Read O Debleskro Drom - I Bibla an o Romano Rakepen 2021 Jesaja 54 Bible Online

Jesaja 54 - O Debleskro Drom - I Bibla an o Romano Rakepen 2021 bible

Jesaja 54

¹Jerusalem, tu hal har i djuwel, kai kek tchawe nai lell, kanna gib, tu, kai kek tchawes ap i phub anal, ab bachtelo, gib un de gole i bachtjatar! O baro Dewel penell tuke: Tu, koi mukli djuwel, tut wenn budeder tchawe har kolat, kai romedino hi.

²Kre tiro plachteno kheer buchlo! Tserde kol plachte ap i rigja dureder! Ab gar tchindo! Kre i shelle lengsto, un de kol saster, hoi rikrenn len, soreles an i phub dren!

³Tiri familja well bareder un bareder un len hunte well budeder platsa ap i tchatchi rig un ap i serwi rig. Un tire tchawe tradenn wawar menshen win, un djiwenn pale an kol forja, hoi paash dino wan.

⁴Ma dare! Tu weh gar wi-ladjedo koi tardo! Mukau kekes, te sal lo pral tute. Doleske ma ladj tut! Tu bistreh koi ladj, hoi ap tute his, har terno hals. Un ko tsiro, har tiro rom meras, well tuke buder gar an o shero.

⁵Kowa, kai tut kras, hi kanna tiro rom. ‘Baro Dewel, rai pral o bolepen un i phub’ hi leskro lab. Job ginas tut win dran o pandepen, un hi o Israeleskro tchatcho Dewel. Job well kharedo: O Dewel pral i tseli phub.

⁶Tu hal har i djuwel, kai muklo was, un kolakro dji ratell. Kanna dell tut tiro baro Dewel pash peste gole un penell: Har nai tradoms miri romjat krik, kolat win rodom, har terno homs?

⁷I tikno tsireske mukom tut. Kanna krau miro dji bares pre tuke un lau tut pale pash mande.

⁸Har miri choli pral keras, rissrom me man tutar tele i tikno tsireske. Miro latchepen tuke herell gar pre. Doleske krau miro dji tuke bares pre, penell o baro Dewel, kowa kai tut dran o pandepen win lell.

⁹Me krau kanna har an ko tsiro, kai o Noah djiwas, kai dom me man sowel, te well gar buder jaake baro pani pral i phub. Kau diwes dau man sowel, te wap gar buder chojedo ap tute, un te tchingrap gar buder tuha.

¹⁰I berge nai djan ap i rig, un i tikne berge nai perenn khetne, miro latchepen, kowa djal gar tutar, un kowa, hoi win kram, te ham mer mala, atchell tardo. Kowa penau me, o baro Dewel, kai peskro dji tuke pre kras.

¹¹Jerusalem, tu bibachtelo foro, pral koleste i baro phurdepen djas, Tut his kek, kai tire swa tele khossas! Dik, me tchiwau tut pale pre kutch barrentsa. Tire telstune barra krau dran safire.

¹²I turme ap tire massurja hi dran rubine, tire wudja dran kristallo, un tire massurja dran shukar barra, hoi bud moldo hi.

¹³O baro Dewel sikrell peskro drom tire tsele tchawende, un lenge djal mishto.

¹⁴An o tchatchepen weh tu soreles tardo. Tu hunte daress kekestar, te rikrell lo tiro djipen phares. Un tu hunte daress kek bibacht. Kaja nai well gar pash tute!

¹⁵Dik, ninna te djan le ap tute pre, well kowa gar mandar. Koon kurell pes tuha, kowa well dino un perell.

¹⁶Dik, me kokres krom koles, kai o saster budrell, un i jag tato krell, te krell lo i charo dran o saster. Un me kokres krom ko kurepaskres, kai marell ko chareha.

¹⁷Kek charo, hoi kerdo was, te dell lo tut mulo, nai dukrell tut. Un hako kopo, kai jek tchomone ap tute pre anell, nai sikreh tu, kai job chochras. Kowa krau kolenge, kai mange budrenn. Un me sikrau, te hi jon an o tchatchepen, penell o baro Dewel.