Read O Debleskro Drom - I Bibla an o Romano Rakepen 2021 Jesaja 29 Bible Online

Jesaja 29 - O Debleskro Drom - I Bibla an o Romano Rakepen 2021 bible

Jesaja 29

¹Djungeles djal tumenge an o foro Arijel[29], ko foro, kai o David djiwas! Djungeles djal tumenge, ninna te mukenn gar tele un wenn hako bersh, te rikrenn tumare bare diwessa!

²Me anau jaake bud traash ap o foro Arijel, te denn tumer bari gole, un denn i wasta khetne pral o shero. Un palle well o foro i tchatcho chatchepaskro bob[30] mange.

³Me tchiwau lurden trul o foro pre ap hake rigja. Un mukau barra un tchik trul leste pre te tchiwell, te wenn tumer dren pandlo.

⁴Palle han tchiddo ap i phub. Un dran i tchik rakrenn tumer palle jaake, har te wans tel i phub. Un tumaro rakepen well gar mishto shunlo, un hi har o rakepen i mulestar, kai dran i phub rakrell.

⁵Ap jek kopo wenn kol bud bud lurde, kai ap tumende djan, krik phurdedo har i stauba. Un kol sorele kurepangre hi har o phuss, hoi krik phurdedo well un buder gar koi hi. Jaake sik, har jek i jakentsa dell,

⁶well o baro Dewel, o rai pral o bolepen un i phub, un lell tumen win dran lengre wasta. Job wella bari goljah un mukell i phub trissell. Un o bolepen dell gole, un i sorelo ducho phurdell pral i phub, un bari jag chal trul peste.

⁷Un kol tsele natsjone, kai pengre bud lurdentsa ap o foro Arijel djan, un o foro dren pandan, un leske daar kran, kolla hi jaake sik krik, har djal i suni krik, un kowa, hoi jek an i suni dikas.

⁸Jek, kai bokella, dell suni, te chal lo. Un te krell lo peskre jaka pre, hi les gomme bok. Un jek, kai trushella, dell suni, te pijell lo. Un te krell lo peskre jaka pre, hi les trush, un leskro mui hi truk. Jaake djal kol menshenge dran i tsele themma, kai djan an o kurepen i bergah Zion.

⁹Krenn dureder, har te wans dinelo an o shero! Krenn dureder, har te wans korelo ap i dui jaka! Tumer han mato — un pijan kek mool. Tumer perenn jek rigjatar ap i wawar — un pijan kek sorelo pipen.

¹⁰O baro Dewel tchiwas i sopaskro ducho ap tumende. O Debleskre rakepangre hunte wans tumare jaka, — o Dewel kras len korelo, un i dikepangre dikenn buder tchi, har te wals i diklo trul lengre jaka pandlo.

¹¹Lauter, hoi tumen o Dewel sikras, hi tumenge har i laba an i liil, hoi krell nai kek pre. Kowa hi jaake, har te dals jek i liil jekeste, kai haiwell te drawerell, un penell leske: Drawe mange glan, hoi tardo hi. Un kowa penell: Kowa djal gar, ko liil nai krell kek pre.

¹²Un palle dell lo ko liil jekeste, kai haiwell gar te drawerell, un penell: Drawe mange glan, hoi tchinlo hi. Un kowa penell: Me haiwau gar te drawerell.

¹³O baro Dewel, maro rai, penas: Kal menshe sharenn man labentsa. Lengre tchipja hadenn man. Lengre djia hi dur krik mandar. Te mangenn le man an, rakrenn le palla, hoi lenge glan penlo was.

¹⁴Doleske krau kal menshentsa pale sawo koowa, hoi le gar haiwenn, un hoi win dikell, har te wals kowa gar mandar, jaake te atchell lenge o rakepen krik. Lengre gosewe menshe hi palle buder gar gosewo. Un kolla, kai bud haiwan, haiwenn buder tchi.

¹⁵Djungeles djal kolenge, kai kowa, hoi le penge an pengre djia glan lan, glan o baro Debleste khatrenn, un an o kalepen i ratsjatar pengro koowa krenn, un penenn: “Koon dikell men? Un koon djinell, te hams mer kowa?”

¹⁶Tumer rissrenn lauter trujel! Hi o tchik, dran koleste i pirja un khore chatchedo wenn, kanna budeder har ko mursh, kai len krell? Nai rakrenn i pirja lestar: Job kras men gar. Nai penals o khoro lestar: Kowa haiwell tchi.

¹⁷Tchatchepah an i tikno tsiro well o weesh ap i berga Libanon i djobeskro them. Un hoi kanna i djobeskro them hi, well palle i weesh.

¹⁸Ap ko diwes shunenn kolla, kai nai shunenn gar, i laba dran i liil. Un i korele nai dikenn un djiwenn buder gar an o kalepen un an i rat.

¹⁹Un o baro Dewel krell kolen pale bachtelo, kai wan tele rikedo. Un i tchorwele giwenn i bachtjatar pral o Israeleskro Debleste.

²⁰Sorele raja, kai i wawaren tele rikran, nashrenn pengri soor. Un i pre-phurde hi buder gar koi. Un maredo wenn halauter, kai kaman i bibacht pral i wawarende te anell,

²¹kolla, kai chochepah doosh ap i wawarende anan, un chochenn i tchatchepangre murshen, un anenn len pengre chochene labentsa jaake dur, te denn le kek tchatchepen koleste, kai kek doosh ap leste hi.

²²O baro Dewel, kai o Abrahames win las dran peskro phuro djipen, kowa penell pral o Jakobeskro kheer: Kanna hunte ladjell pes o Jakob buder gar, un leskro mui hunte well gar buder parno.

²³Te dikenn leskre tchawe ko koowa, hoi mire wastentsa mashkral lende krau, palle hadenn le miro lab; jon sharenn man, o Jakobeskro Debles, kai hom kokres o tchatcho Dewel. Un jon mangenn man an, o Israeleskro Debles.

²⁴Un kolla, hoi tchi haiwan, haiwenn palle, hoi mishto un gar mishto hi. Un kolla, kai mukenn pen tchi te penell, lenn kowa an, hoi lenge siklo well.