Read O Debleskro Drom - I Bibla an o Romano Rakepen 2021 Jesaja 49 Bible Online

Jesaja 49 - O Debleskro Drom - I Bibla an o Romano Rakepen 2021 bible

Jesaja 49

¹Shunenn ap mande, tumer kai pash o baro pani djiwenn! Denn jak ap miro rakepen, tumer an i themma, hoi dur krik hi! Har gomme gar boldo wom, das man o baro Dewel gole, un das man miro lab.

²Job kras miro rakepen har i charo, hoi mishto tchinell, un khatras man tel peskro wast. Un job kras mandar i failo, hoi dell mishto tchurje, un rikrell man khatedo har i faile an lengri possita.

³Un job penas ap mande: Miro budepaskro hal tu, Israel, ap tute sikrau miro railepen.

⁴Mange was kowa wawartchandes glan. Un me penom: Tchatchepah, his tchitcheske koi phari budi, hoi ap mande lom. Dom tchitcheske miri tseli soor kolake. Djinau, miro tchatchepen hi pash o baro Debleste, un kowa, hoi lau koleske, hoi krom, well miro Deblestar.

⁵Kowa his o baro Dewel, kai kras man jaake, te wap leskro budepaskro, har gomme gar boldo wom. Job kamell, te anap o Jakobes pale pash leste, jaake te well o tselo Israel pash leste khetne. Un miri budi hi bud moldo an i jaka o baro Deblestar. Miro Dewel was miri soor. Kanna shunenn, hoi lo penas:

⁶Job penas: Kowa hi gar doha, te hal miro budepaskro, te tchiwess o them Israel pale pre, un aness kolen pale pash mande, kai o Jakobeskre tchawendar pral atchan. Na-a, me krau ninna, te wess i momeli i tsele natsjonenge, hoi sikrell halauterenge ap i phub, kai lau len dran o tchilatchepen win.

⁷O baro Dewel, kowa, kai o Israel dran o tchilatchepen win lell, un kokres leskro Dewel hi, job penell koleske, kai i menshe tele dikenn ap leste, un koles i menshe dran bud themma gar kamenna, un lengre raja lestar pengro budepaskro krenn, ap koleste penell o baro Dewel: Bare raja dikenn tut, un stenn pre glan tute. Un pralstune dikenn tut un witsrenn pen ap i phub glan tute, Jon dikan, kai rikrau pash tute, me, o Israeleskro Dewel, kai tut win rodom.

⁸Kawa penell o baro Dewel: Har his o tsiro mishto, shunom ab tiri gole. Har was ko diwes, kai lom tut win dran i bibacht, wom ap tiri rig. Un me dom jak ap tute. Me lom tut: — te wess i drom, kai nai wenn i menshe dran hake themma pash mande, — te tchiwess pale o them pre tardo, — te dess tu lende kol kotja them, hoi lenge hi, un kanna muklo hi,

⁹— te peness i pandlen: Djan win; un kolenge, kai an i kali rat hi: Awenn win! Palle hi le har bakre, hoi chapen hatsenn pash o drom. Un ap o pralstuno them hatsenn le senlepen.

¹⁰Jon bokenna gar un trushenna witar gar. Un o tato ducho dran o mulo them dukrell len gar, witar gar dell len o kham tchurje. Me, kai man i baro dji lenge hi, sikrau lenge o drom, un anau len pash shila pani, te nai pijenn le.

¹¹Mank mire tsele berge krau i drom, un mire dromma djan pral lende wergel.

¹²Dikenn, mire menshe wenn fun dural: dran i themma, hoi serwes[51] un tchatches[52] tchiddo hi, un fun kotar, kai o kham tele djal.

¹³De gole i bachtjatar, tu bolepen! Ab bachtelo, tu phub! Giwenn, tumer berge! O baro Dewel khossas i swa peskre menshendar tele, un kras peskro dji kolenge pre, kai tele rikedo wan.

¹⁴I menshe dran Zion penenn: O baro Dewel mukas men. Maro rai bistras men.

¹⁵Bistrell i djuwel peskro ternepen? Hi lat gar i kamlo dji leske, hoi joi ap i phub anas? Un ninna te bistrals koja les nai, me bistrau tut gar.

¹⁶Dik, an mire dui wasta tchinom me tut dren, Jerusalem! I massurja trul tute hi hako tsiro glan mire jaka.

¹⁷Sik wenn kolla pash tute, kai tut pale pre tchiwenn. Un kolla, kai tut tele phagan un paash dan, nashenn penge.

¹⁸Dik, hoi an i themma trul tute djal! Kol menshe wan khetne, te wenn le pash tute! Me dau man sowel pash miro djipen, penell o baro Dewel: Jon hi tuke har i sonakaskri werkli, hoi trul tiri meen tchiweh, un har i shukar pereskri dori, hoi i tchai trul late pandell, te hi lat bijab.

¹⁹Tchatchepah, i gaba un forja an tiro them wan paash dino un tele chatchedo. Un buder gar bud menshe djiwenn koi. Ko tsiro well, kai hi kau them gar bares doha kol bud menshenge, kai djiwenn kote. Un kolla, kai kaman tut pre te chal, atchenn dur krik tutar.

²⁰Un kol tchawe, kai tuke boldo wan, har kek an tiro foro djiwas, kolla denn palle gole glan tire jaka un penenn: Kai platsa hi gar lengsto un buchlo doha. Kre menge budeder platsa!

²¹Palle putcheh tutar an tiro dji: Koon anas mange jaake bud tchawen ap i phub? Me homs muklo, kek tchawentsa, kokres un krik tradedo. Un kolla kote, koon tserdas len bares? Atchom me gar kokres pral? Kai his kolla?

²²Kawa penell o baro Dewel, maro rai: Dik, me hadau miro wast un miri themeskri plachta pre, te sikrap i menshende an wawar themma, hoi te krenn le. Un palle wenn le un hidjrenn tire mursh tchawen ap i mussi pash tute, un tire tchen hidjrenn le ap pengri phik pash tute.

²³Un bare raja wenn tuke koi un lengre romja denn jak ap tire tikne tchawende. Un bare raja witsrenn pen glan tute ap i phub, un tchumrenn i tchik tire pirendar. Kote haiweh tu palle, te hom me o baro Dewel. Un kolla, kai dikenn ap mande, te wap ap lengri rig, dikenn gar tchitcheske ap mande.

²⁴Nai lell jek i sorelo mursheske kolen dran leskro wast, kolen job peske randas? Nai tserdell jek i pandlen dran o wast i sorelo rajestar?

²⁵Kawa hi kowa, hoi well, penell o baro Dewel: Ninna ko sorelo mursheske wenn leskre pandlen krik lino. Un kolen, hoi ko sorelo rai randas, wenn leske krik tserdedo. Kolla, kai kurenn pen tuha, kolentsa kurau me man, un tire tchawen lau dran lengre wasta win.

²⁶Kolla, kai chan tut, kolla hunte chan pengro mass un hunte pijenn pengro rat, un wenn kolestar jaake mato, har te pijans le gudli mool. Palle haiwenn i tsele menshe, te hom me o baro Dewel, kowa, kai lell tut win dran o merepen, un tserdell tut win dran i tchilatche wasta, me o sorelo Dewel o Jakobestar.