Read O Debleskro Drom - I Bibla an o Romano Rakepen 2021 Jesaja 65 Bible Online

Jesaja 65 - O Debleskro Drom - I Bibla an o Romano Rakepen 2021 bible

Jesaja 65

¹O baro Dewel penell: Me homs koi, te rodenn le man. Un jon putchan gar pal mande. Me homs koi, te hatsenn le man. Un jon rodan man gar. Me penom: Kate hom! Kate hom! ap menshende, kai man gar an-gole dan.

²Me rikrom o tselo diwes mire wasta win kol menshenge, kai kaman gar ap mande te shunell, un djan i drom, hoi gar mishto hi, un djiwenn pal pengro shero.

³Kol menshe mukenn gar tele, te krenn le kowa, hoi man choirell: Jon anenn viechen i wawar deblenge ap lengre shukar platse, un chatchrenn lenge sungepaskro koowa ap barra.

⁴Rati hi le beshdo pash i mulengre khera, te putchenn le i mulen, un atchenn pral i rat an khatede platse, kai mangenn le wawar deblen an. Jon chan balengro mass, un pijenn summi, hoi mass dren hi kol viechendar, hoi pale-tchiddo hi.

⁵Un jon penenn i wawarenge: Atch krik tuke, ma tape man an! Me taprom ko koowa miro deblestar an. Sawe menshe, penell o baro Dewel, nai dikau me gar glan i jaka. Miri choli pral lende hi har i jag, hoi o tselo diwes chatchell.

⁶Dikenn, kowa lauter hi pre tchinlo an i liil glan mande. Un me rikrau gar miro mui, bis te dom len ko tselo tchilatchepen pale, hakeneske ap peskro shero:

⁷Ko tchilatcho koowa, hoi jon kran, un ko tchilatcho koowa, hoi lengre phure kran, penell o baro Dewel. Jon chatchran ap i berge wawar deblenge sungepaskro koowa, un koleha anan le ladj ap mande. Jaake dau me kowa ap lengre sherja pale, kowa lauter, hoi kran le ninna an i phure tsirja.

⁸Kawa penell o baro Dewel: Jaake har kek hacho peskre drake tele dell un krik witsrell, kai gomme mool an lende hi, jaake kamau me ninna te krell mire menshentsa, te mukap len gar lauteren te marell. Hi sawe mank lende, kai mange koi hi.

⁹O Jakobestar wenna pale menshe, un dran Juda wenna sawe, kai ap mire berge djiwenna. Kolen, kai me win rodom, lenge well o them, un mire budepangre djiwenn kote.

¹⁰Mire menshenge, kai putchenn pal mande, well i tala Sharon koi platsa, kai anenn le pengre bakre, un i tala Achor well koi platsa, kai atchenn pengre grumja.

¹¹Tumenge, kai o baro Debles mukan, well wawartchandes: Tumer bistran miri berga, kai wau an-mangedo, un tchiwan o chocheno debleske, o Gad, chapen glan. Un glan o chocheno debleste, o Meni, tchoran mool win.

¹²Doleske penau me, tumer wenn mulo dino o chareha, un hunte djan ap i tchanga, te wenn maredo har vieche. Har dom me tumen gole, dan tumen gar glan. Har rakrom tumentsa, shunan gar, un kran, hoi djungeles hi an mire jaka, un rodan tumenge kowa win, hoi gar kamau.

¹³Doleske penell o baro Dewel, maro rai: An ko tsiro, kai tumer bokenn, hi mire budepangren chapaske. An ko tsiro, kai tumer trushenn, hi mire budepangren doha te pijell. An ko tsiro, kai han an i ladj, hi mire budepangre an i bacht.

¹⁴An ko tsiro, kai denn tumer gole darjatar, un rowenn dran i phagedo dji, hi mire budepangre jaake bachtelo, te giwenn le i bachtjatar.

¹⁵Pash mire wi-rodede menshe hi tumare laba sawe laba, kolentsa jon i bibacht pral jekeste win rakrenn, un penenn: “O baro Dewel maro rai, mu dell tut mulo har kales un koles.” Lengre budepangren dell job i newo lab.

¹⁶Palle penenn kolla an o them Juda, kai rakrenn i bacht win pral jekeste: “I bacht o tchatchepaskro Deblestar well pral tute!” Un kowa, kai dell pes sowel an o them, kowa dell pes sowel pash o tchatchepaskro Debleste. Palle hi bistedo kol phare diwessa pherdi bibacht, hoi glan kau tsiro his, un wenn mange buder gar glan i jaka.

¹⁷Tchatchepah, me krau i newo bolepen, un i newi phub. Un ko phuro bolepen un koi phuri phub hi palle bistedo, un wenn buder gar i menshenge an o shero.

¹⁸Giwenn un denn gole i bachtjatar hako tsiro pral kowa, hoi me krau! Me krau, te well Jerusalem i bachtelo foro, un i tsele menshe koi dren giwenn i bachtjatar.

¹⁹Me ninna, wau bachtelo pral Jerusalem, un miro dji giwell pral mire menshende. Ropen well kote buder gar shunlo, witar gar dell jek gole i darjatar.

²⁰Un kote dell buder kek ternepen, kai gar bud diwessa phuro well, un kek phuro, kai merell glan peskro tsiro. O terneder lendar well sheel bersh phuro. Un kowa, kai merell un his kek sheel bersh phuro, kolestar penenn le, te was pral leste i bibacht win rakedo.

²¹Jon tchiwenn penge khera pre tardo, un djiwenn dren. Un jon tchiwenn penge drakengre ruka an i phub un chan lengre drake.

²²Jon tchiwenn kek kheer pre tardo, un i wawar djiwell palle dren. Un jon tchiwenn tchi an i phub, un i wawar chal les palle. Jaake phuro i ruk well, jaake phuro wenn ninna mire menshe. Un mire wi-rodede menshe wenn i rah tsiro bachteles pral kowa, hoi lengre wasta kran.

²³Jon budrenn gar tchitcheske, un lengre tchawe wenn gar boldo, te merenn le sik. Jon hi menshe, ap kolende o baro Debleskri bacht tchiddo hi, — ap lende, ninna ap lengre tchawende.

²⁴Un kawa well jaake: Jon dan gomme gar gole, koi dom man glan, un jon rakrenn gomme, koi shunau me.

²⁵O diwjo djuklo un o terno bakro chan khetne jek pash o wawar. Un o lewo chal phuss har i grumni, un o sap hunte chal tchik. Kek krell tchomone, hoi duka anell, witar tchi, hoi tchilatcho hi ap miri tseli berga, kai djiwau, penell o baro Dewel.