Read O Debleskro Drom - I Bibla an o Romano Rakepen 2021 Jesaja 43 Bible Online

Jesaja 43 - O Debleskro Drom - I Bibla an o Romano Rakepen 2021 bible

Jesaja 43

¹Kanna penell o baro Dewel, kowa, kai tumenge, o Jakobeskre tchawenge, o djipen das, un tutar, Israel, i natsjona kras: Ma dare! Me ginom tut win! Me dom tut pash tiro lab gole, te wess mange.

²Te djah tu an o pani, me hom pash tute, te tassenn tut kol sorele panja gar. Un te djah tu an i jag, palle chatchell li tut gar, un nai krell tuke tchi.

³Me, o baro Dewel, hom tiro Dewel. Me, o Israeleskro Dewel lau tut win dran o merepen. Me dau lenge o them Egiptia, te ginap tut win. I themma Etiopia un Seba dau koi pashel.

⁴Tu hal mange jaake kutch un bud moldo, un kamau tut o tselo djijestar, te dap menshen tuke koi, un dau themma koi, te nai djiwess tu.

⁵Ma dare! Me hom tuha! Me anau kolen, kai tutar hi, khere dran i themma, kai kote hi, kai o kham pre djal, un kai o kham tele djal.

⁶Ap i rajende pral i themma, hoi hi serwes un tchatches tutar, penau: De kai! Ma rike len pale! Anenn mire tchawen un tchen fun dural, anenn len dran i palstune themma i phubjatar!

⁷Halauter te wenn khere, kai miro labeha kharedo wenn, kolen mange krom, te well miro lab baro, kolendar i natsjona krom, hoi miro hi.

⁸An kai glan mande kol menshen, kai korele hi, ninna te hi len jaka, un kolen, kai shunenn gar, ninna te hi len kanda!

⁹I menshe dran i tsele themma wan khetne. Kek kolendar penas glan-wi, hoi an o phuro tsiro was. Kek kolendar penas menge glan-wi, hoi kanna well. Mu sikrenn le men, koon lendar tchomone glan-wi penas, hoi tchatchepah jaake was, te shunas mer kowa un nai penah: Kawa hi tchatcho!

¹⁰O baro Dewel penell: Mire menshe, tumer han kolla, kai djinenn, hoi me krom; un tumer han kolla, kai mange wi-rodom, te wenn mange koi. Kanna djinenn tumer un patsenn un haiwenn, te hom me o tchatcho Dewel. Glan mande was kek wawar dewel, un pal mande well witar kek wawar dewel.

¹¹Me kokres hom o baro Dewel, un dell kek wawar har me, kai nai lell tumen win dran o merepen.

¹²Me penom glan-wi, hoi kroms; me lom tumen win dran o pandepen, jaake har penom. Kek wawar dewel mank tumende kras kowa. Kowa nai penenn tumer i wawarenge. Kowa penell o baro Dewel. Me hom o Dewel.

¹³Un kowa atchau me ninna. Kek hi koi, kai nai lell win dran miro wast, un tchiwell pes mange an o drom.

¹⁴O Israeleskro Dewel hi o baro Dewel, kai tumen dran o pandepen win lell, un penell: Tumenge, kai an o them Babilonia han, bitchrom jekes koi, te anell lo tumen, kai pandle han, win. Un kol Babilonarja, kai kanna i bachteli gole denn, rowenna palle.

¹⁵Me hom o baro Dewel, tumaro Dewel, kowa, kai dran tumende i natsjona Israel kras. Tumaro baro rai hom me.

¹⁶Kawa penell o baro Dewel, kowa, kai kras i drom an o baro pani, te nai djan mank sorele panja.

¹⁷Me hom kowa, kai mukom i wurdja un i graja win te djal, ninna bud sorele kurepangre. Khetne his le koi tchiddo, un stan buder gar pre; win chatchedo hi le har i momeli, hoi buder gar chatchell.

¹⁸Bistrenn ko koowa, hoi his! Ap kowa, hoi pal tumende hi, denn buder gar jak!

¹⁹Dik, me krau newo koowa! Kanna well kowa! Haiwenn un dikenn les gar? Awa, me krau i drom an o mulo them, un mukau bare sorele panja te nashell an o tato them.

²⁰Mire wi-rodede menshenge dau pani an o mulo them, awa, lengste sorele panja an o tato them. Doleske sharenn man i diwje vieche, ninna i diwje djukle un bare diwje tchirkle.

²¹Un mire menshe Israel, kolen mange krom, sharenn man glan i wawarende.

²²Jakob, kowa hal gar tu, kai dal pal mande gole. Israel, tu maral tut gar pal mande tele.

²³Kol bakre, hoi anal, te wenn le chatchedo, his gar mange. Un kol viechentsa, hoi mange maral, sharal man gar. Me krom tuke kek budi i djobeha, hoi mange chatchrals, un krom tut gar khino o sungepaskro koweha, hoi mange chatchrals.

²⁴Mange ginal tu gar lowenge gudlo sungepaskro khass, witar gar chatchral o viechengro thulepen, te wap tchalo. Na-a, mange kral bud budi tiri doshah. Ko tselo tchilatchepen, hoi kral, kras man khino.

²⁵Kowa hom me, kai thowau o tchilatchepen tutar tele. Me kokres hom kowa, kai nai krell les. Un bistrau koi doosh, hoi tu ap tute lal.

²⁶Pen mange, hoi krom, hoi kamal tu gar! Dikas khetne ap kowa, hoi tumer kran! Rake tu, te dikap, te hal an o tchatchepen!

²⁷Tiro phuro dad, kolendar tumer lauter wan, ninna kowa las doosh ap peste, un tire rakepangre phagan mantsa.

²⁸Doleske tchiwom tire rashajen pale. Un mukom menshen dran wawar themma pral tute well, te wess paash dino, Jakob. Un krom, te wan tumer Israelitarja praassedo.