Read O Debleskro Drom - I Bibla an o Romano Rakepen 2021 Jesaja 46 Bible Online

Jesaja 46 - O Debleskro Drom - I Bibla an o Romano Rakepen 2021 bible

Jesaja 46

¹O chocheno dewel Bel phagas khetne, un o chocheno dewel Nebo peras. Lengre figure, hoi tumer trujel hidjran, wan kanna i viechenge ap lengro dumo pandlo. Jon hunte hidjrenn len un wenn khino tel ko pharo hidjepen.

²Kal chochene debla phagenn khetne un perenn, un nai anenn gar pengre figuren win, un hunte djan pandles an i wawar them.

³Tumer dran o kheer Jakob, tumer, kai pral atchan dran o kheer Israel, shunenn ap mande, tumer, kolen rikrom jaake rah har ap i phub han. Awa, jaake rah har boldo wan, hidjrom tumen.

⁴Ninna te wan tumer phuro, atchau me kowa, kai homs; ninna te lan tumer parne balla, rikrau tumen. Me hom, kai krom tumen. Un me rikrau tumen, un hidjrau tumen, un lau tumen dran o tchilatchepen win.

⁵Konestar nai penenn tumer: “Kowa hi jaake har o Dewel?” Kek hi jaake har me! Ap koneste nai penenn: “Tu un o baro Dewel, tumer han jek har o wawar?” Kekestar nai penenn kowa.

⁶Kol menshe, kai krenn pen i chocheno dewel, lenn sonakai dran lengri possita, un tchiwenn rup ap i waga, te plaissrenn le koles, kai haiwell mishto te budrell an sonakai un rup, te krell lo kolestar i dewel lenge. Glan koleste witsrenn jon pen tele ap i phub, un mangenn les an.

⁷Jon hadenn les ap pengri phik, un hidjrenn les trujel, un tchiwenn les pale pale ap leskri platsa. Un kote hi lo tardo, un djal fun kokres gar dureder. Dell jek gole ap leste, rakrell lo gar pale, krell peskro mui gar pre, un djal gar koi, te lell lo les win dran i bibacht.

⁸Bistrenn kowa gar, tumer, kai peran o Debleskro dromestar tele! Mukenn les an tumaro dji te djal!

⁹Mukenn tumenge an o shero te djal, har an o phuro tsiro his: Me hom o Dewel, un dell kek wawar har man. Kek hi jaake har me!

¹⁰An o phuro tsiro penom me glan-wi, hoi wella. Glan rah tsiro rakrom kolestar, hoi gomme gar his. Un me penau: Kowa hoi me mange glan lom, well jaake. Un me krau lauter, hoi kamau te krell.

¹¹Fun kotar, kai o kham pre djal, dau gole i baro tchirkleste, kai mass chal, te well job. Kowa hi ko mursh, kai krell, hoi mange glan lom. Dran i dur them well lo. Kowa well jaake, har penom. Hoi mange glan lom, krau ninna.

¹²Shunenn ap mande, tumer, kai barrengre djia an tumende hi, tumer, kai patsenn, te well tumen kek tchatchepen.

¹³Me anau tumenge miro tchatchepen. Kowa hi gar dur tumendar krik. Sik lau tumen dran i bibacht win. An o foro Zion krau i menshen bachteles. un i Israelende sikrau miro railepen.