Read O Debleskro Drom - I Bibla an o Romano Rakepen 2021 3. Mose 18 Bible Online

3. Mose 18 - O Debleskro Drom - I Bibla an o Romano Rakepen 2021 bible

3. Mose 18

¹O baro Dewel penas ap o Mose:

²Pen ap i Israelitarja: Me, o baro Dewel, hom tumaro Dewel.

³Ma djiwenn jaake har i Egiptarja, an kolengro them djiwan, witar gar har kolla an o them Kanaan, kote kai tumen anau. Ma djiwenn pal lengro koowa.

⁴Pal miro tchatchepen hunte djiwenn, un krenn, hoi me tumendar kamau. Me, o baro Dewel, hom tumaro Dewel.

⁵Doleske krenn, hoi me tumendar kamau, un djiwenn pal miro tchatchepen. I mensho, kai rikrell pes ap kowa, koles hi tchatchepah o djipen. Me hom o baro Dewel.

⁶Kek tumendar hunte sowell i djuwjah dran peskri familja. Kowa penau me, o baro Dewel.

⁷Tu sowess gar tiri dah, te aness kek ladj ap tiro dadeste. Joi hi tiri dai.

⁸Tu sowess gar i wawar romjah tiro dadestar, te aness kek ladj ap tiro dadeste.

⁹Tu sowess gar tiri phenjah, koi tchai tiro dadestar oder tiri datar; hi jek te was li bares an tiri familja oder an i wawar familja.

¹⁰Tu sowess gar i mit i tchai tiro tchawestar oder tiri tchatar, te aness kek ladj ap tute.

¹¹Tu sowess gar mit i tchai tiro dadeskri romjatar. Joi hi tiri pheen.

¹²Tu sowess gar tiri bibjah, koi pheen tiro dadestar. Joi hi leskro ratestar.

¹³Tu sowess gar tiri bibjah, koi pheen tiri datar. Joi hi lakro ratestar.

¹⁴Tu sowess gar i romjah tiro kakestar. Joi hi tiri bibi.

¹⁵Tu sowess gar tiro tchaweskri romjah.

¹⁶Tu sowess gar tiro phraleskri romjah, te aness kek ladj ap tiro phraleste.

¹⁷Tu sowess gar i djuwjah un ninna mit lakri tchai, oder lakro tchaweskri tchai oder lakri tchakri tchai. Kalla hi lakro ratestar. Kawa wals i wi-ladjedo koowa.

¹⁸Tu less gar i phenjat tiri romjatar, te well li tiri duiti romni, jaake rah har tiri romni djiwell.

¹⁹Tu sowess gar i djuwjah jaake rah har lat peskri djuwjakro koowa hi.

²⁰Tu sowess gar i romjah i wawarestar, te kress tut gar pale-tchiddo.

²¹Tu chatchress kek tire tchawendar o chocheno debleske Moloch. Sau koowa sikrals, te hom me, tiro Dewel, tuke tchi moldo. Me hom o baro Dewel!

²²Kek mursh te sowell i wawar mursheha. I baro pale-tchiddo koowa hi sau kowa.

²³Kek mursh un kek djuwel te sowell i viecheha. Koon kowa krell, krell pes pale-tchiddo un anell bari ladj ap peste.

²⁴Ma krenn tumen sau koweha pale-tchiddo! Kowa lauter kras kol wawar menshe pale-tchiddo, kolen me glan tumende dran o them win tradau.

²⁵O tselo them was koleha pale-tchiddo kerdo. Me anau lengri doosh ap lende pale, un krau, te wenn kol menshe win tradedo dran ko them, kai le djiwenn.

²⁶Doleske krenn kowa, hoi me tumendar kamau, un djiwenn pal miro tchatchepen, tumer un ninna ko wi-themari, kai mank tumende djiwell! Krenn kek sawo pale-tchiddo koowa,

²⁷hoi kolla kran, kai glan tumende kate djiwan un o them pale-tchiddo kran.

²⁸Te krenn tumer kau them ninna pale-tchiddo, wenn tumer dran kau them win tradedo har kol wawar menshe, kai glan tumende kai his.

²⁹Hakeno, koon sau pale-tchiddo koowa krell, well infam, un nai djiwell buder gar mank peskre menshende.

³⁰Doleske, djiwenn jaake har me tumenge penom! Ma krenn ko pale-tchiddo koowa, hoi kolla kran, kai glan tumende kate his! Ma krenn tumen sawo koweha pale-tchiddo! Me, o baro Dewel, hom tumaro Dewel.