Read O Debleskro Drom - I Bibla an o Romano Rakepen 2021 Jesaja 6 Bible Online

Jesaja 6 - O Debleskro Drom - I Bibla an o Romano Rakepen 2021 bible

Jesaja 6

¹An ko bersh. kai o baro rai Usija meras, kote dikom me o Debles, maro rajes, beshdo ap i bari raili beshepaskri. Un o Debleskro kheer his pherdo ko telstuno kotar leskri plaashka.

²Jagengre bolepangre[7] his pral leste tardo, hakenes lendar his shob mussja har tchirklengre mussja: dujentsa tchakran le pengre jaka, dujentsa tchakran le pengre pire un dujentsa hadan le pen an o bolepen.

³Un jek das ap o wawareste gole un penas: Latcho - un tchatcho - har kek wawar - hi o baro Dewel, ko rai pral o bolepen un i phub. I tseli phub hi pherdo leskro railepen!

⁴Koi gole lendar mukas i telstune barra o kherestar te trissell. Un o kheer his pherdo jagakro ducho.

⁵Un me penom: “Kanna hunte merap! Me hom i mursh, dran koleskro mui sawo rakepen djas, te nai wau me gar glan o Debleste. Un me djiwau mank menshende, dran kolengre muja ninna sawo rakepen djal. Un mire jakentsa dikom o baro rajes, les, o baro Debles, kai hi o rai pral o bolepen un i phub.”

⁶Un jek kol jagengre bolepangrendar was pash mande. Un job las i jagakri forshetta an leskro wast, un las kolah i kotar kasht, hoi chatchell, o Debleskro chatchepaskri tele.

⁷Un ko kasht, hoi chatchell, rikras lo ap miro mui, un penas: “Dik kawa was ap tiro mui, un jaake hunte djas tiri doosh tutar krik, un ko tchilatchepen, hoi tu kral, hi tutar krik lino.”

⁸Un me shunom, har o baro Dewel, maro rai putchas: “Kones bitchrap, un koon rakrell mange?” Kote penom me: “Kate hom, bitche man!”

⁹Un job penas: Dja koi, un pen ap kal menshende: Tumer shunenn un shunenn, un haiwenn tchi, un dikenn un dikenn un haiwenn gar, hoi dikan.

¹⁰Rake lentsa, ninna te pandenn le pengre djia, un krenn pengre kanda kashteno, un pengre jaka pandlo. Te dikans le pengre jakentsa, un shunans pengre kandentsa, un haiwans pengre djijentsa, mukans le pengro tchilatcho drom un wans pash mande, un me kroms len sasto.[8]

¹¹Un me putchom: “Har rah, rai?” Un job penas: “Bis te buder kek menshe an i forja djiwenn, witar kek mensho an i khera, un ko hachetikri phub har i mulo them was.”

¹²O baro Dewel tradell i menshen dur krik dran kau them. Un o tselo them atchell muklo koi tchiddo.

¹³Ninna te atchell o deshto kotar gomme koi, djal lenge har i tikne kashta, kai wenn dran i tele-dino ruk. I jag chatchrell len pre. Ko telstuno kotar o rukestar atchell. Un dran leste well newo djipen, hoi hi o Debleske koi.