Read O Debleskro Drom - I Bibla an o Romano Rakepen 2021 Jesaja 28 Bible Online

Jesaja 28 - O Debleskro Drom - I Bibla an o Romano Rakepen 2021 bible

Jesaja 28

¹Djungeles djal tuke, tu foro Samaria! Tu hal tchiddo ap i berga, hoi hi tardo pral o brawelo them. Un hal har i rajeskri stadi. I menshe dran o them Efrajim, kai i moljatar mate hi, sharenn pen tuha. Tiro shukapen hi har i blume, hoi merell tele.

²O baro Dewel bitchrell jekes, koles bud soor un penepaske hi. Un kowa well har i baro diwjo phurdepen, kai brishineskre barra dren hi, un hoi lauter paash dell. Job witsrell halauter tel peste an i tchik, jaake har i baro brishin, hoi lauter tel pani tassell.

³Peskre herjentsa stakrell lo ko pre-phurdo foro khetne, kai i mate dran Efrajim djiwenn.

⁴Un ko railepen kol pralstunendar hi har i bluma, hoi merell tele, un hi buder gar koi. Lenge djal har i faige, kai wan glan lengro tsiro bares. Jaake sik har jek len dikell, hi le an leskro wast un job chal len pre.

⁵Ap ko diwes hi o baro Dewel, ko rai pral o bolepen un i phub, har i shukar rajeskri stadi un shereskro sonakai kolenge, kai pral atchan leskre menshendar.

⁶Un i tchatchepangre rajende dell lo o tchatchepen an o dji, te nai rakrenn le tchatchepah o tchatchepen win. Un kol kurepangren dell lo i soor, te nai tradenn le i lurden dran wawar themma pale dran o foro win.

⁷Ninna i rashaja un o Debleskre rakepangre hi mato i moljatar, un perenn jek rigjatar ap i wawar o sorelo pipastar, hoi le pijan. Jaake bud mool un sorelo pipen pijan le, te nai atchenn le buder gar tardo. Te rakrenn le o Debleskro lab win, hi le mato koi pashel. Te krenn le o tchatchepen win, perenn le jek rigjatar ap i wawar.

⁸Lengre chapangre, kai jon beshdo his, hi pherdo tchadepen, kek platsa atchas djudjo.

⁹Jon penenn: “Menge kamell job tchomone pashel te anell un leskre dromma te sikrell? Mer ham buder kek tikne tchawe, kai glan i tikno tsiro gomme o thud pash pengre daja pijan!

¹⁰Tchatchepah, lauter hoi lo rakrell, hi laba, hoi haiwell kek, hi sau koowa, har i ternepen rakrell: ba-ba-ba, ma-ma-ma.”

¹¹Awa, i tsiro wella, koi bitchrell o Dewel wi-themarja pash kal menshende. Un kolengro rakepen haiwenn le gar.

¹²Kowa rakras job, kai glan rah tsiro ap lende penas: “Kate hi o them, kai nai lenn newi soor. Mukenn kolen pen tele te tchiwell, kai jaake tele maredo wan. Kate nai tchiwenn le pen tele.” Jon kaman gar te shunell.

¹³Doleske haiwenn le gar, hoi o baro Dewel lenge penell. Leskro lab hi lenge tchi wawar koowa har sau koowa, hoi i ternepen rakrell: ba-ba-ba, ma-ma-ma. Jaake te djan le koi un perenn, un phagenn pen i herja, taprenn pen an i dori, un wenn pandlo.

¹⁴Tumer pre-phurde, kai penenn i menshenge an o foro Jerusalem, hoi le hunte krenn, kanna shunenn o lab o baro Deblestar:

¹⁵Tumer penan: “Mer kram win o merepah un o mulengro themeha, te was menge tchi. Ninna te wenn i lurde dran wawar themma har i baro sorelo pani pral mende, wenn le gar sorleder har mer.” Tumer patsenn, te nai khatrenn tumen pal tumare chochene laba un pal ko chochepen, hoi kran.

¹⁶Doleske penell o baro Dewel, maro rai: Ap i berga Zion tchiwau i sorelo bar, ap koleste miro kheer tardo well. Sorelo un kutch hi ko bar un rikrell lauter win. Ap leste hi tardo: Koon ap mande patsell, nashell peske gar.

¹⁷An miro kheer djiwell o tchatchepen, un mire menshende dau tchatchepaskre laba. Sorelo brishin, kai brishineskre barra dren hi, dell palle o chochepen paash, ap koleste tumen rikrenn. Un panja hidjrenn tumaro khatepen krik.

¹⁸Un kowa, hoi tumer win kran o merepah un o mulengro themeha, well krik lino un hi gar buder. Un i lurde wenn har i baro pani, un stakrenn tumen khetne.

¹⁹Hako kopo, kai wenn le, taprenn le tumendar un anenn tumen krik, nai well ap o diwes un ninna an i rat. Te haiwans tumer, hoi shunenn, palle atchals tumenge o rakepen krik i trashatar.

²⁰Palle djans tumenge har penlo well: O tchiben hi gar lengsto doha, un i plachta hi gar buchles doha, te nai tchiwess lat trul tute.

²¹O baro Dewel stell pre, har kras lo pash i berga Perazim, un well chojedo har an i tala Gibeon, te krell lo lauter, hoi job peske glan las. Un kowa hoi job kanna krell, haiwenn tumer gar. Kowa well tumenge jaake glan, har te wals gar lestar.

²²Kanna, ma san buder pral mire laba, te wenn i shelle trul tumende gar gomme sorleder khetne pandlo. O baro Dewel, ko rai pral o bolepen un i phub, mukas man te djinell, te las lo pes glan, te well o merepen pral o tselo them.

²³Shunenn, hoi penau! Denn mishto jak ap miro rakepen!

²⁴I hacho, hoi peskri phub trujel budrell, krell job kowa hako diwes? Witsrell job pale te pale i phub pre?

²⁵Hi kowa gar jaake: Te kras lo i kotar phub, palle witsrell lo tikne djoba dren: o dill un i kimmla, ninna o gib un o djob, hakenes ap i wawar kotar phub, ninna tchomone ap i rig.

²⁶Un har job kowa hunte krell, sikras les o Dewel, kowa hoi job djinell, well lestar.

²⁷O dill dell lo gar win har jek o djob win dell, un pral i kimmla ulerell lo gar. Na-a, o dill un i kimmla well o kashteha win dino.

²⁸Well o djob jaake win dino, te djal lo paash? Na-a, kowa well i tikno tsiro dino. Un te ulerell o hacho peskre grajentsa koi pral, krell lo kowa gar jaake rah, te atchell tchi pral.

²⁹Ninna kawa djal win o baro Deblestar, ko rajestar pral o bolepen un i phub. Kowa, hoi job peske glan las, hi jaake shukar, te atchell menge o rakepen krik. Un leskro goswepen hi baro.