Read O Debleskro Drom - I Bibla an o Romano Rakepen 2021 Jesaja 56 Bible Online

Jesaja 56 - O Debleskro Drom - I Bibla an o Romano Rakepen 2021 bible

Jesaja 56

¹Kawa penell o baro Dewel: Djiwenn pal mire tchatchepaskre laba, un krenn, hoi tchatcho hi! Sik well ko diwes, kai lau tumen dran o tchilatchepen win, un tchiwau tumen an o tchatchepen.

²Mishto djal ko mensheske, kai djiwell jaake, un rikrell pes soreles ap mire laba: kowa, kai rikrell o Debleskro diwes dren un budrell gar ap leste; un kowa, kai rikrell peskro wast pale, te krell lo tchilatcho koowa.

³Un i wi-themari, kai djal ap o baro Debleskro drom, kowa hunte penell gar: O baro Dewel tchiwell man pale peskre menshendar. Un ko mursh, kai jaake tchinlo hi ap peskro mass, te lell lo buder kek tchawe, hunte penell gar: Me hom i mulo ruk!

⁴Leske penell o baro Dewel: Te rikreh tu o Debleskro diwes dren, un kameh kowa te krell, hoi mange mishto hi, un rikreh tut ap kol laba, hoi mire menshendar win krom,

⁵palle dau tut i bar an miro kheer, kai tiro lab dren tchinlo hi. Kowa hi feteder har tchawe un tcha. Kau lab, hoi tut dau, well an kek tsiro bistedo.

⁶Un kol wi-themarja, kai djan ap o baro Debleskro drom, un hi leske koi, un kamenn les pengro tselo djijeha, un kamenn leskre budepangre te well, hakeno, kai rikrell o Debleskro diwes dren un budrell gar ap leste, un rikrell pes ap kol laba, hoi mire menshentsa win krom,

⁷kolen anau pash miri berga, kai me djiwau, un krau len bachteles an miro kheer, kai mangenn man i menshe an. Jon nai anenn mange viechen: sawe, hoi wenn mange chatchedo ap miri chatchepaskri, ninna sawe, hoi chan le glan mande. Un me dikau latches ap kowa. Miro kheer well kharedo: Kheer, kai i menshe dran hake themma o Debles an-mangenn.

⁸O baro Dewel, maro rai, kowa kai anas i krik-tradede Israelitarjen pale an lengro them, penell: Me anau gomme budeder khetne pash kolende, kai khetne anlo wan.

⁹Awenn kai, tumer lurde dran wawar themma, un perenn pral mire menshende har diwje vieche un chan!

¹⁰Kol mursha, kai hunte jak denn ap mire menshende, hi korelo, un jon halauter haiwenn tchi, un hi har djukle, kai kek gole denn. Jon hi koi tchiddo un dikenn suni, un kamenn te sowell.

¹¹Bud chapen kamenn le, un lenn gar doha. Jaake hi kolla, kai ap mire menshende jak denn. Jon haiwenn tchi, hakeno dikell ap peste kokres, un rodell, har nai anell lo peskre lowe khetne.

¹²Jon denn gole: Awenn kai, me kamau mool te anell, te pijas men mates! Un taissar krah har kau diwes, un gomme shukeder!