Read O Debleskro Drom - I Bibla an o Romano Rakepen 2021 Jesaja 32 Bible Online

Jesaja 32 - O Debleskro Drom - I Bibla an o Romano Rakepen 2021 bible

Jesaja 32

¹Sik well i baro rai, kai krell halauter an o tchatchepen, un i pralstune pral o them denn hakenes peskro tchatchepen.

²Un hakeno lendar hi har i kheer, kai jek nai khatrell pes glan i baro phurdepen, un glan i baro sorelo brishin. Awa, jon hi har i panja an i mulo them, un har i baro bar pal koleste jek pes khatrell, te chatchell o kham tele an i tato them.

³Palle nai dikenn halauter pale mishto. Un kolla, kai nai shunenn, krenn pengre kanda pre.

⁴Un kolla, kai rakran gar pengro djijeha glan te krenn le tchomone, jon dikenn kanna dren, hoi mishto un gar mishto hi. Un kolla, kai kek lab win anan, rakrenn pale mishto, un i laba nashenn har pani dran lengro mui.

⁵I dinelo well gar buder kharedo ‘baro mursh’, witar gar well ap i chocheno penlo ‘tchatchepaskro mursh’.

⁶Ko dinelo mensho rakrell dinlepen. Un an leskro dji hi djunglepen. Job rakrell dui tchipjentsa, un kowa, hoi lo pral o baro Debleste penell, hi gar tchatcho. Kolen, kai bokenna, dell lo tchi te chal, un kolen, kai trush hi, mukell lo gar te pijell.

⁷O chocheno djal chochene dromma. Tchilatcho koowa lell lo peske glan, un leskro chochepah anell lo doosh ap i tchorwelende, ninna te hi kolla an o tchatchepen.

⁸Ko pralstuno, kai hi an o tchatchepen tardo, lell peske tchatcho koowa glan. un mukell gar tele, te krell lo kowa ninna.

⁹Shunenn mishto, tumer djuwja, kai tumenge kek shero krenn pral kowa, hoi wella! Tumer tcha, kai dikenn kokres ap tumende, krenn tumare kanda pre un shunenn, hoi me rakrau!

¹⁰An jek bersh trissenn tumer i darjatar, tumer, kai kanna patsenn, te djal lauter mishto tumenge. Kek moljakre drake nai anenn dren. Un tchi wawar was baro, te nai lenn les khetne un anenn les dren.

¹¹Trissenn, tumer djuwja, kai tumenge kek shero krenn, trissenn i darjatar, tumer, kai dikenn kokres ap tumende! Riwenn tumare ripja win, un tchiwenn i gono trul tumende!

¹²Te dikenn tumer, hoi was dran i latchi phub un dran i shukar drakengre ruka, denn tumare wasta khetne pral o shero un rowenn!

¹³Ap i hachetikri phub mire menshendar wenn subjengre burra un subjengro senlepen baro. Rowenn ninna trul i khera, kai pherdo sapen his an ko bachtelo foro.

¹⁴An o rajeskro kheer well kek buder. Muklo well o foro, kai jaake bud menshe trujel nashenn. I sorele barrengre khera un o turmo, kai pral an o foro tardo hi, perenn khetne. Un mank lende djiwenn diwje burike[34] i rah tsireske, un bakre un grumja chan kote.

¹⁵Jaake atchell kowa bis an ko tsiro, kai tchorell o Dewel peskro ducho pral mende win. Palle well o mulo them i latcho them, kai jaake bud djob tardo hi, te dikell win har i weesh.

¹⁶Un an o tselo them djiwenn le pal o Debleskre tchatchepaskre laba, un an o mulo tato them har an o latcho them krenn le, hoi tchatcho hi.

¹⁷Un kote, kai o tchatchepen khere hi, un i menshe pal o Debleskre tchatchepaskre laba djiwenn, kote hi kek kurepen un kek tchingepen. Un kekes hunte well daar. Jaake atchell kowa hako tsireske.

¹⁸Palle djiwenn mire menshe an i them, kai kek kurepen hi, an khera, kai hunte well len kek daar, te krell jek lenge tchomone, un ap platse, kai nai atchenn le, un kek tradell len krik.

¹⁹Ninna te denn brishineskre barra o weesh paash, un o foro djal tele,

²⁰har bachtele nai wenn tumer, kai nai witsrenn tumaro djob win pash hake panja, un nai mukenn tumare grumja un burike kote djan un chan, kai le kamenn.