Read O Debleskro Drom - I Bibla an o Romano Rakepen 2021 3. Mose 13 Bible Online

3. Mose 13 - O Debleskro Drom - I Bibla an o Romano Rakepen 2021 bible

3. Mose 13

¹O baro Dewel penas ap o Mose un ap o Aron:

²Te well pash i mensheste i kotar hauta pesso oder nasselo oder parno, jaake te darenn le, kai kowa i djungelo nasslepen[21] hi, palle well ko mensho pash o rashajeste anlo, pash o Aroneste oder pash jekeste leskre mursh tchawendar.

³Un ko rashai hunte dikell peske koi nasseli kotar hauta an. Te wan i balla kote parno, un koi nasseli kotar hauta hi dureder tele an o mass har koi wawar hauta trujel, palle hi kowa i djungelo nasslepen. Kowa te dikell o rashai ap koleste, palle hunte rakrell lo win, te hi ko mensho pale-tchiddo.

⁴Te hi ko parno kotar ap leskri hauta gar dureder tele an leskro mass har koi wawar hauta, un i balla wan gar parno, palle pandell ko rashai ko menshes efta diwessa an i kheer dren.

⁵Ap o eftato diwes dikell lo les pale an. Te patsell lo, te djas ko parno kotar gar dureder, un atchas jaake har glan kowa, palle pandell ko rashai les i duito kopo efta diwessa dren.

⁶Pal kol efta diwessa dikell o rashai pale koi kotar hauta an. Te hi kowa buder gar jaake parno un was gar bareder, palle hunte rakrell lo win, te hi ko mensho erligo. Kawa hi i nasslepen ap i hauta, hoi gar djungelo hi. Ko mensho hunte thowell peskre koola un hi erligo.

⁷Te well ko nasselo kotar bareder pal kowa, kai o rashai pre dikas, palle hunte sikrell lo pes o rashajeste i duito kopo.

⁸Te dikell o rashai palle, kai was ko nasselo kotar bareder, palle hi kowa i djungelo nasslepen, un o rashai hunte rakrell win, te hi ko mensho pale-tchiddo.

⁹Te hi jekes i dukepen ap peskri hauta, hoi wi dikell har i djungelo nasslepen, palle anenn le sawes pash o rashajeste.

¹⁰Te dikell ko rashai palle, te hi ko dukepen parno un pesso, un i balla an ko dukepen wan parno, un ko dukepen hi pre un lolo,

¹¹palle hi kowa ap leskri hauta i phuro djungelo dukepen. O rashai hunte rakrell win, te hi ko mensho pale-tchiddo. Job hunte pandell les gar an o kheer dren, pale-tchiddo hi lo.

¹²Te phagell i nasslepen ap i tseli hauta win, fun leskro shero bis pash leskre pire, un halauter hi parno, hoi o rashai nai dikell, palle hi ko nasslepen tchomone, hoi ko menshes gar pale-tchiddo krell. Un o rashai rakrell win, te hi kowa erligo.

¹³

¹⁴Hatsell o rashai, kai les an-dikell, i dukepen, hoi hi pre un lolo, hi kowa i djungelo nasslepen. Un o rashai, kai kowa dikell, hunte rakrell win, te hi ko mensho pale-tchiddo. Ko lolo mass, hoi pre hi, hi pale-tchiddo, un hi i sikepen, kai kowa i djungelo nasslepen hi.

¹⁵

¹⁶Te djal ko lolo mass palpale un well parno, palle well ko mensho pale pash o rashajeste.

¹⁷Te dikell o rashai, te was ko lolo mass parno, hi ko mensho buder gar pale-tchiddo. Un o rashai hunte rakrell win, te hi lo erligo.

¹⁸Te phagell pash jekeste i dukepen pre ap leskri hauta, un well pale sasto,

¹⁹un pal kowa well i hauta ap ko emligo kotar pale pesso un parno oder parno-te-lolo, palle sikrell lo kowa o rashajeste.

²⁰Te dikell o rashai koi kotar hauta, un kowa hi dureder tele an o mass har i wawar hauta trujel, un i balla ap ko dukepen wan parno, palle hi kowa i djungelo nasslepen, hoi an o dukepen win phagas. Palle rakrell ko rashai win, te hi ko mensho pale-tchiddo.

²¹Te dikell o rashai koi kotar hauta un dikell kek parne balla, un koi kotar hauta hi gar dureder tele an o mass har i tseli wawar hauta, un hi buder gar jaake parno oder lolo-te-parno, palle pandell o rashai ko menshes efta diwessa dren.

²²Te well ko kotar bareder, palle hi kowa i djungelo nasslepen. Un o rashai hunte rakrell win, te hi ko mensho pale-tchiddo.

²³Te well ko kotar gar bareder, palle hi i dukepen, hoi sasto was, un mass hoi kote pale khetne djas. O rashai hunte rakrell win, te hi ko mensho erligo.

²⁴Te hatsell pes ap jekeste i kotar hauta, hoi chatchedo was, un ko dukepen well lolo-te-parno oder parno,

²⁵hunte sikrell lo kowa o rashajeste. Te dikell o rashai, te wan i balla kote dren parno, un ko kotar hauta hi dureder tele har i wawar hauta trujel, palle hi kowa i djungelo nasslepen, hoi an ko kotar hauta, hoi chatchedo was, win phagas. O rashai hunte rakrell win, te hi ko mensho pale-tchiddo.

²⁶Te dikell o rashai kek parne balla ap ko dukepen, un koi hauta hi gar dureder tele har i tseli wawar hauta, un hi buder gar jaake parno, palle pandell o rashai ko menshes efta diwessa dren.

²⁷Ap o eftato diwes dikell o rashai ko dukepen pale an. Te was ko parno kotar bareder, hi kowa i djungelo nasslepen. Un o rashai hunte rakrell win, te hi ko mensho pale-tchiddo.

²⁸Te atchas ko dukepen jaake har lo his, un was gar bareder, un hi buder gar jaake parno, palle hi kowa mass, hoi khetne djas pal ko chatchepen. O rashai hunte rakrell win, te hi ko mensho erligo.

²⁹Te hi i murshes oder i djuwjat i nasslepen ap o shereskri hauta oder ap i tchor,

³⁰hunte dikell o rashai les peske an. Te hi i hauta kote dureder tele har i wawar hauta trujel, un wan i balla kote djelto un sano, palle hi kowa i djungelo nasslepen ap o shero oder ap i tchor. O rashai hunte rakrell win, te hi ko mensho pale-tchiddo.

³¹Te dikell o rashai, kai i balla kote buder gar kalo hi, ninna te hi i nasseli hauta gar dureder tele har koi wawar hauta trujel, palle pandell o rashai ko menshes efta diwessa dren.

³²Te dikell lo pal kol efta diwessa palla, un koi nasseli kotar hauta was gar bareder, un hi gar dureder tele har i wawar hauta, un kek djelto bal hi koi,

³³palle hunte tchinell ko mensho peskre balla trul ko dukepen tele. Un o rashai pandell les pale efta diwessa dren.

³⁴Te dikell o rashai ap o eftato diwes palla, un ko dukepen was gar bareder, un hi gar dureder tele an o mass har i wawar hauta, palle hunte rakrell o rashai win, te hi ko mensho erligo. Ko mensho hunte thowell peskre koola un hi erligo.

³⁵Te well ko dukepen bareder, pal kowa job erligo kerdo was,

³⁶hunte dikell ko rashai les pale. Te dikell o rashai, te was ko dukepen bareder, hunte rodell o rashai buder gar pal i balla, hoi djelto wan. Pale-tchiddo hi lo.

³⁷Te dikell an i rashajeskre jaka win, har te was ko dukepen gar bareder, un te wan kote kale balla win, palle was ko mensho sasto. O rashai hunte rakrell win, te hi lo erligo.

³⁸Te hi i murshes oder i djuwjat parne kotja ap pengri hauta,

³⁹hunte dikell o rashai palla, hoi kowa hi. Te hi kal kotja gar jaake parno, palle hi kowa kek djungelo nasslepen, hoi an i hauta win phagas. Pale-tchiddo hi ko mensho gar.

⁴⁰Te perenn jekeske i balla ap o shero win, palla oder glan, hi lo doleske gar pale-tchiddo.

⁴¹

⁴²Te hi kote, kai i balla win peran, palla oder glan, i kotar hauta, hoi parno-te-lolo hi, hunte dikell o rashai pal, hoi kowa hi. Hatsell o rashai i pessepen ap koi hauta, kai i balla win peran, un ko pessepen hi lolo-te-parno, un dikell win har i djungelo nasslepen,

⁴³

⁴⁴palle hi les tchatchepah kau djungelo nasslepen ap peskro shero. Pale-tchiddo hi lo. Un o rashai rakrell win, te hi lo pale-tchiddo.

⁴⁵Ko mursh ap koleste ko djungelo nasslepen hi, hunte riwell koola, hoi paash hi, un hunte mukell leskri balla diwjes, un hunte tchiwell i diklo trul peskri tchor, un dell win gole: pale-tchiddo, pale-tchiddo!

⁴⁶Un jaake rah, har ko djungelo nasslepen ap leste hi, hi lo pale-tchiddo. Job djiwell kokres, un krell peskro kheer win glan koi platsa, kai i wawar menshe djiwenn.

⁴⁷Te sikrell pes i djungelo kotar ap i ripen oder ap koola, hoi hi dran bakrengre balla, laina oder ledera, un ko djungelo kotar hi senelo oder lolo, hunte dikell pes kowa o rashai an.

⁴⁸

⁴⁹

⁵⁰Job dikell les peske an un pandell les efta diwessa dren.

⁵¹Ap ko eftato diwes dikell lo les pale an. Te was ko djungelo kotar bareder, hi kowa i djunglepen, hoi hi pale-tchiddo.

⁵²Ko ripen oder kol koola, ap kolende ko djunglepen hi, hunte wenn pre chatchedo an i jag.

⁵³Hi wawartchandes, te dikell o rashai ko koowa an, un ko djungelo kotar was gar bareder,

⁵⁴palle penell o rashai, te lenn le ko koowa un thowenn les. Palle pandell lo les o duito kopo efta diwessa dren.

⁵⁵Pal kol efta diwessa dikell les o rashai pale an. Te atchas ko djungelo kotar koi, hi kau ripen pale-tchiddo, ninna te was ko djungelo kotar gar bareder. Kau djunglepen chas pes dren glan oder palla. Doleske hunte well kau ripen oder kal koola chatchedo.

⁵⁶Te dikell o rashai, te was ko kotar, hoi senelo oder lolo his, buder gar jaake senelo oder lolo pal o thopen, palle tchinell lo les tele dran o ripen oder dran i koola dran bakrengre balla oder laina oder ledera.

⁵⁷Te sikrell pes ko djunglepen pal kowa pale, well diklo, te hi tchomone, hoi dureder djal. Palle hunte well kau koowa chatchedo, kai sikrell pes kau djunglepen ap leste.

⁵⁸Te hi ko djunglepen buder gar koi pal o thopen, hunte well kau koowa thodo i duito kopo. Pal kowa hi lo gar pale-tchiddo.

⁵⁹Jaake hunte well kerdo, te sikrell pes i djungelo kotar ap i ripen oder ap koola, hoi hi dran bakrengre balla, laina oder ledera, te well siklo, hi le pale-tchiddo oder gar.