Read O Debleskro Drom - I Bibla an o Romano Rakepen 2021 Jesaja 19 Bible Online

Jesaja 19 - O Debleskro Drom - I Bibla an o Romano Rakepen 2021 bible

Jesaja 19

¹Kate sikrell o Dewel, hoi pral o them Egiptia wella: O baro Dewel ulerell ap i sik wolka un well pral o them Egiptia. Un i tsele chochene debla an Egiptia trissenna glan leste. Un i Egiptarenge perell o dji an i cholopja.

²Un me kamau len jek ap o wawareste pre te anell, jaake te marell pes jek phraal o wawareha, jek maal o wawareha, jek foro o wawareha, un jek them o wawareha.

³Palle djinenn i Egiptarja gar buder, hoi te krenn le. Un me krau, te djal lenge gar, hoi kamenn le te krell. Un palle djan le pash pengre chochene deblen, te putchenn le lendar, un pash kolende, kai i mulen putchenn, un pash i durkepangren un drawepangren.

⁴Un me dau o them Egiptia an o wast i tchilatcho rajestar. Awa, jek, kai djal sorjah ap lende, well lengro baro rai. Kowa penell o baro Dewel, ko rai pral o bolepen un i phub.

⁵O pani an o Nil well krik chalo, ko lengsto pani hi gar buder.

⁶Un kol wawar lengste panja khandenn palle, un i tikne panja nashrenn pengro pani un wenn truk. Un o panjeskro khass un o shilftikro khass well kalo.

⁷Ninna o senlepen pash o pani merell tele, un o djobeskro them, hoi pash leste tchiddo hi, well truk. Un i ducho hidjrell o djob krik un hi gar buder.

⁸Un i matchepangre denn gole un i wasta khetne pral o shero. Un lauterenge, kai pengri raan un netse an o pani witsran, lenge hi ropaske.

⁹Un kolla, kai laintikre thaba krenn, un kolla, kai lendar latcho than krenn, kolla lauter djinenn buder gar, har dureder djal, un jon wenn parno i darjatar.

¹⁰Un lauter, ap hoi le pen jaake rikran, hi khetne dino. Hakeneske, kai lowenge budras, hi ropaske.

¹¹I pralstune dran o foro Zoan hi dinele, i gosewe rakepangre o baro rajestar Farao penan leske narwelo koowa. Har nai penenn le leske: Mer ham i tchawe gosewe murshendar, mare phure his bare raja an o phuro tsiro?

¹²Tu, rai pral Egiptia, kai hi tire gosewe mursha? Nai penenn le tuke, hoi o baro Dewel, ko rai pral o bolepen un i phub, kamell te krell tiro themeha?

¹³I pralstune pral o foro Zoan wan dinele, un i pralstune pral o foro Memfis kran pen tchomone glan. I tsele pralstune an Egiptia anan i menshen ap i chocheno drom.

¹⁴O baro Dewel kras, te wenn le har mato un rakrenn sawo koowa, te djinenn i Egiptarja buder gar, hoi te krenn. Jaake perenn le jek rigjatar ap i wawar har i mato, kai perell an peskro tchadepen.

¹⁵Un kekeske an o them Egiptia djal kowa mishto, hoi lo peske glan lell: kek braweleske un kek tchorweleske, kekeske, kai an-diklo hi, un kekeske, kai gar an-diklo hi.

¹⁶Ap ko diwes darenn i Egiptarja har djuwja; jon trissenn i trashatar glan o baro Debleste, ko rajeste pral o bolepen un i phub, ap ko diwes, kai hadell lo peskro wast, te dell lo len.

¹⁷un jon darenn o themestar Juda. Hako kopo, kai well o lab Juda wi-rakedo, trissenn le glan kowa, hoi o baro Dewel, ko rai pral o bolepen un i phub, penas, te anell lo pral lende.

¹⁸Ap ko diwes hi pantch forja an o them Egiptia, kai rakrenn le o hebretikro rakepen, un denn pen sowel pash o baro Debleste, ko rajeste pral o bolepen un i phub. Un jek kol forjendar kharella Khameskro Foro.

¹⁹Ap ko diwes hi mashkral an o them Egiptia i chatchepaskri, kai vieche o baro Debleske chatchedo wenna, un kote, kai i themma Egiptia un Israel khetne wenna, well i baro bar o baro Debleske pre tardo, kai lo sharedo wella.

²⁰Ko bar sikrella, te hi o baro Dewel ninna an o them Egiptia, job, kai hi o rai pral o bolepen un i phub. Un te denn le ap o baro Debleste gole, te lell lo len win dran i wasta kolendar, kai rikrenn len tele, palle bitchrell lo lenge jekes, kai lell lengro koowa an o wast, un lell len win dran lengre wasta.

²¹Un o baro Dewel sikrell pes palle i Egiptarende, un jon prindjrenn les un mangenn les an, un anenn leske viechen un chapen, hoi well leske chatchedo. Un denn pen glan leste sowel, te denn le les tchomone, un rikrenn koi sowel ninna.

²²Un pal kowa, kai das o baro Dewel i Egiptarjen, krell lo len sasto. Un jon wenn pale pash leste. Un job mukell pes lendar te mangell un krell len sasto.

²³Ap ko diwes dell i drom, hoi djal dran o them Egiptia pash o them Assur. Un i menshe dran Assur wenn an Egiptia, un i Egiptarja wenn an Assur. Un khetne mangenn le o Debles an.

²⁴Ap ko diwes well o Israel o triinto baro them khetne i themma Egiptia un Assur. Un kolla triin hi i sikepen, hawi bari bacht o Dewel i tsele menshenge ap i phub anell.

²⁵O baro Dewel, ko rai pral o bolepen un i phub, tchiwell peskri bacht ap lende un penell: Bachtelo hal tu Egiptia. Tumer han mire menshe. Bachtelo hal tu Assur. Tumen krom me mire wastentsa. Bachtelo hal tu Israel. Tumen rodom me mange win, te wenn mire menshe.