Read O Debleskro Drom - I Bibla an o Romano Rakepen 2021 Jesaja 7 Bible Online

Jesaja 7 - O Debleskro Drom - I Bibla an o Romano Rakepen 2021 bible

Jesaja 7

¹Un i kurepen was an ko tsiro, har o baro rai pral o them Juda o Ahas his, koleskro dad o Jotam his, un koleskro dad o Usija his. O baro rai pral Syria, o Rezin, un o baro rai pral Israel, o Pekach, koleskro dad o Remalja his, wan pash o foro Jerusalem, te kurenn le pen o foreha. Jon nai lan les gar dren.

²Un har o baro rajeske pral Juda penlo was, kai tchiwan i Syrarja pengre plachtene khera pre an o Efrajimeskro them, kote trissas lo i trashatar. Un ninna i tsele menshe an Juda trissan jaake har i ruka an i wesha trissenn, te phurdell i sorelo ducho.

³Un o baro Dewel penas ap o Jesaja: Dja win, dja pash o Ahas, tu un tiro tchawo Shear-Jashub. Tu hatseh les kote, kai o panjeskro drom gar dureder djal, pash ko pralstuno pani, ap ko drom pash koi platsa, kai kolla budrenn, kai plachte krenna.

⁴Un pen ap leste: “De jak! Atch pokones! Ab sorelo un ma traash glan kol dujende, o Rezin, ko Syrari, un o Pekach, koleskro dad o Remalja hi. Ninna te hi le chojedo, hi le tchi wawar har tele chatchedo kasht, kai gomme jagakro ducho pre djal.

⁵Hi tchatcho, i Syrarja un i Efrajimarja khetne lengro baro rajeha, o Pekach, lan penge tchilatchepen glan khatar tute un penan:

⁶‘Mer kamah pral te djal an o them Juda, un i menshenge koi daar te krell, un lengro them dren te lell. Un o Tabealeskro tchawes tchiwah pral lende, te well lo lengro baro rai.’

⁷Kawa penell o baro Dewel, maro rai: Kowa well gar jaake un djal lenge gar!

⁸O foro Damaskus hi o shero o themestar Syria, un o Rezin hi o baro rai kokres pral Damaskus. Un o foro Samaria hi o shero o themestar Efrajim, un o Pekach hi o baro rai kokres pral Samaria. Un an 65 (shob-deesh-te-pantch) bersha dell buder kek them Efrajim. Un te patsenn tumer kawa gar, palle atchenn tumer gar!”

¹⁰Un o baro Dewel rakras pale ap o Ahas un penas:

¹¹“Mange mandar, tiro baro Deblestar, i sikepen! Muk man te krap tchomone an o mulengro them oder an o bolepen, hoi tut sikrell, te well kowa jaake har penom!”

¹²O Ahas penas: “Me kamau gar te mangap o baro Deblestar, te krell lo tchomone, te sikrell lo, kai lo ap mari rig hi.”

¹³Kote pre penas o Jesaja: “Shunenn, tumer, kai wenna o Davideskre tchawendar! Hi tumenge gar doha, te krenn menshen khino? Krenn kanna ninna miro Debles khino?

¹⁴Doleske dell o baro Dewel kanna kokres i sikepen, te sikrell lo, kai hi lo ap tumari rig: I terni tchai well wawartchandes un lell i mursh tchawes. Un koles dell li o lab Immanuel.

¹⁵Khil un gwin chal lo, bis te djinell lo, hoi tchilatcho un hoi latcho hi.

¹⁶Glan te was ko tsiro, kai djinell lo kowa, well ko them muklo tchiddo, glan koleskre dui bare rajende tut sawi bari daar hi.

¹⁷Un pral tute un tire menshende un i menshende an tiro them anell o baro Dewel sawe diwessa, har jon gar wan, jaake rah har dran o them Israel dui themma wan: o Israel un o Juda. Kol diwessa wenna o baro rajeha pral o them Assur.”

¹⁸An ko tsiro phurdell o baro Dewel an i tikni phurdepaskri: Un lurde wenna dran o them Egiptia har matsille, un dran o them Assur har biene.

¹⁹Un jon lauter beshenn pen ap hake platse — an i telstuni tala un mank i bare barra, an i burra un ap o senlepen.

²⁰An ko tsiro bitchrell o Dewel o baro rajes dran o them Assur. I wawar rigjatar o panjestar Eufrat kharell lo les kai, te well lo har i tchuri, hoi tchinell tumare balla tele ap o shero un ap i herja. Un ninna i tchora tchinell lo tele.

²¹An ko tsiro hi jek murshes jek terni grumni un dui bakre.

²²Kolla denn jaake bud thud, te well i tseli familja khil te chal. Koon an ko tsiro pral atchas an o them, chal khil un gwin.

²³Un an ko tsiro well jaake: Kote, kai kanna i seri drakengre ruka tardo hi, hoi khetne jek sero rupene beme moldo hi, kote hi palle subjengre burra un subjengro senlepen tardo.

²⁴Kote djan le o bogeha un i failentsa, te denn le viechen karje. O tselo them hi pherdo subjengre burra un subjengro senlepen.

²⁵Ninna koi phub, hoi kanna i hachetikri phub hi, well jaake pherde subjengre burra un subjengro senlepen, te darenn i menshe, te djan le koi. Un jon tradenn i grumja koi, un i bakre stakrenn lauter khetne.