Read O Debleskro Drom - I Bibla an o Romano Rakepen 2021 3. Mose 11 Bible Online

3. Mose 11 - O Debleskro Drom - I Bibla an o Romano Rakepen 2021 bible

3. Mose 11

¹Un o baro Dewel penas ap o Mose un o Aron:

²Penenn ap i Israelitarja: Kalla hi i vieche, hoi nai chan kolendar, kai djiwenn ap o them:

³Hako viecho, koles pre-phagede pire[16] hi, tseles pre-phagedo hunte wenn le, un hoi o chapen dui kope chal, kolen nai chan.

⁴Mank kolende, kai o chapen dui kope chan, hi sawe, hoi hunte chan tumer gar: I khamela un o shoshoi, un o bergetikro shoshoi. Ninna te chan le pengro chapen dui kope, len hi kek pre-phagede pire. Pale-tchiddo hi le tumenge!

⁵

⁶

⁷Un o bales hunte chan gar, ninna te hi les pre-phagede pire. O balo chal o chapen gar dui kope. Pale-tchiddo well lo tumenge.

⁸O mass kek kal viechendar hunte chan. Witar gar taprenn len an, te hi le mulo. Pale-tchiddo wenn le tumenge.

⁹Kalla hi i vieche, hoi nai chan tumer kolendar, kai djiwenn an o pani: Halauter, hoi les flosse un shuppe hi, un djiwell an o baro pani un an i lengste panja, kowa nai chan tumer.

¹⁰Halauter, hoi djiwell an o baro pani un an i lengste panja, un les hi kek flosse un kek shuppe, ma chan! Pale-tchiddo well kowa tumenge!

¹¹Ma chan leskro massestar! Un te hi sau viecho mulo, well lo tumenge pale-tchiddo.

¹²Lauter, hoi an o pani hi, un les kek flosse un kek shuppe hi, well tumenge djungeles.

¹³Kalla hi i tchirkle, hoi hunte chan gar. Kalla wenn tumenge pale-tchiddo: o adlari, kol tchirkle kai chan tikne bakre, kachja un matche; massengre tchirkle, hake ratsjakre tchirkle, hake korake, ninna i straussetikre kachja un i mulengre tchirkle, panjeskre möwe, un o habichto un hake tchirkle dran leskri familja; un o tikno ratsjakro tchirklo un o baro ratsjakro tchirklo, o panjeskri kachni; un o pelikano un o mulo-massengre tchirkle un o shwano; un o storcho un hake matchengre tchirkle; un o wiedehopf un o fledertikre kermuse.

²⁰Ninna kal tsele tikne vieche, hoi len tchirklengre mussja hi un ap star herja djan, hi tumenge pale-tchiddo.

²¹Kokres kolla kolendar, kai nai stenn, nai chan tumer.

²²Jaake nai chan tumer hake stepangre[17].

²³Kol tsele wawar tikne vieche, kolen tchirklengre mussja hi un ap star herja djan, wenn tumenge pale-tchiddo.

²⁴Kalla hi kol vieche, kai hunte taprenn len gar an, te hi le mule: Hakeno, kai taprell sawo mulo viecho an, kowa hi pale-tchiddo bis te well rati.

²⁵Koon sau mulo vieches hidjrell, hunte thowell peskre koola, un well pale-tchiddo, bis te well rati.

²⁶Kalla hi kol vieche: Hako viecho, koles pre-phagede pire hi, kai hi gar tseles pre-phagedo, un hoi chal o chapen gar dui kope. Kal vieche hi tumenge pale-tchiddo. Koon taprell les an, well pale-tchiddo.

²⁷Kol tsele vieche, kai djan ap tatse, hi tumenge pale-tchiddo. Koon jekes lendar an-taprell, te hi kowa mulo, well pale-tchiddo, bis te well rati.

²⁸Kowa, kai sau mulo viecho hidjrell, hunte thowell peskre koola, un well pale-tchiddo, bis te well rati. Kal mule vieche hi tumenge pale-tchiddo.

²⁹Kalla hi i vieche, hoi hi tumenge pale-tchiddo mank i tikne viechende, hoi djan pral i phub: o maulwurfo, i kermuse, hake eidekse, o gekko, o salamander un o khameleon.

³⁰

³¹Kalla hi tumenge pale-tchiddo mank kol tsele tikne viechende. Hakeno, kai len an-taprell, te hi le mulo, well pale-tchiddo, bis te well rati.

³²Halauter, ap kowa sau mulo viecho perell, well pale-tchiddo: hako kashteno koowa, ninna ripja, fella un gone, ninna hako kowa, koleha jek i budi krell. Kowa lauter hunte well an o pani tchiddo, un atchell pale-tchiddo, bis te well rati. Pal kowa hi ko koowa buder gar pale-tchiddo.

³³Te perell sau mulo viecho an i piri, hoi dran tchik kerdo was, palle well lauter, hoi an koi piri hi, pale-tchiddo. Sawi piri hunte phagenn tumer paash.

³⁴Te well pani dran sawi piri pash i chapen dino, well ko tselo chapen pale-tchiddo, ninna hako pipen dran sawi piri.

³⁵Ap lauter, kai sau mulo viecho perell, kowa well pale-tchiddo. Te perell lo ap i bob, ap kolate peklo oder keredo well, well ko bob pale-tchiddo, un tumer hunte phagenn les tele. Pale-tchiddo hi lo tumenge.

³⁶Kokres te perell i mulo viecho an i brunna[18], kai pani dren hi, palle well ko pani gar pale-tchiddo. Kokres kowa, kai taprell ko mulo vieches an, hoi koi dren hi, kowa hi pale-tchiddo.

³⁷Te perell sau mulo viecho ap djob, hoi well win witsedo ap i phub, well ko djob gar pale-tchiddo.

³⁸Te was pani ap ko djob tchoredo, un palle perell sau mulo viecho koi pre, palle well ko djob tumenge pale-tchiddo.

³⁹Te merell i viecho, hoi nai chan tumer, un jek tumendar taprell les an, kowa well pale-tchiddo, bis te well rati.

⁴⁰Koon sawo viechestar chal, kowa hunte thowell peskre koola, un well pale-tchiddo bis te well rati. Koon ko mulo viecho hidjrell, kowa hunte thowell peskre koola, un well pale-tchiddo bis te well rati.

⁴¹Kol tsele tikne vieche, hoi djan pral i phub, kolla, kai djan ap pengro per, ninna kolla, kai len hi star un budeder herja, jon hunte wenn pale-tchiddo tumenge. Kek chal len!

⁴²

⁴³Ma krenn tumen pale-tchiddo sau tikno viecheha, hoi chan.

⁴⁴Me, o baro Dewel, hom tumaro Dewel. Kek wawar hi har me. An mande hi kek tchilatchepen. Un tumer hunte djiwenn jaake, te well tchi tardo mank mande un tumende. Ma krenn tumen pale-tchiddo ap i tikno viecho, hoi djal pral i phub.

⁴⁵Me hom o baro Dewel, un anom tumen dran o them Egiptia win, te wap tumaro Dewel. Kek wawar hi har me. An mande hi kek tchilatchepen. Un tumer hunte djiwenn jaake har i Debleskre menshe djiwenn.

⁴⁶Kawa hi hoi glan tchinlo hi pral i viechende un pral i tchirklende un pral halauter, hoi djiwell an o pani, un pral kol viechende, kai djan ap o per oder ap tikne herja pral i phub.

⁴⁷Jaake nai djinenn tumer, hoi pale-tchiddo hi un hoi gar pale-tchiddo hi, un hawo viecho nai chan tumer, un hawo viecho nai chan tumer gar.