Read O Debleskro Drom - I Bibla an o Romano Rakepen 2021 Jesaja 30 Bible Online

Jesaja 30 - O Debleskro Drom - I Bibla an o Romano Rakepen 2021 bible

Jesaja 30

¹O baro Dewel penell: Djungeles djal mire tchawenge, kai mandar tele peran, un kai penge kowa glan lan, te krenn le hoi gar mandar win djas. Jon tchiwenn pen wawarentsa khetne, har me kowa gar kamau. Un jaake anenn pale te pale le doosh ap pende.

²Mandar putchenn le gar, hoi te krenn le. Na-a, jon djan tele pash i Egiptarjen, te mangenn le o rajestar Farao, te well job ap lengri rig, un te rikrell lo peskre wasta pral lende.

³Kowa djal tumenge gar mishto. O Farao nai rikrell gar peskre wasta pral tumende. O them Egiptia nai well gar tumaro khatepen. Tumer hunte djan khere i ladjah.

⁴Tumare pralstune djan an o foro Zoan, un tumare bitchepangre wan an o foro Hanes[31].

⁵Kol menshe kote nai wenn tumenge gar ap i rig. Tchi nai krenn le, hoi tumenge moldo hi. Lendar hi tumen tchi. Kokres ladj un praassepen anenn le ap tumende.

⁶Kate sikrell o Dewel, hoi pral i viechende an o mulo tato them Negev wella: An o them pherdi daar un traash, kai djiwenn o lewo un i lewetsa, ninna tchilatche sapa un wawar sapa, kolengro dandepen o merepen anell, kote hunte hidjrenn i burike pharo koowa ap pengro dumo, un i khamele bud kutch koowa ap pende, hoi anenn i menshe dran Juda pash kol menshende, kolendar jon tchi hi.

⁷Kowa lauter hi tchitcheske. Hoi i Egiptarja nai krenn, hi tchi moldo. Doleske penau ap o them Egiptia: Tu hal i Rahab, kai atchell beshdo un krell tchi.

⁸Mange penas o baro Dewel: Dja tu kanna koi, un tchin kal laba an i bar glan i jaka kal menshendar, awa, tchin len an i liil, te wenn le i sikepen, hoi atchell o tsireske, hoi wella.

⁹Kal menshe peran mandar tele. Har tchawe hi le, kai rakrenn chochepen, un kamenn gar mire laba te shunell.

¹⁰Ap i dikepangre penenn le: “Ma dikenn i dikepen[32].” Un ap o Debleskre rakepangre penenn le: “Ma penenn menge, hoi o Dewel tumende sikras un hoi tchatcho hi! Penenn menge kowa, hoi pes menge shukar an-shunell! Un sikrenn men sau koowa, har mari djia les kamenn.

¹¹Djan tele tumaro dromestar! Mukenn o tchatcho drom! Penenn menge buder gar, hoi o Israeleskro Dewel penell.”

¹²Doleske penell o Israeleskro Dewel, kai kokres o tchatcho Dewel hi: Tumer kamenn tchi kolestar te djinell, hoi penom. Un rikrenn tumen ap kolende, kai rikrenn i wawaren tele, un kamenn chochepah dureder te well.

¹³Kai doosh hi har i phagepen an i kheer. Ko kheer hi buder gar soreles tardo, un ap jek kopo perell lo khetne. Un kek patsas te well kowa jaake.

¹⁴Ko kheer hi an kotja tchiddo jaake har o khoro, hoi paash dino was. Lestar atchell kek tikno kotar, koleha nai lals jag dran o bob un pani dran i brunna.

¹⁵Doleske penell o baro Dewel, maro rai — job, kai kokres o Israeleskro Dewel hi: Te mukenn tumaro drom, wenn pash mande, un dikenn ap kowa, hoi me tumenge krau, palle wenn win lino dran o kurepen. Te rikrenn tumen pale, un rikrenn tumen ap mande, palle wenn sorelo. Kowa kamenn tumer gar te krell.

¹⁶Tumer penenn: “Na-a, ap graja kamah sik te klissell. Mare graja hi sik naashepangre.” Awa, tumer nashenn sik tumenge. Un kolla, kai tumen palla lenn, nashenn gomme sikeder.

¹⁷I sero mursha tumendar nashenn penge glan jekeste, kai peskro mui pre krell un penell ‘Kanna lenn tumare dawa.’ Awa, glan pantch sawendar nashenn tumer lauter krik. Tumare tsele lurdendar atchell tchi pral har koi plachta ap i kasht, hoi pre tardo tchiwan pral ap i berga, te dikenn le lat fun dural.

¹⁸Doleske dikell o baro Dewel ap ko diwes, kai nai well lo tumenge pale latches, un te nai krell lo peskro dji tumenge pre. O baro Dewel hi i Dewel, kai hako tsiro o tchatchepen krell. Bachtelo hi hakeno, kai ap leste dikell.

¹⁹Tumer menshe an o foro Jerusalem, kai djiwenn ap i berga Zion, tumer hunte rowenn buder gar. Te denn tumer ap leste gole, hi lo latches ap tumende. Jaake sik har shunell lo tumari gole, rakrell lo ap tumende pale.

²⁰Ninna te das lo tumen jaake bud kurepen un i pharo djipen har maro un pani, sikrell lo tumenge kanna peskro drom, un khatrell pes gar buder glan tumende. Ko diwes wella, kai dikenn tumer les tumare jakentsa.

²¹Te kamenn ap i tchatchi oder ap i serwi rig leskro dromestar tele te djal, palle shunenn tumare kanda i rakepen, hoi pal tumende rakrell: Kawa hi o drom, kowa djan!

²²Palle dikenn tumer ap tumare rupene un sonakangre figure har ap tchomone, hoi pale-tchiddo hi. ‘Krik kolentsa’ penenn tumer un witsrenn len krik har tchik.

²³Palle dell o baro Dewel brishin ap o djob, hoi tu ap tiro kotar phub win witsral. Un tiri phub anell jaake bud djob win, te well tut budeder har doha maro. Un tire viechen well doha senlepen te chal ap i buchlo senelo them.

²⁴Un kol grumja un burike[33], kai ap i hachetikri phub budrenn, kolla chan latcho chapen dran djoba, hoi khetne lino lenge glan tchiddo was.

²⁵Un an ko tsiro, kai o baro marepen hi, un i sorele khera khetne phagenn, nashenn panja, tikne un bare, o pralstuno themestar un ap haki berga tele.

²⁶An ko tsiro, kai pandell o baro Dewel i pandepen trul o dukepen peskre menshendar, hoi job len das, un krell lengro nasselo un ratlo mass pale sasto, hi o tchon jaake sorelo har o kham. Un o kham hi efta kope sorleder har kanna.

²⁷Dikenn, o baro Dewel wella fun dural. Leskri choli hi baro, un i pesso jagakro ducho well dran leskro nak. Pherdi choli hi leskro rakepen. un leskri tchip hi har i jag hoi lauter pre chatchrell.

²⁸Un leskro ducho hi jaake sorelo har i pani, hoi sorjah nashell, un hoi i mensheske bis pash i meen djala. Job lell i natsjone un witsrell len trujel, un trissell len, bis te gar bud lendar pral atchenn. Un job tchiwell saster an lengre muja, har te wans le graja, un tradell len koleha kate te kote.

²⁹Tumer, o Debleskre menshe, giwenna gilja, har pash i baro chapen an i rat, kai sharenn o Debles un giwenn leske. Tumer wenn jaake bachtelo, har te djans bashepah pre ap i berga o baro Deblestar, kai ap o Israeleskri rig hi.

³⁰Palle mukell o baro Dewel peskri bari soreli gole te shunell, un i menshe dikenna, har leskri mussi tele dell an i choli. Kote hi jag, hoi trul peste chal, un baro sorelo brishin, un i sorelo phurdepen un brishineskre barra.

³¹I Assirja lenn bari traash, te shunenn le o baro Debleskro rakepen, un dikenn, te dell lo len peskro kashteha.

³²Un pash haki dap, hoi o baro Dewel ko kashteha ap lende tele dell, dell bashepen ap i tikne pauke un harfe. Jaake dell lo len trad un kurell pes lentsa an o kurepen.

³³I rah tsiro hi i chatchepaskri platsa kerdo, dur tele djal li un buchles hi li. Ninna o baro rajeske hi li kerdo. Jag hi koi un bud kashta chatchepaske. Un o ducho o baro Deblestar phurdell soreles koi pre, un krell i jag, hoi lauter pre chatchrella.