Read O Debleskro Drom - I Bibla an o Romano Rakepen 2021 Jesaja 3 Bible Online

Jesaja 3 - O Debleskro Drom - I Bibla an o Romano Rakepen 2021 bible

Jesaja 3

¹O baro Dewel, ko rai pral o bolepen un i phub, lell dran o foro Jerusalem un dran o them Juda lauter krik, ap koleste i menshe pen rikran un hoi len soor das. O tselo maro un o tselo pani lell lo lendar krik.

²Ninna i sorele murshen, i kurepangren, i tchatchepangre murshen, o Debleskre rakepangren, i durkepangren un i phureden lell lo lendar.

³Ninna i pralstune lurden, i an-dikle menshen, i rakepangren, i gosewen, i durkepangren un kolen, kai i mulen putchenn, lell lo kolendar krik.

⁴Job penell: Me mukau terne murshen pral lende rai te well, kai lentsa krenn, hoi le kamenn.

⁵Un an o them djal hakeno ap o wawareste un dell les pral o kand: o terno o phures, o tchi-moldo o an-dikles.

⁶Palle taprell jek peskro phrales an peskro dadeskro kheer un penell ap leste: “Tut hi i baja ap tute, tu wess maro pralstuno an kau pharo tsiro.”

⁷Ap ko diwes dell job pes sowel un penell: “Me hom kek dramaskro, un an miro kheer hi kek maro un kek baja. Ma krenn te wap me rai pral tumende!”

⁸O foro Jerusalem peras, un o them Juda hi koi tchiddo. Hoske? Jon dukran o baro Debles pengre labentsa, un ninna koleha, hoi le kran. Kowa, hoi o sorelo Dewel lenge penas, kaman le gar te krell.

⁹O tchilatchepen dikell dran lende win. Un jon anenn doosh ap pende un kolah sharenn le pen ninna gomme, jaake har kol menshe an o foro Sodom ninna kran. I bibacht well ap lende, koja anenn jon kokres pengro djungelo djipah pral pende!

¹⁰I bacht well ap kolende, kai an o tchatchepen tardo hi! Un lauter djal lenge mishto. Ko latcho koowa, hoi le kran, well ap lende pale.

¹¹Ap i tchilatchende well bibacht. Lenge djal gar mishto. Ap lengro shero well ko tchilatchepen pale, hoi le kran.

¹²Mire menshe, penell o baro Dewel, tumare pralstune hi tchawe. Un djuwja hi i raja pral tumende. Kolla kai hunte sikrans tumenge o drom, anenn tumen o tchatcho dromestar tele, un krenn, te nashrenn tumen.

¹³Koi well lo, o baro Dewel, te penell lo, kones tchatches hi an o tchingepen. Job hi koi tardo, te krell lo o tchatchepen win pral peskre menshende.

¹⁴Ap i phurende un rajende pral peskre menshende penell job: Tumer chan i tsele drake, hoi ap miro drakengro them bares wan, An tumare khera hi kowa, hoi tumer i tchorwelenge randan!

¹⁵Hoske stakran tumer mire menshen tel tumare herja? Un hoske dan o tchorweles an o mui? Me, o baro Dewel, ko rai pral o bolepen un i phub, putchau kowa tumendar.

¹⁶Un o baro Dewel penas: Dikenn, har pre-phurde jon hi, kol djuwja an o foro Jerusalem! Lengre sherja hidjrenn le pre, witsrenn pengre jakentsa trujel, te dikenn len hakeno. Jon khelenn pash o naashepen. Lengre pire hadenn le jaake, te bashrenn kol werklia, hoi le trul pengre pire tchiwan.

¹⁷Doleske mukau me, o baro Dewel, i tchiklo dukepen ap lengre sherja te well, un mukau lenge i tsele balla tele te tchinell.

¹⁸Ap ko tsiro lell o baro Dewel i djuwjenge ko tselo kutch koowa krik, koleha jon pen jaake shukar krenn, kol werklia, hoi tchiwenn le trul pengre pire, pengre sherja, pengre menja,

¹⁹pengre mussja. Un lengre kanengre un lengre shereskre dikle lell lo lendar ninna krik,

²⁰ninna lengre stadja, tikne werklia, pereskre dorja, lengro sungepaskro pani, lengre bachtjakre,

²¹lengre gustria un nakeskre kanengre,

²²lengre shukar ripja, lengre plaashke un baja un ladetse,

²³lengre blendarja un lengre gada, lengre stadja un lengre shereskre bare dikle.

²⁴Un palle well, te hi djungeli khand, kai shukar sungepen his, un kote, kai i shukar pereskro pandepen his, hi kanna i dori. Un kolat, kai shukar bal his, kolat hi palle kek bal ap o shero, un kolat, kai kutch koola his, koja riwell palle i gono trul peste. Un kote, kai shukapen his, hi kanna tchi har i ladj.

²⁵I murshen an o foro wenn mulo dino o chareha. Ninna i sorleder merenn an o kurepen.

²⁶I menshe an tiro foreskre wudja, Jerusalem, denn palle gole un rowenn. Un o foro hi palle wi-tchoredo un muklo.