Read O Debleskro Drom - I Bibla an o Romano Rakepen 2021 Jesaja 17 Bible Online

Jesaja 17 - O Debleskro Drom - I Bibla an o Romano Rakepen 2021 bible

Jesaja 17

¹Kate sikrell o Dewel, hoi pral o foro Damaskus wella: I tsiro well sik, kai o foro Damaskus buder kek foro hi. Lestar atchell tchi har tele phagede barra.

²Kol forja an Syria hi muklo, un i vieche nai chan kote, un kek hi koi, kai len krik tradell.

³Trul i forja an Israel hi buder kek massurja. Un o foro Damaskus hi kek rajeskro foro buder. Kol Syrarja, kai atchenn djido, lenge djal jaake har i Israelenge. Lengro railepen atchell gar. Kowa penell o baro Dewel, ko rai pral o bolepen un i phub.

⁴An ko tsiro hi o themes Israel buder kek railepen, kote, kai brawlepen his, hi kanna tchorwlepen.

⁵Palle hi o tselo them Israel har i hachetikri phub, kai o djob tchinlo un dren anlo was, jaake muklo har i tala Refajim, te was o djob dren anlo.

⁶Kokres i wast pherdo menshe atchenn djido. O Israel hi har i djeteskro ruk, kolestar dan le i djeteskre drake tele. Un dui te triin drake atchan pral ap i pralstune kashta, un star te pantch ap i telstune kashta. Me, o baro Dewel, hom o Israeleskro Dewel, un penom kowa.

⁷Ap ko diwes dikenn i menshe ap koleste, kai len kras. Kowa hi o Israeleskro Dewel.

⁸Un jon dikenn buder gar ap kol mule deblen, hoi jon pengre wastentsa un gushtentsa kran, — kol figuren, hoi sikrenn i debletsa Ashera, un kol boba, kai lake sungepaskro koowa chatchedo well.

⁹An kol diwessa hi lengre sorele barrengre forja muklo tchiddo, har i forja, hoi i Hiwarja un i Amorarja pal pende mukan, har nashan le penge glan i Israelitarjen. Un kek mensho djiwell buder koi.

¹⁰Israel, tu bistral tiro Debles, kowa, kai tut win las dran i tchilatche wasta. Tu bistral koles, kai his tuke har i baro sorelo bar, pal koleste nai khatral tut. Un kral tuke pre-tchidde barra, kai mangeh wawar deblen an. Ninna te tchiwal kote shukar drakengre ruka an i phub,

¹¹hoi sik pre djan un senelo wan, wenn ap lende kek newe drake bares. Un tu nai aneh tchi dren. Kowa, hoi tuke well, hi nasslepen un duka, hoi kek nai krik lell.

¹²Shunenn, bud bud lurde wenna dran bud themma, un lengri gole hi baro un diwjo har o baro pani. Sorele natsjone hadan pen un wenna har sorele diwje panja.

¹³Awa, har bare diwje panja wenn le sik. Koi tchingrell o Dewel ap lende, un jon nashenn penge, un wenn tradedo har o phuss, hoi phurdell i sorelo ducho pral o them, un har patria, hoi phurdell lo trujel.

¹⁴Ap i rati krenn le i menshen bari traash. Un glan o newo diwes wella, hi le gar buder koi. Jaake djal kolenge, kai kamenn men win te randell. un kamenn menge kowa te tchorell, hoi menge hi.