Read O Debleskro Drom - I Bibla an o Romano Rakepen 2021 3. Mose 14 Bible Online

3. Mose 14 - O Debleskro Drom - I Bibla an o Romano Rakepen 2021 bible

3. Mose 14

²Jaake hunte krenn tumer jekeha, kai les i djungelo nasslepen ap peskri hauta his, un pale sasto was, te well lo pale erligo. Job well glan o rashajeste anlo.

³O rashai djal win glan koi platsa, kai i menshe hi, un dikell les peske an. Te was ko dukepen ap leste sasto,

⁴palle penell o rashai, te anenn le dui djide tchirkle, hoi hi gar pale-tchiddo, ninna zedertikro kasht, un lole thaba, un patria i burrestar, hoi kharell Ysop.

⁵Un o rashai penell, te marenn le ko jek tchirklo pral i tcharo, kai djudjo pani dren hi.

⁶Palle rikrell lo o djido tchirkles an ko tcharo, kai pani un o rat o maredo tchirklestar dren hi. Khetne leha tchiwell lo ko zedertikro kasht, kol lole thaba un kol patria Ysop koi dren, an ko tcharo,

⁷un witsrell ko ratlo panjestar efta kope ap koleste, kai pale-tchiddo his, te well lo erligo. Un mukell ko djido tchirkles krik te djal.

⁸Kowa, kai sasto was, thowell peskre koola un tchinell peskre tsele balla tele, un thowell pes. Palle hi lo erligo, un nai well pale ap i platsa, kai i menshe djiwenn. Efta diwessa atchell lo win glan peskro plachteno kheer.

⁹Pal kol efta diwessa tchinell lo i duito kopo i tsele balla ap o shero tele, ninna leskri tchora un kol balla pral i jaka un leskre tsele wawar balla, un thowell pes un peskre koola Palle hi lo erligo.

¹⁰Ap o ochtato diwes anell lo dui terne bakre, hoi mursha hi un sasto, un jek bakri, hoi jek bersh phuro un sasto hi. Ninna anell lo triin kilogramme latcho jarro, kai djet dren hi, te well kowa glan o baro Debleste anlo. Koi pashel anell lo i khoro djet.

¹¹Ko rashai anell koles, kai sasto was, un kau tselo koowa glan o baro Debleste, glan o wudar koleskro plachteno kherestar.

¹²O rashai lell ko jek terno bakro un ko jek-paash litari djet, un hadell kowa pre glan o baro Debleste, te well ko mensho pale erligo kerdo glan o Debleste.

¹³Pal kowa marell lo ko terno bakres kote, kai wenn ninna vieche maredo, te well i doosh un o pale-tchiddo koowa krik lino, un kol wawar, kolengro tselo mass chatchedo well. Kai platsa hi i Debleskri platsa. Jaake har hi o rashajeske ko mass i viechestar, hoi well maredo, te well i doosh un o pale-tchiddo koowa krik lino, jaake hi ninna o rashajeske ko mass i viechestar, hoi well maredo, te well ko mensho pale erligo kerdo glan o Debleste. O mass sau viechestar, hoi o Debleske anlo was, nai chan kokres i rashaja un kek wawar.

¹⁴O rashai lell o ratestar ko viechestar, hoi maredo was, te well o mensho pale erligo glan o Debleste, un makell tchomone tella ap o tchatcho kand kolestar, kai sasto was, ninna ap leskro tchatcho pesso gushto un ap o tchatcho pesso tsebo.

¹⁵O rashai lell ko khoro djet un tchorell tchomone kolestar an peskro serwo wast.

¹⁶Palle tchiwell lo peskro tchatcho gushto an ko djet, hoi an leskro serwo wast hi, un witsrell ko djetestar efta kope ap o Debleskri chatchepaskri.

¹⁷Palle makell lo ko djetestar, hoi an leskro serwo wast pral atchas, tchomone tella ap o tchatcho kand un ap o tchatcho pesso gushto un ap o tchatcho tsebo kolestar, kai sasto was, ap ko rat hoi lo glan kowa kote pre makas.

¹⁸Ko djet, hoi gomme an leskro wast hi, makell lo ap o shero kolestar, kai sasto was. Jaake krell lo les pale erligo glan o baro Debleste.

¹⁹Pal kowa marell o rashai ko viecho, hoi maredo well, te well ko pale-tchiddo koowa krik lino kolestar, kai sasto was. Jaake krell lo les pale erligo. Palle marell lo ko viecho, koleskro tselo mass o Debleske chatchedo well,

²⁰un chatchrell kowa ap o Debleskri chatchepaskri khetne ko chapen dran jarro hoi glan o baro Debleste anlo was. Un jaake krell lo, te well kowa, kai sasto was, pale erligo.

²¹Te hi lo tchorwelo un nai anell gar jaake bud, palle lell lo i terno bakro, hoi maredo well, te well o mensho pale erligo. Kau bakro well pre hadedo glan o baro Debleste, te well i pale-tchiddo koowa krik lino. Koi pashel lell lo jek kilogrammi jarro, kai djet dren hi, te well kowa ninna glan o baro Debleste anlo. Ninna anell lo jek khoro djet,

²²dui diwje taube oder dui wawar taube. Koi jek well maredo, te well o pale-tchiddo koowa krik lino, koi wawar, te well li tseles chatchedo o baro Debleske.

²³Ap o ochtato diwes fun ko tsiro, kai lo erligo kerdo well, anell lo len pash o rashajeste glan o wudar o plachteno kherestar, kai o baro Dewel djiwell.

²⁴O rashai lell ko terno bakro, hoi maredo well, te well o mensho pale erligo, un hadell les pre glan o baro Debleste. Jaake krell lo ninna o djeteha.

²⁵Palle marell lo ko terno bakro un makell o ratestar tella ap o tchatcho kand kolestar, kai sasto was, ninna ap leskro tchatcho pesso gushto un ap o tchatcho pesso tsebo.

²⁶O rashai lell ko khoro djet un tchorell tchomone kolestar an peskro serwo wast.

²⁷Palle tchiwell lo peskro tchatcho gushto an ko djet, hoi an leskro serwo wast hi, un witsrell ko djetestar efta kope ap o Debleskri chatchepaskri.

²⁸Palle makell lo ko djetestar, hoi an leskro serwo wast pral atchas, tella ap o tchatcho kand un ap o tchatcho pesso gushto un ap o tchatcho tsebo kolestar, kai sasto was, ap ko rat, hoi lo glan kowa kote pre makas.

²⁹Ko djet, hoi gomme an leskro wast hi, makell lo ap o shero kolestar, kai sasto was. Jaake krell lo, te well ko mensho pale erligo glan o baro Debleste.

³⁰Pal kowa marell o rashai koi jek tauba, hoi ko mensho anas — nai well i diwji tauba, nai well i wawar tauba —

³¹te well o pale-tchiddo koowa krik lino, un koi pal koi wawar tauba, hoi well tseles chatchedo ap o Debleskri chatchepaskri. Un koi pashel anell lo ko chapen dran jarro glan o baro Debleste. Jaake krell o rashai, te well kowa, kai sasto was, pale erligo glan o baro Debleste.

³²Jaake hunte well kerdo koleha, kai i djungelo nasslepen ap peskri hauta his, un kowa gar jaake brawelo hi, te nai anell lo triin bakre, te well lo pale erligo kerdo.

³³O baro Dewel penas ap o Mose un ap o Aron:

³⁴Te wenn tumer an o them Kanaan, hoi me tumen dau, te well kau them tumenge, un me mukau kote an i kheer i djungelo kotar win te well,

³⁵palle hunte djal kowa, koleske ko kheer hi, pash o rashajeste un penell leske: “Mange dikell kowa win, har te phagals i djungelo kotar ap miro kheer win.”

³⁶Glan te djal o rashai an ko kheer, te dikell lo peske kowa an, mukell lo ko tselo koowa dran ko kheer win te anell, te well gar kowa lauter pale-tchiddo. Palle djal lo dren un dikell pes ko kheer an.

³⁷Te dikell lo djungele senele oder lole kotja ap i barra, un kowa dikell win, har te chals pes ko djunglepen an i barra dren,

³⁸palle djal o rashai dran ko kheer win un pandell ko kheer efta diwessa tele.

³⁹Pal efta diwessa well lo pale an ko kheer, un dikell peske kol djungele kotja pale an. Te was ko djunglepen bareder ap i barra ko kherestar,

⁴⁰palle penell o rashai, te wenn kal barra wi-phagedo, kai ko djunglepen pre hi, un wenn win witsedo glan o foro ap i pale-tchiddi platsa.

⁴¹Un ko tchik, hoi dren an o kheer ap i barra maklo was, hunte well tele lino un well wi-tchoredo win glan o foro ap i pale-tchiddi platsa.

⁴²Un kote, kai i barra win phagedo wan, wenn wawar barra dren tchiddo. Un wawar tchik well ap i barra pre maklo.

⁴³Te well ko djunglepen pale win ap i barra an ko kheer,

⁴⁴palle well ko rashai un dikell kowa peske an. Te djas ko djunglepen dureder, palle hi i djunglepen, hoi trul peste chal. Ko kheer hi pale-tchiddo,

⁴⁵un hunte well tele phagedo. Un leskre barra un leskro kasht un koi tchik ap i barra, kowa lauter well win anlo glan o foro ap i pale-tchiddi platsa.

⁴⁶Kowa, kai djal dren an ko kheer, jaake rah har kowa tele pandlo hi, kowa well pale-tchiddo, bis te well rati.

⁴⁷Kowa, kai sowell oder chal an ko kheer, hunte thowell peskre koola.

⁴⁸Te djal o rashai pale dren, un job dikell, te djas ko djunglepen gar dureder pal kowa, kai makan le wawar tchik ap i barra, palle rakrell o rashai win, te hi o kheer buder gar pale-tchiddo. Ko djunglepen djas krik.

⁴⁹Palle krell lo tchomone, te nai djiwenn i menshe pale an ko kheer: Job lell dui tchirkle, ninna zedertikro kasht, un lole thaba, un patria i burrestar, hoi kharell Ysop.

⁵⁰Un job marell ko jek tchirklo pral i tcharo, kai djudjo pani dren hi.

⁵¹Palle tchiwell lo o djido tchirkles an ko tcharo, kai pani un o rat o maredo tchirklestar dren hi. Khetne leha tchiwell lo ko zedertikro kasht, kol lole thaba un kol patria Ysop koi dren, an ko tcharo, un witsrell ko ratlo panjestar efta kope ap ko kheer,

⁵²te well o pale-tchiddo koowa dran ko kheer krik lino.

⁵³Palle mukell lo ko djido tchirkles win te djal dran o foro. Jaake lell lo ko pale-tchiddo koowa ko kherestar krik. Un i menshe nai djiwenn pale an o kheer.

⁵⁴Pal kal laba hunte well kerdo, te hi jekes i nasslepen ap peskri hauta, djungelo oder gar djungelo,

⁵⁵kote, kai sikrell pes i pessepen, nassele kotja un parne kotja ap i hauta. Un pal kal laba hunte well kerdo, te sikrell pes i djunglepen ap ripja oder an khera.

⁵⁶

⁵⁷Jaake nai well win hatslo, hi i mensho oder i koowa pale-tchiddo oder gar.