Read O Debleskro Drom - I Bibla an o Romano Rakepen 2021 Jesaja 52 Bible Online

Jesaja 52 - O Debleskro Drom - I Bibla an o Romano Rakepen 2021 bible

Jesaja 52

¹Ste pre! Ste pre, Zion! Ab pale soreles! Tchip tire kutch rajengre ripja ap tute, Jerusalem, tu Debleskro foro! Tchatchepah, kek tsiro well kanna buder, kai djal jek an tute dren, hoi gar tchinlo was ap peskro mass, witar gar jek, kai glan mande pale-tchiddo hi.

²Jerusalem, ste pre dran i tchik! Trissle koi tchik tele! Un besh tut ap i rajeskri beshepaskri! Witse kol shelle tele, hoi trul tiri meen pandlo hi, tu stildi tchai Zion!

³Kawa penell o baro Dewel: Tchitcheske wan tumer bikedo, un gar lowenge wenn tumer pale win ginlo.

⁴Kawa penell o baro Dewel, maro rai: Glan i rah tsiro djan mire menshe an o them Egiptia, te atchenn le kote i tsiro. Un ninna kolla dran o them Assur rikran len tele un kran lenge tchitcheske i pharo djipen.

⁵Hoi krap me kate? penell o baro Dewel. Mire menshe wan tchitcheske pandles krik lino. Kolla, kai kran pen rai pral lende, sanenn un phurdenn pen pre, penell o baro Dewel. Un o tselo diwes rikrenn le man dineleske.

⁶Doleske well i diwes, kai mukau me mire menshen te djinell, koon hom. Un palle haiwenn le, me hom kowa, kai penell: Kate hom!

⁷Har shukar hi, te well kowa pral i berge, kai penell menge latcho newo koowa, un penell: Hi buder kek kurepen. I latcho tsiro was. Tumer han buder gar pandlo. Un ap mende an Zion penell lo: Tiro Dewel hi o baro rai!

⁸Shunenn, hoi kol mursha gole denn, kai jak denn ap o foro! Jon halauter denn gole i bachtjatar. Pengre jakentsa dikenn le, har o baro Dewel an o foro Zion pale well.

⁹Giwenn khetne i bachtjatar, tumer dran o khetne phagedo foro Jerusalem! O baro Dewel las pes peskre menshenge an, un krell o foro Jerusalem newes.

¹⁰Glan i jaka i menshendar an i tsele themma sikrell o baro Dewel peskri soor, kolah job peskre menshen win lell dran o pandepen. Ap i tseli phub dikenn le, har maro Dewel peskre menshen khere anell.

¹¹Djan win! Djan win! Djan kotar win, un taprenn tchi an, hoi pale-tchiddo hi! Tumer rashaja, kai hidjrenn o baro Debleskro koowa, djan dran Babilonia win, un thowenn tumen jaake har glan tchinlo hi, te han djudjo glan o Debleste!

¹²Kau kopo hunte nashenn gar sik kotar win, witar gar jaake har wans ap o naashepen. O baro Dewel djal tumenge glan win, un dell pal tumende jak, job, o Dewel pral o Israel.

¹³Dik, kowa, hoi miro budepaskro krell, djal leske mishto. Job well sharedo un bares kerdo, un well dur pral tardo.

¹⁴His i tsiro, kai dikan bud menshe darenes ap leste, jaake dino dikas lo win, te dikas lo buder gar har i mensho win, awa, djungleder dino har hako wawar mursh.

¹⁵Un kanna dikenn bud menshe dran wawar themma bare jakentsa ap leste, un lengre rajenge atchell o rakepen krik. Kowa, hoi lenge gar dren ginlo was, dikenn le kanna. Un kolestar jon tchi shunan, kowa dikenn le un haiwenn les.