Read O Debleskro Drom - I Bibla an o Romano Rakepen 2021 Jesaja 33 Bible Online

Jesaja 33 - O Debleskro Drom - I Bibla an o Romano Rakepen 2021 bible

Jesaja 33

¹Djungeles djal tuke, kai tu lauter khetne dal, un kokres wal gar khetne dino. Djungeles djal tuke, tu phukepaskro, ap koleste kek phukras. Pal kowa, kai dal halauter khetne, weh tu ninna khetne dino. Pal kowa, kai phukral ap hakeneste, phukrenn le ap tute ninna.

²Baro Dewel, ab latches menge! Ap tute dikah. De men soor hako diwes! An ko pharo tsiro le men win dran i bibacht!

³I menshe dran wawar themma nashenn penge, te shunenn le tiri gole. Te steh tu pre an tiri soor, wenn le krik tradedo ap hake rigja.

⁴Palle perah pral kowa, hoi le tchiddo mukan, har stepangre perenn pral o senlepen, awa, har bud stepangre wenna un halauter pre chana.

⁵Sharedo pral halauter hi o baro Dewel. Pral an o bolepen djiwell lo. Un ap i berga Zion krell job o tchatchepen win, te lell hakeno peskro tchatchepen.

⁶Un tumer menshe an Jerusalem, tumenge well i tsiro, kai hunte darenn tchi. Bud bacht un goswepen well tumenge. Tumer djinenn, hoi tumenge mishto un gar mishto hi, un djiwenn o baro Debleha. Job hi tumaro bareder brawlepen.

⁷Shunenn, sorele mursha denn bari gole, un kol bitchepangre, kai bitchedo wan, te penenn le, te hi o kurepen win, kolla rowenn soreles.

⁸I dromma hi wi-meredo, un kek djal buder gar koi. Kolla, kai win kran, te rikrenn le khetne, rikrenn gar pengro lab. Un ap kolende, kai koi pashel his, har kowa win kerdo was, well gar shunlo. I menshengro djipen hi lenge tchi moldo.

⁹Ninna o them rowell un nashrell peskri soor. I ruka ap i berge Libanon ladjenn pen un merenn tele. O shukar telstuno them Sharon dikell win har i diwjo truk them. Un i ruka ap i berge Bashan un Karmel witsrenn pengre patria tele.

¹⁰“Kanna kamau me pre te stell”, penell o baro Dewel. “Kanna hadau man un sikrau miri soor.”

¹¹Hoi tumenge an o shero trujel djal, hi phuss. Hoi koi pashel win well, hi khass. Tumari choli hi har i jag, hoi tumen kokres pre chal.

¹²Kol menshe an wawar themma wenn chatchedo, te atchell tchi har parni jagakri tchik. Har subjengre burra, hoi tele dino wan, wenn le chatchedo an i jag.

¹³Tumer, kai dur krik han, un tumer kai gar jaake dur han, shunenn, hoi me krom un haiwenn hawi soor man hi!

¹⁴Ap i berga Zion lenn kolla traash, kai doosh ap pende hi. Halauter trissenna, kai o Debles bistran, un penenn kanna: Kek mendar nai atchell tardo pash i jag, hoi lauter pre chatchrell. Kek mendar nai rikrell kowa win pash koi jag, hoi chatchell hako tsiro har koi jag ap o Debleskri chatchepaskri.

¹⁵Kolla, kai an o tchatchepen tardo hi, un rakrenn, hoi tchatcho hi; kolla, kai kekeske chochepah lowe tele lenn, te wenn le brawelo, un tserdenn pengre wasta pale, te kamell jek len lowe te dell, te anenn le chochepen pre; kolla, kai shunenn gar ap kolende, kai kamenn jekes te marell, un kolla, kai djan gar kolentsa, kai o tchilatchepen krenn,

¹⁶sawe menshe djiwenn palle an o pralstunepen, an i berge hi lengro khatepen. Un len hi doha chapen un pipen.

¹⁷Tire jaka dikenn o baro rajes an peskro tselo shukapen. Tu dikeh i buchlo them.

¹⁸Kowa, hoi glan kau tsiro tuke traash kras, well tut an o shero, un tu putcheh tutar: Kai hi kol tchinepangre[35], kai mendar lowe lan? Kai hi kol pralstune, kolenge rup ap i waga hunte tchiwam? Kai hi kowa, kai pal dikas, har bud turme koi hi?

¹⁹Kol pre-phurde menshen dikeh tu gar buder, kolengro rakepen gar haiwal, kol laba, kolendar gar djinal, hoi kamenn le te penell.

²⁰Dik ap ko foro Zion, kai mer khetne wah ap i bare diwessa. Dik, har i Jerusalem i foro hi, kai djiwenn i menshe kek darjah. Ko foro hi har i plachteno kheer, hoi buder gar tele phagedo well. Kol saster, hoi les rikrenn, wenn gar buder win tserdedo, un lengre shelle djan gar buder paash.

²¹Kote hi o baro Dewel soreles pash mende. Job hi maro tchatchepaskro rai, un kowa, kai menge glan djal, awa, maro baro rai, kai men dran o merepen win lell. Un o foro hi tchiddo pash buchle lengste panja. Un kek bero[36] ulerell ap lende. Un kek kurepaskro shiffo ulerell ap lende trujel.

²³Te well jek shiffo, palle hi lengre pesse shelle gar soreles pandlo, un nai rikrenn ko mashkralstuno pesso kasht gar. Un kol plachte hi gar buchles kerdo. Palle wenn kolla, kai pash o pani djiwenn un lenn, hoi le hatsenn. Ninna kolla, kai bango djan, hidjrenn tchomone krik, — jaake bud hi koi.

²⁴Un kek mensho, kai kote djiwell, penell buder: “An mande hi kek soor.” Un kol menshe, kai an kau foro djiwenn, kolenge hi pengri phagi krik lino.