Read O Debleskro Drom - I Bibla an o Romano Rakepen 2021 Jesaja 41 Bible Online

Jesaja 41 - O Debleskro Drom - I Bibla an o Romano Rakepen 2021 bible

Jesaja 41

¹O Dewel penell ap i menshende an dur themma: Atchenn, un shunenn ap mande! Awa, ap kolende an wawar themma penell lo: Lenn tumen khetne un awenn pash mande! Palle nai rakrenn. Mukenn men khetne o tchatchepen win te krell!

²Koon das i rajes gole, te well lo fun kotar, kai o kham pre djal? Ko rai hi sorleder har i wawar, kai lo ninna djal. O Dewel dell leste i wawar themma tel leskre herja, un krell, te perenn lengre bare raja glan leste tele. Un leskro charo tradell len krik har patria. Un glan leskro bogo hi le har phuss, hoi i ducho krik phurdell.

³Job lell len palla, un kek taprell les nai, jaake sik nashell lo.

⁴Koon hi kowa, kai kras kowa lauter? Koon dell i menshen gole un penell, hoi lentsa djala? Me hom kowa, o baro Dewel; glan hake tsirja homs koi, un hom gomme koi, te wenn i palstune diwessa.

⁵Kolla, kai djiwenn an dur themma, dikan, hoi krom, un daran. I tsele menshe ap i phub trissan i darjatar. Jon kran pen ap o drom un wan khetne.

⁶Jek rikrell pash o wawareste, un penell ap peskro phraleste: Ab soreles!

⁷O budepaskro, kai kras i figura, penell ap koleste, kai tchiwell sonakai trul late: Ko kral tu mishto! Un kowa, kai das o sonakai sano, penell ap koleste, kai kol kotja khetne tchiwas: Hi mishto jaake! Ko rikrell. Un jon denn saster an koi figura, te atchell li soreles tardo.

⁸Tu, Israel, hal miro budepaskro, tu hal o Jakob, koles mange win rodom, tu weh o Abrahamestar, kai miro maal hi.

⁹Tu hal kowa, koles win lom dran i palstune themma ap kai phub. Fun dural dom tut gole un penom ap tute: Miro budepaskro hal tu, tut rodom win, un tchiwom tut gar ap i rig.

¹⁰Ma dare! Me hom tuha! Ma dik darenes! Me hom tiro Dewel! Me krau tut soreles, me wau ap tiri rig, awa, me rikrau tut miri tchatchi mussjah, hoi krell tut sorleder har i wawar.

¹¹Dik, ladj well ap lauterende, kai hi chojedo tuha, un jon wenn sapaske i wawarenge. Un kolla, kai kurenn pen tuha, hi sik buder gar koi. Tchi atchell lendar.

¹²Tu rodeh len palle, un nai hatseh len gar. Kol mursha, kai pen tuha tchingrenn, har tchi hi le. Un har wans le gar koi, wenn kol mursha, kai kuran pen tuha.

¹³Me, o baro Dewel, hom tiro Dewel, un taprau tiro tchatcho wast, un penau tuke: Ma dare! Me hom ap tiri rig!

¹⁴Ma dare, tu kirmo Jakob, tu djuw Israel! Me, rikrau pash tute, me, o baro Dewel. Kowa, kai ginas tut win dran o wawareskro wast, hom me, o Israeleskro tchatcho Dewel.

¹⁵Jaake har dell i hacho o djob win peskro tchinepaskro wurdineha, jaake krau tutar i newo tchinepaskro wurdin, koles sasterne danda hi har tchurja, te dess i berge khetne, te wenn le tchik, un i tikne berge har phuss, hoi i ducho krik phurdell.

¹⁶Tu witsreh len pre, un i ducho hidjrell len krik, un i phurdepen phurdell len kate te kote. Palle weh bachtelo pral tiro baro Debleste, un shareh tut tiro Debleha, kai o Israeleskro tchatcho Dewel hi.

¹⁷Kolla, kai tchorwele hi, un kolen gar doha hi djipaske, rodenn pal pani, un dell kek. Un len hi bari trush. Me, o baro Dewel, shunau ap lende, me, o Israeleskro Dewel, mukau len gar.

¹⁸Me mukau pani i berge tele te nashell, un pani dran i phub te well an o telstuno them. Me krau o mulo them te well lestar i them, kai panja nashenna, un dran ko truk them krau i panjeskro them.

¹⁹An o mulo tato them mukau ruka bares te well: zedertikre ruka, akatstikre ruka, mirtetikre ruka un djeteskre ruka. Un o diwjo truk them well pherde subjengre ruka un wawar ruka.

²⁰Kowa well jaake, te dikenn i menshe un haiwenn, un dikenn dren un djinenn: Dran i soor o baro Deblestar was kowa jaake. Awa, o Israeleskro tchatcho Dewel kras kawa halauter.

²¹O baro Dewel, ko rai pral o Israel, penell ap i menshende an wawar themma: Awenn glan un anenn tumaro koowa glan, pral koleste kamenn mantsa te tchingrell. Anenn kowa glan, koleha tumer kamenn te sikrell, te hi tumen tchatcho!

²²Anenn tumare deblen, te penenn le menge, hoi wella an ko tsiro, hoi wella. Putchenn lendar, hoi penan le glan-wi an o phuro tsiro, te dikas, te was kowa jaake. Te nai krenn le kowa gar, mukenn men kowa te shunell, hoi gomme well!

²³Awa, kol debla mu penenn menge, hoi pal kawa well, jaake te nai dikas: Jon hi debla! Penenn lenge, te krenn le tchomone, nai well i latcho koowa, nai well i tchilatcho koowa, jaake te atchell menge o rakepen krik, un mer halauter trashas.

²⁴Djinenn, kowa nai krenn le gar! Kol debla hi tchi-moldo un nai krenn tchi. Koon len peske win rodell, krell i pale-tchiddo koowa glan o Debleste.

²⁵Me dom i rajes gole, te well lo peskre lurdentsa fun kotar, kai o kham gar diklo well. Un job was dran peskro them, hoi kote hi, kai o kham pre djala. Un job dell gole ap mande, un stakrell kol wawar bare rajen khetne, har te wans le tchik. un krell lentsa har ko mursh, kai pirja dran tchik chatchell, un glan kowa peskre pirentsa ap ko tchik stakrell.

²⁶Koon tumendar penas kowa glan-wi, jaake te nai djinams kawa? Koon tumendar rakras kolestar glan i tsiro, jaake te nai penams: Tchatcho hi! Kek tumendar hi koi, kai kowa glan-wi penas, kek, kai rakras kolestar. Kekestar shunam, kai rakras sawe laba.

²⁷Me homs o glanstuno, kai penom ap i menshende ap i berga Zion: Dikenn, kote wenn le. Un me bitchrom i bitchepaskres an o foro Jerusalem, te penell lo lenge kal laba.

²⁸Har dikom man trujel, te dikap jek dewel tumendar, hoi nai kras kowa, hatsom kek. Kek his koi, kai nai penell mange, hoi te krap; kek, koles me nai putchoms, un job les mange nai penals!

²⁹Jon halauter hi chochene, un nai krenn tchi. Un i figure lendar hi gar budeder moldo har i ducho.