Read O Debleskro Drom - I Bibla an o Romano Rakepen 2021 Jesaja 39 Bible Online

Jesaja 39 - O Debleskro Drom - I Bibla an o Romano Rakepen 2021 bible

Jesaja 39

¹O baro rai pral o them Babilonia, o Merodach-Baladan, koleskro dad o Baladan hi, shunas, kai o Hiskija nasselo his un pale sasto was. Un job bitchras leske i liil un kutch koowa.

²Un o Hiskija his bachtelo pral i bitchepangre, un sikras lende peskro tselo brawlepen, rup, sonakai, sungepaskro koowa, latcho djet, un ko kheer, kai kol tsele kurepaskre koola dren hi, un leskro tselo kutch koowa. Tchi his an leskro kheer un an leskro them, hoi lo lenge gar sikras.

³Kote was o Debleskro rakepaskro Jesaja pash o rajeste Hiskija un putchas lestar: “Hoi penan kal mursha? Un hawo themestar wan le pash tute?” O Hiskija penas: “Jon wan dran i dur them kate pash mande, dran o them Babilonia.”

⁴Un job putchas: “Hoi dikan le an tiro kheer?” O Hiskija penas: “Jon dikan halauter, hoi an miro kheer hi. Un tchi dran miro brawlepen hi koi, hoi me len gar mukom te dikell.”

⁵Koi penas o Jesaja ap o Hiskija: “Shun, hoi penell o baro Dewel, ko rai pral o bolepen un i phub:

⁶Ko tsiro wella, kai halauter an o them Babilonia anlo wella, hoi an tiro kheer hi, un hoi tire phure khetne tchiwan bis ap kau diwes. Un tchi atchell kate. Kowa penell o baro Dewel.

⁷Ninna tire tchawendar, kai tutar wenna, wenn line un wenn budepangre an o kheer o baro rajestar pral o them Babilonia.”

⁸Kote penas o Hiskija ap o Jesaja: “Ko lab o baro Deblestar hi mishto, hoi tu rakral.” O Hiskija penas peske: “Mange hi mishto, te hi kek kurepen un marepen an mire diwessa.”