Read O Debleskro Drom - I Bibla an o Romano Rakepen 2021 3. Mose 15 Bible Online

3. Mose 15 - O Debleskro Drom - I Bibla an o Romano Rakepen 2021 bible

3. Mose 15

¹O baro Dewel penas ap o Mose un ap o Aron:

²Pen ap i Israelende: Te nashell tchomone dran i mursheskro mass, palle hi lo pale-tchiddo.

³Hi jek te nashell kowa o tselo tsiro oder pale te pale; pale-tchiddo hi lo.

⁴Hako tchiben, ap koleste job tchiddo hi, un haki beshepaskri, ap kolate job beshdo hi, hi pale-tchiddo.

⁵Koon koleskro tchiben an-tapras, hunte thowell pes un peskre koola, un hi pale-tchiddo bis te well rati.

⁶Koon beshas pes ap tchomone, kai ko nasselo beshdo his, kowa hunte thowell pes un peskre koola, un hi pale-tchiddo, bis te well rati.

⁷Koon ko nasseles an-tapras, kowa hunte thowell pes un peskre koola, un hi pale-tchiddo bis te well rati.

⁸Te tchungrell ko nasselo ap jekeste, kai gar pale-tchiddo hi, hunte thowell pes kowa un ninna peskre koola, un hi pale-tchiddo, bis te well rati.

⁹Ninna ko ledertikro kotar, ap koleste ko nasselo klissas, hi pale-tchiddo.

¹⁰Koon tchomone an-taprell, ap koleste ko nasselo tchiddo oder beshdo his, well pale-tchiddo, bis te well rati. Koon tchomone hidjrell, ap koleste ko nasselo tchiddo oder beshdo his, hunte thowell pes un peskre koola, un hi pale-tchiddo, bis te well rati.

¹¹Te taprell ko nasselo jekes an, un leskre wasta his gar thodo, palle hunte thowell pes kowa, kai an-tapedo was, un peskre koola, un hi pale-tchiddo bis te well rati.

¹²Kol tchare, hoi dran tchik kerdo hi, un kolen ko nasselo an-tapras, hunte wenn paash dino. Halauter, hoi dran kasht kerdo was, un kolestar an-tapedo was, hunte well an pani tele thodo.

¹³Te well ko nasselo pale sasto, ginell[22] lo peske efta diwessa tele. Palle thowell lo peskre koola un thowell pes djudjo panjeha tele; palle hi lo pale erligo.

¹⁴Ap o ochtato diwes anell lo dui diwje taube oder dui wawar taube pash o rashajeste glan o wudar o plachteno kherestar, kai o baro Dewel djiwell.

¹⁵Ko rashai marell koi jek, te well ko pale-tchiddo koowa krik lino, un koi wawar, te well li tseles chatchedo o baro Debleske. Jaake krell o rashai, te well ko mursh, kai dran peskro nasslepen pale-tchiddo his, pale erligo glan o baro Debleste.

¹⁶Te djal i mursheske jek tele, palle thowell lo peskro tselo kerpro tele, un job well pale-tchiddo, bis te well rati.

¹⁷Leskro tselo an-ripen un haki ledertikro kotar, ap koleste kowa was, hunte well tele thodo un well pale-tchiddo bis te well rati.

¹⁸Te sowell i mursh i djuwjah, un leske djal jek tele, hunte thowenn pen kol dui, un hi pale-tchiddo, bis te well rati.

¹⁹Te hi i djuwjat peskri djuwjakro koowa, palle atchell li efta diwessa pale-tchiddo. Hakeno, kai lat an-taprell, well pale-tchiddo, bis te well rati.

²⁰Un halauter, kai li an kau tsiro pre tchiddo oder beshdo his, hi pale-tchiddo.

²¹Hakeno, kai lakro tchiben an-taprell, hunte thowell pes un peskre koola, un atchell pale-tchiddo, bis te well rati.

²²Hakeno, kai kowa an-taprell, kai li pre-beshdo his, hunte thowell pes un peskre koola un atchell pale-tchiddo, bis te well rati.

²³Un koon tchomone an-taprell, hoi kote tchiddo his, kai li tchiddo oder beshdo his, atchell pale-tchiddo bis te well rati.

²⁴Te hi i mursh pash jekate tchiddo, un lat well peskri djuwjakro koowa, palle hi lo efta diwessa pale-tchiddo. Un ko tchiben, kai job tchiddo his, well pale-tchiddo.

²⁵Te hi i djuwjat peskri djuwjakro koowa bud diwessa oder an i tsiro, kai hunte well kowa gar, palle hi li an kau tselo tsiro pale-tchiddo.

²⁶Hako tchiben, kai li tchiddo hi, un hako koowa, kai li pre-beshdo hi an ko tsiro, hi pale-tchiddo.

²⁷Kowa, kai tchomone kolestar an-taprell, kowa hi pale-tchiddo, un hunte thowell pes un peskre koola, un atchell pale-tchiddo bis te well rati.

²⁸Te was li pale sasto un ratell buder gar, ginell[23] li peske efta diwessa tele, pal kolende hi li pale erligo.

²⁹Ap o ochtato diwes anell li dui diwje taube oder dui wawar taube pash o rashajeste glan o wudar o Debleskro plachteno kherestar.

³⁰Ko rashai marell koi jek tauba, te well o pale-tchiddo koowa krik lino, un koi wawar, te well li tseles chatchedo o baro Debleske. Jaake krell o rashai, te well koi djuwel, kai ratas un doleske pale-tchiddo his, pale erligo.

³¹Un o baro Dewel penas ap o Mose un ap o Aron: Denn i Israelitarjen trad, te atchenn le i kotar dur miro kherestar an ko tsiro, kai hi le pale-tchiddo, te krenn le gar koi platsa pale-tchiddo, kai me djiwau mank lende, te merenn le gar.

³²Pal kal laba hunte well kerdo i mursheha, dran koleskro mass tchomone win nashell, un koleske jek tele djal, jaake te was lo pale-tchiddo.

³³Un pal kal laba hunte well kerdo i djuwjah, kolat peskri djuwjakro koowa hi, un i mursheha, kai sowell khetne i djuwjah, kolat peskri djuwjakro koowa hi.