Read O Debleskro Drom - I Bibla an o Romano Rakepen 2021 Jesaja 63 Bible Online

Jesaja 63 - O Debleskro Drom - I Bibla an o Romano Rakepen 2021 bible

Jesaja 63

¹Koon hi kowa, kai well dran o them Edom dran o foro Bozra, rido an lole koola? Koon hi kowa, kai hi jaake railes rido, un kai nashell railes an peskri bari soor. Kowa hom me, o baro Dewel, kai rakrell an o tchatchepen: Man hi i soor, te lap tumen dran o merepen win.

²Hoske hi loles ap tire koola? Un hoske hi tire koola har jekestar, kai stakrell i drake?

³Me stakrom kol drake kokres, un i menshendar dran wawar themma his kek pash mande. Me stakrom len miri choljah, awa, bari choljah stakrom len khetne. Un lengro rat was ap mire koola, un miri baja was ratlo.

⁴An miro dji was o diwes, kai dau hakenes pale, hoi lo kras. Un ko bersh was, kai lau mire menshen dran o tchilatchepen win.

⁵Me dikom man trujel, un kek his koi, kai ap miri rig his. Un kamom les gar te patsell, te rikrals kek pash mande. Koi kras man miri choli soreles.

⁶Un me stakrom i menshen an wawar themma khetne an miri choli. Un jon wan mato dran miro choli. Un me mukom lengro rat ap i phub te nashell.

⁷Me kamau te rakrap pral o Debleskro latchepen, ko baro koowa, hoi o baro Dewel halauter menge kras, un ko tselo latcho koowa, hoi mukas lo ap o kheer Israel te well. Les hi lenge i baro dji un hi lenge jaake latches.

⁸Job penas: Tchatchepah, mire menshe hi le, menshe kek chochepah. Doleske was lo, te lell lo len win

⁹dran ko tselo pharo koowa, hoi ap lende tchiddo his. Kek wawar, kek bolepaskro un kek bitchepaskro was lenge ap i rig. Na-a job kokres was, un las len dran kowa lauter win. Dran leskro tselo dji kamas lo len un his lenge latches. Doleske las lo len koi win, hadas len pre, un hidjras len hake diwessa an ko phuro tsiro.

¹⁰Ninna te his lo lenge jaake latches, kaman le gar ap leste te shunell, un dukran les an leskro dji. Kote was lo chojedo ap lende, un kuras pes lentsa.

¹¹Kote mukan le penge pale i phure tsirja an o shero te djal, kol diwessa, kai o Mose, djiwas, un putchan pendar: Kai hi o baro Dewel, kai las peskre menshen win dran o baro pani, khetne kolentsa, kai ap lende jak dan? Kai hi o baro Dewel, kai ap lende peskro ducho tchiwas?

¹²Kai hi kowa, kai peskri bari sorjah ap o Moseskri tchatchi rig was? — Kowa, kai kras, te djal ko pani glan lende ap dui rigja, un peske jaake i baro lab kras, hoi an kek tsiro bistedo well.

¹³Kai hi kowa, kai mukas mare phuren mank telstune panja te djal, jaake har diwje graja, hoi soreles ap i herja hi?

¹⁴Har grumja, kai djan i berga tele, te hatsenn le senlepen, jaake anas o baro Dewel peskre menshen kote, kai len doha djipaske his. Awa, baro Dewel, jaake anal tu len pengro drom, un kral tuke i railo lab.

¹⁵Dik dran o bolepen tele, un dik tele dran tiro railo kheer! Kai hi tiro kamlepen, hoi menge chatchell? Kai hi tiri soor? Hi tut buder kek dji un kek latchepen menge?

¹⁶Tu hal maro dad. O Abraham djinell tchi mendar, un o Jakob prindjrell men gar. Tu, baro Dewel, hal maro dad, kowa kai men win las dran o them Egiptia. Glan rah tsiro kral tu tuke koleha i baro lab.

¹⁷Hoske, baro Dewel, mukeh tu men tire dromendar tele te djal, te kram mare djia har bar, jaake te djiwam buder gar tuha? Ab pale pash mende! Ma biste tire budepangre! Mer ham tire menshe.

¹⁸I tikno tsiro tradan menshe dran wawar themma men, tire menshen, dran maro them. Kolla, kai kuran pen mentsa, stakran tiro kheer khetne, kai tu khere hals.

¹⁹Un mer wam har sawe, pral kolende tu an kek tsiro o rai hals, un pral kolende tiro lab gar win gole dino was.