Read O Debleskro Drom - I Bibla an o Romano Rakepen 2021 Jesaja 48 Bible Online

Jesaja 48 - O Debleskro Drom - I Bibla an o Romano Rakepen 2021 bible

Jesaja 48

¹Shunenn, tumer dran o kheer Jakob, tumer, kai wenn o labeha Israel gole dino, un wenn dran o kheer Juda. Tumer denn tumen sowel pash o baro Debleste, un penenn, te mangenn o Israeleskro Debles an. An o tchatchepen un i djudjo djijeha krenn tumer kowa gar.

²Tumer kharenn tumen pal o Debleskro foro, un rikrenn tumen ap o Debleste pral o Israel. Leskro lab hi ‘baro Dewel, rai pral o bolepen un i phub’.

³An o phuro tsiro penom tumenge glan-wi, hoi wella. Dran miro mui djas kowa win. Me mukom les te shunell. Un jaake sik, har jek i jaka dell, krom kowa, un lauter was jaake, har glan-wi penom.

⁴Me djinau, te hi tumen barrengre djia, un tumare menja hi sorelo har dran saster, un tumare sherja har dran lolo saster.

⁵Doleske penom me kowa tumenge glan i rah tsiro. Un glan kowa was, mukom me les tumen te shunell, te nai penenn gar: “Miri debleskri figura kras kowa, un koi figura dran kasht un saster, hoi an-mangom, kaja penas, te well kowa jaake.”

⁶Kowa lauter shunan tumer, un dikan, kowa was jaake har penom. Kamenn tumer kowa gar dren te dikell un dureder te penell? Kanna mukau tumen newo koowa te shunell, tchomone, hoi khatedo his, un tumer gar prindjrenn.

⁷Kau koowa was kanna kerdo un gar an o phuro tsiro. Un tumer shunan tchi kolestar, te nai penenn gar: “Kau koowa, mer djinam les.”

⁸An kek tsiro shunan tumer, hoi penom, witar gar kaman kowa te djinell. Un i rah tsiro his tumare kanda pandlo mire labenge. Tchatchepah, me djinom tumaro phukepen. Un jaake rah har ap i phub han, wenn tumer kharedo: Kolla, kai kamenn tchi o Deblestar te djinell.

⁹Miri bari choli rikrau pale, te well gar djungeles rakedo pral miro lab. Un lau man phares khetne, te well miro lab gar tiknes kerdo, un te mukap tumen gar mulo te dell.

¹⁰Dik, jaake har rup an i jag tchiddo well, te wenn i djungele barra win, jaake mukom tumen an phare tsirja te well, te wenn djudjo mange.

¹¹Te rikrau man kanna pale, te dap tumen budeder dawa, palle krau les mange, awa miro labeske. Kamau gar, te well miro lab praassedo. Kamau gar, te lell i wawar o sharepen, hoi mange hi.

¹²Shun ap mande, Jakob, tu, kai kharedo weh ‘Israel’! Tu hal kowa, koles gole dom! Me kokres hom o Dewel, un atchau kowa, kai homs un hom.

¹³Mire wastentsa krom i phub, un tchiwom o bolepen buchles pral i phub. Me dom len gole, un jon his koi tardo.

¹⁴Awenn tumer lauter khetne, un shunenn! Kek tumare chochene deblendar penas kowa glan-wi: Me, o baro Dewel, rodom o Kirus win, te krell lo o themeha Babilonia, hoi kamau, un te sikrell lo miri soor ap kolende an o them Kaldea.

¹⁵Me penom kawa, awa, me dom kau murshes gole, un mukom les te well. Un kowa, hoi lo peske glan las, kowa djal ninna.

¹⁶Stakrenn glan mande, un shunenn kawa! Glan i rah tsiro penom tumenge, hoi wella. Kowa penom gar an i khatepen. Har kowa was, homs koi. Un kanna bitchras man o baro Dewel, maro rai, un das man peskro ducho.

¹⁷O baro Dewel, kowa, kai tut, Israel, win las dran o pandepen, job, o tchatcho Dewel, hi o Israeleskro Dewel un penell: Me, o baro Dewel, hom tiro Dewel, kowa, kai tute sikrell, hoi tuke mishto hi, un ap hawo drom tu hunte djas.

¹⁸Kamaus, te shunals tu ap mire laba. Palle wals jaake bud latchepen an tiro djipen, har pani an i lengsto pani hi. Un pale te pale wals bacht ap tute, jaake har o baro pani pale te pale ap o them nashell.

¹⁹Tire tchawe, kai pal tute wenn, wans jaake bud har i santa pash o baro pani. Un lengre laba merans gar win. Un kek nai tradans len krik glan mande.

²⁰Djan win dran Babilon! Sik, nashenn dran o them Kaldea! Denn win gole i bachtjatar, un penenn kawa dureder, jaake te shunenn le kowa ap i tseli phub. Penenn: O baro Dewel las peskro budepaskres, o Jakobes, win dran o pandepen!

²¹O baro Dewel anas len ap o drom an o mulo them, un jon trushan gar. Dran i baro bar mukas lo lenge pani te well. Job phagas ko bar an dui kotja, un mukas dran leste pani te nashell.

²²Kau tselo latcho koowa, hi gar i tchilatchenge, penell o baro Dewel.