Read O Debleskro Drom - I Bibla an o Romano Rakepen 2021 Jesaja 42 Bible Online

Jesaja 42 - O Debleskro Drom - I Bibla an o Romano Rakepen 2021 bible

Jesaja 42

¹O baro Dewel penell: Ake, miro budepaskro; les hi miro wast. Me rikrau les, un rodom les mange win, un hom bachtelo pral leste. Miro ducho tchiwom ap leste, te anell lo miro tchatchepen pash i menshende an i tsele themma.

²Job dell gar gole, un krell kek bare laba, un leskro rakepen well gar shunlo an i dromma.

³I an-phagedo shilftikro khass, phagell lo gar tele, un i momeli hoi gomme i tikni jagah chatchell, koja krell lo gar win. Tchatchepah, job krell, te lell hakeno peskro tchatchepen.

⁴Leske kokres djal gar i soor krik, un job phagell witar gar khetne, bis te kras lo, te djiwenn i menshe ap i tseli phub pal o tchatchepen. Un i menshe an dur themma dikenn ap leste, te sikrell lo len peskro drom.

⁵O baro Dewel hi maro rai, kowa, kai o bolepen kras, un har i plachta buchles kras. Ninna i phub kras lo, un lauter hoi li win anell. Un i menshen ap late dell lo o ducho, un djipen kolende, kai ap late djiwenn. Job penell:

⁶Me, o baro Dewel, dom tut gole, te aness o tchatchepen pash i menshende. Me taprom tut pash tiro wast. Un me dau jak ap tute. Tu wess o rakepaskro, kai krell i menshentsa win, te wap lengro Dewel; un wess i menshenge an i tsele themma i momeli, hoi sikrell len o drom pash mande.

⁷Tu kress i korelenge i jaka pre, un less i pandlen win dran o stilepen, kai hi le beshdo an i kali rat.

⁸Me hom o baro Dewel, kowa hi miro lab. Un ko railepen, hoi mange hi, dau me kek wawares, witar gar dau i chochene deblen ko sharepen, hoi mange hi.

⁹Kowa, hoi glan i rah tsiro penom, kowa was. Kanna penau newo koowa glan-wi. Glan o tsiro, kai kowa wella, mukau me les tumen te shunell.

¹⁰Giwenn o baro Debleske i newi gili! Sharenn les ap i tseli phub bis an i palstune themma! Sharenn les, tumer, kai ap o baro pani ulerenn, un tumer lauter, kai an o baro pani djiwenn! Ninna tumer, kai an o panjeskre themma djiwenn, sharenn les!

¹¹Giwenn i bari goljah, tumer an i forja an i mule tate themma, un tumer menshe dran Kedar, kai an i gaba djiwenn! Giwenn bari goljah, tumer, kai an o foro Sela djiwenn! Denn gole i bachtjatar, tumer, kai pral ap i berge djiwenn!

¹²Tumer lauter, sharenn o baro Debles! Un kolenge an i panjeskre themma penenn, har baro job hi!

¹³O baro Dewel djal win an o kurepen har i sorelo mursh; un kurell pes har i kurepaskro, koleskro dji pherdo hi, te djal lo an o marepen. Soreles dell lo o kurepaskri gole, un kek darjah djal lo win ap kolende, kai kurenn pen leha.

¹⁴Job penell: I rah tsiro penom tchi, atchom pokones, un rikrom man pale. Kanna kamau gole te dell, har i djuwel, kai i ternepen lell, lau pharo ducho un dau palle bari gole.

¹⁵Dran i tsele bare un tikne berge krau i mulo them. Lengro senlepen well djelto. Kote, kai panja nashenn, well i truk them, un i sapeni phub well truk.

¹⁶Mire menshen, kai hi har korele, sikrau i drom, kolestar jon tchi djinenn. Un anau len ap dromma, kolendar jon tchi shunan. Jon djiwenn har an kali rat, un me lau o tamlepen glan lende krik. Un kol barra, hoi ap lengro drom tchiddo hi, lau krik. Kawa krau lenge, un mukau len gar.

¹⁷Kolla, kai rikrenn pen ap i chochene debla, un penenn ap kolende, hoi i menshengre wastentsa kerdo wan: ‘Tumer han mare debla’, kolla wenn pale-tchiddo un hunte ladjenn pen.

¹⁸O baro Dewel penell: Shunenn, tumer, kai shunenn nai gar! Un tumer korele, dikenn un haiwenn!

¹⁹Kek hi jaake korelo har tu, miro budepaskro Israel, kek jaake kashteno har tu, miro bitchepaskro, un kek jaake korelo har tu, miro wi-rodedo budepaskro, kai mange koi hunte wals.

²⁰Ninna te dikan tumer bud koowa, lan les gar an o dji. Ninna te his tumare kanda pre, shunan gar.

²¹O baro Dewel hi o tchatchepaskro. Doleske his leske shukar, te sikrell lo, har baro un railo leskre tchatchepaskre laba hi.

²²Hoi was dran leskre menshende? Lengro them hi wi-tchoredo un wi-randedo. Jon halauter hi tapedo, un pandlo an o stilepen. Randedo hi le, un kek hi koi, kai lell len win dran o pandepen. Tchoredo hi le, un kek hi koi, kai penell: De pale kai!

²³Koon tumendar kamell kawa peskre kandentsa te shunell? Koon kamell koi pre jak te dell an ko tsiro, hoi wella?

²⁴Koon his kowa, kai mukas o Jakobes win te randell, un das o Israeles i tchorepangren an i wasta? His kowa gar o baro Dewel? Job hi, koleske o dumo sikram un leskro drom gar djam, un ap leskre laba gar shunam.

²⁵Kote mukas lo peskri bari choli pral mende te well, un mukas men an i sorelo kurepen te well. Leskri choli his trul mende trujel har i jag, un mer haiwam kowa gar. Ninna har chatchras men leskri choli, lam kowa gar an mare djia.