Read O Debleskro Drom - I Bibla an o Romano Rakepen 2021 Jesaja 59 Bible Online

Jesaja 59 - O Debleskro Drom - I Bibla an o Romano Rakepen 2021 bible

Jesaja 59

¹Dik, o baro Debleskri mussi hi lengsto doha, te nai lell lo tumen dran o tchilatchepen win! Un leskre kanda hi gar pandlo, te nai shunell lo gar.

²Na-a, tumari doosh, hoi ap tumende lan, hi tardo mank tumende un tumaro Debleste. Dran ko tchilatchepen, hoi kran, khatrell lo peskre jaka tumendar, un doleske shunell job gar.

³I wawarengro rat kras tumare wasta ratlo, un koi doosh, hoi ap tumende lan, kras tumare gushte tchiklo. Tumaro mui rakrell chochepen, un tumari tchip tchilatchepen.

⁴Kekeske tumendar, kai djal glan o tchatchepaskro mursheste, djal trul o tchatchepen. Un kek, kai anell tchomone ap i wawareste pre, penell o tchatchepen. Pash tumende hi jaake: Ap kowa, hoi tchi moldo hi, rikrenn tumen, un rakrenn o chochepen. Kowa, hoi an tumare sherja trujel djal, hi har nai chochenn un dukrenn i wawaren. Ko tchilatcho koowa, hoi win well, anell o merepen,

⁵jaake har tikne tchilatche sapa, kai dran lengre jare wenn, un har koi netsa, hoi i spinna krell. Kowa, kai kol sapengre jare chala, hunte merell. Te stakrell lo i jaro khetne, well i sap win.

⁶Kowa, hoi tumer win krenn, hi tchitcheske, hi gar budeder moldo har i ripen kerdo dran i netsa, hoi i spinna kras, un koleha nai tchakreh tchi tele. Kowa hoi tumer krenn, hi chochepen. Tumare wastentsa dukenn un marenn tumer.

⁷Tumare herja nashenna pal o tchilatchepen, un hi sik, te mukenn le kolen te ratell, kai kek tchilatchepen kran. Kowa, hoi mukenn tumenge an o shero te djal, hi har nai chochenn un dukrenn i wawaren. Ap tumare dromma atchell phagedo djipen pale.

⁸Tumenge hi tchi moldo, te djal i wawarenge mishto. Un o tchatchepen kamenn gar te krell. Bange dromma djan tumer. Sawe menshe perenn an i bibacht.

⁹Doleske dell men o Dewel gar maro tchatchepen, un leskro latchepen well gar ap mende. Hoske bitchrell lo menge kek momeli? Lauter, hoi dikah, hi kali rat. Kaana djal menge o kham pre? An o pessester kalepen nashah mer trujel.

¹⁰Har korele taprah pal i wanta, har sawe, kai dikenn gar, kai le djan. Mashkral o diwes perah har te wals rati. Mank i saste ham jaake har te wams mule.

¹¹Har pandle diwje vieche dah gole i dukatar, un rowah har i taube. Mare djia nashenn pal ko diwes, kai well menge o Dewel ap i rig, un lell men win dran i tchilatche wasta. Job well gar, un tchi djala.

¹²Baro Dewel, bud kope peram tutar tele. Mari doosh, hoi mer ap mende lam, sikrell har tchilatcho ham. Ko tchilatchepen, hoi kram, hi glan mare jaka, un mer djinah, hawo djunglepen ap tute kram:

¹³Mer phagam maro baro Debleha, djiwam har te prindjrams les gar, un peram lestar tele. Kram i wawaren tiknes maro rakepah, un phukram ap lende. Lam men chochepen glan un rakram chochepen.

¹⁴Mer dam i wawaren gar lengro tchatchepen, un bud kope rakram gar o tchatchepen pral lende win. Ap i parepaskri platsa ginam un bikram o chochepah, un tchatcho rakepen hatseh kote gar.

¹⁵Jaake meras o tchatchepen, un ko mensho, kai kamell tchi o tchilatchepastar te djinell, well win randedo. O baro Dewel dikas kowa lauter, un leske his djungeles, te dell kek tchatchepen buder.

¹⁶Un bare jakentsa dikell lo, te hi kek mursh koi, kai koi djal, te well lo kolenge ap i rig, kai tele rikedo hi. Kote was lo kokres peskri sorjah, un peskro tchatchepen was leske pash o wast.

¹⁷Un jaake har riwell i lurdo i sasterno gad an, jaake riwell job o tchatchepen an. Un jaake har i lurdo i sasterni stadi ap peskro shero tchiwell, jaake tchiwell job o kurepaskri bacht ap peste. Leskri choli hi har i plaashka ap leste, te dell lo kolende pengri phagi, kai i wawarenge tchilatchepen kran.

¹⁸Kolen dell lo pale pal kowa, hoi jon kran. Bari choljah djal lo ap lende. Ninna kolen dell job pengri phagi, kai djiwenn dur krik wergel o baro pani.

¹⁹Palle taprell i daar i menshen ap i tseli phub glan o baro Debleste un leskro railepen. Job wella har i diwjo sorelo pani hoi nashella, koles o ducho o baro Deblestar glan peste phurdell.

²⁰O baro Dewel penell: Mire menshenge an o foro Zion wau, te lap len dran o merepen win. Kolenge dran o kheer Jakob wau, kai mukan pengro tchilatcho drom.

²¹Kawa krau me lentsa win, penell o baro Dewel: Me tchiwom miro ducho ap tumende. Un mire laba, hoi penom tumenge, atchenn pash tumende. Un tumer penenn len dureder ap tumare tchawende, un jon ap pengre tchawende, un kolla ap pengre tchawende. Kowa atchella jaake kanna un hako tsireske. Kowa penau me, o baro Dewel,