¹⁶Kolla, kai dikenn tut, krenn bare jaka, un nai patsenn kowa gar: “Hi kowa ko mursh, glan koleste i tseli phub trissas, un i tsele rajengre themma bari darjah glan leste trissan?

¹⁷Hi job kowa, kai dran i phub i mulo them kras, un i forja khetne phagas, un leskre pandlen gar buder khere mukas?”

¹⁸I tsele themengre raja wan shukar paskedo, hakeno an peskro mulengro kheer.

¹⁹Tu hal an i tchik witsedo, har i kotar kasht krik witsedo hi. Tut hi kek muleskro kheer, hal rido har kolla, kai wan maredo o chareha, hal witsedo lentsa an i barrengri phub un khetne stakedo.

²⁰Tu kral tiro them paash, un maral i menshen an tiro them. Doleske weh tu gar paskedo har kol wawar raja, kai an barrengre khera paskedo wan. Un tiri tchilatchi familja well bistedo hako tsireske.

²¹Tire mursh tchawe hunte merenn! Awenn un denn len mulo! Jon hunte merenn ko tchilatchepaske, hoi lengre phure kran, te nai hadenn le pen gar buder, un lenn i phub penge dren un krenn penge forja koi pre.

²²O baro Dewel, ko rai pral o bolepen un i phub, penell: Me hadau man pre ap i menshende an o foro Babilon. Leskro lab well bistedo. Un kek lendar atchell djido, witar gar lengre tchawe un tchawengre tchawe.

²³Me krau dran o foro i sapeni platsa, kai i stachelengre djiwenn. Un khossau o tselo foro krik, har jek i besa lell un o kheer win khossell. Kowa penau me, o baro Dewel, ko rai pral o bolepen un i phub.

²⁴O baro Dewel, o rai pral o bolepen un i phub, penas un das pes sowel: Jaake har me les mange glan lom, jaake krau les ninna. Un jaake har an miro dji hi te krap, jaake well ninna.

²⁵Me dau i Assirjen an miro them, ap mire berge stakrau len khetne, te nai rikrenn le buder gar mire menshen tele, un krenn lenge buder gar i pharo djipen.

²⁶Jaake his kowa an o Debleskro dji te krell lo ap i phub. Un leskro wast hadas lo pre, te dell lo i menshen an hake themma pengri phagi.

²⁷O baro Dewel, ko rai pral o bolepen un i phub, las pes kowa glan. Koon nai krell, te well kowa gar? Leskro wast hi hadedo. Koon nai lell leskro wast pale?

²⁸Kawa hi, hoi sikras o Dewel o Jesajes an ko bersh, kai o baro rai Ahas meras.

²⁹Tumer menshe an o them Filistia, ma awenn bachtelo, te was o kasht, koleha dino wan, kanna phagedo. Te merell i sap, well i djungleder sap pal leste. Un lestar well i wawar sap, hoi hi gomme djungleder un nai hadell pes har i tchirklo.

³⁰I tchorwelen mire menshendar hi doha te chal. Un kolen, kai tchi hi, nai tchiwenn pen tele kek darjah. Tumen, Filistarja, mukau i bokatar te merell. Un hoi tumendar pral atchell, dau mulo.

³¹Denn soreles gole, tumer, kai han tardo pash o foreskre wudja! Rowenn bari goljah, tumer, kai djiwenn an o foro! Trissenn i darjatar an o tselo them Filistia! Fun kotar, kai norden hi, well jagakro ducho un bud bud lurde, un kek kolendar atchell pale.

³²Hoi hunte penas kolenge, kai i Filistarendar bitchedo wan? Penenn lenge: O baro Dewel tchiwas o foro Zion soreles pre. Un kate nai khatrenn pen peskre tchorwele menshe kek darjah.