Read O Debleskro Drom - I Bibla an o Romano Rakepen 2021 3. Mose 6 Bible Online

3. Mose 6 - O Debleskro Drom - I Bibla an o Romano Rakepen 2021 bible

3. Mose 6

¹Un o baro Dewel penas ap o Mose:

²Pen ap o Aron un leskre mursh tchawende: Jaake hunte krenn tumer o viecheha, koleskro tselo mass mange chatchedo well: Ko mass atchell ap i chatchepaskri koi tseli rat, bis te well o newo diwes. Un koi jag ap i chatchepaskri hunte chatchell i tseli rat un djal gar win.

³O rashai riwell peskro laintikro gad an, un ninna kol laintikre cholopja. Job lell i jagakri tchik krik, hoi well ko viechestar, koleskro tselo mass chatchedo was. Un job tchorell koi tchik win pash i chatchepaskri.

⁴Palle riwell lo peskre koola win un wawar koola an, un hidjrell koi jagakri tchik win dran koi platsa, kai i menshe hi, ap i platsa, hoi hi djudjo o Debleske.

⁵Un koi jag ap i chatchepaskri chatchell dureder, un djal ko tselo tsiro gar win. Haki taissarla tchiwell o rashai kasht pre, un koi pre ko mass ko viechestar, hoi well tseles chatchedo, ninna kol kotja thulepen ko viechestar, hoi i menshe khetne chan. Un o rashai mukell lauter pre te chatchrell.

⁶Koi jag ap i chatchepaskri hunte chatchell hako tsiro, un hunte djal gar win.

⁷Un jaake hunte well kerdo o jarreha, hoi o baro Debleske dino well. I rashaja dran o kheer Aron anenn les glan o baro Debleste pash koi chatchepaskri.

⁸Jek lendar lell kolestar i wast pherdo jarro, kai djet dren hi, ninna ko tselo sungepaskro koowa, hoi pral o jarro tchiddo hi, un mukell kowa ap o Debleskri chatchepaskri pre te chatchrell. Jaake sikrell lo, te hi ko tselo chapen o baro Debleske. Un ko latcho sungepen, hoi well win, sungell mishto o baro Debleske.

⁹Ko jarro un ko djet, hoi pral atchell, kowa hi o Aroneske un leskre mursh tchawenge. Te krenn le pengro maro kolestar, hunte tchiwenn le kek shutlo jarro dren. Ap koi platsa glan o Debleskro plachteno kheer hunte chan le les. Kaja hi i Debleskri platsa. Kau chapen dell o baro Dewel lenge kolestar, hoi i menshe leske anan. Kowa hi i Debleskro chapen. Doleske nai chan les kokres i rashaja, jaake har ninna ko mass kol viechendar, hoi wenn maredo, te well i doosh un o pale-tchiddo koowa krik lino, un o mass kol viechendar, hoi wenn maredo, te well i doosh pale mishto.

¹¹Kokres kol mursh tchawe, kai wenn o Aronestar, nai chan kolestar. Kowa hi hako tsireske lengro kotar kolestar, hoi i menshe o baro Debleske anenna. Hako wawar, kai taprell kowa an, lell peskri phagi.

¹²Un o baro Dewel penas ap o Mose:

¹³Ap ko diwes, kai well jek dran o kheer Aron an peskri budi dren tchiddo, te well lo miro rashai, hunte anell lo mange i khoro[10] latcho jarro — jaake bud har ko chapaske lino well, hoi hako diwes o baro Debleske anlo well[11]. Ko jek paash anell lo leske taissarlakro un ko wawar paash rati.

¹⁴An o sasterno tcharo well o jarro khetne kerdo o djeteha, palle peklo, an kotja phagedo un o baro Debleske chatchedo. Un ko latcho sungepen, hoi well win, sungell mishto o baro Debleske.

¹⁵Un ko rashai dran o kheer Aron, kai pal Aroneskro merepen o pralstuno rashai well, kawa krell kowa, un chatchrell ko tselo chapen ap i chatchepaskri. Jaake hunte well kawa kerdo o baro Debleske hako tsireske.

¹⁶Hako kopo, kai anell i rashai peske i chapen dran djob o baro Debleske, hunte well ko tselo chapen chatchedo. Kek chal les.

¹⁷Un o baro Dewel penas ap o Moseste:

¹⁸Pen o Aroneske un leskre mursh tchawenge, har i viecheha kerdo well, hoi i menshe o baro Debleske anenn, te well lengri doosh krik lino. Glan o baro Debleskro kheer, ap koi platsa, kai well ninna ko viecho maredo, koleskro tselo mass chatchedo well, ap kai platsa maress tu ninna ko vieches, hoi hunte merell, te well i doosh krik lino. O mass sau viechestar, hoi o Debleske anlo was, nai chan kokres i rashaja un kek wawar.

¹⁹Ko rashai, kai leskre feteder kotja o Debleske chatchrell, chal o mass ap i glanstuni platsa glan o Debleskro plachteno kheer. Kaja hi i Debleskri platsa.

²⁰Hako wawar, kai ko mass an-taprell, lell peskri phagi. Te well tchomone ko ratestar ap jekeskre koola, palle hunte thowell lo ko kotar ap i platsa, hoi djudjo hi o Debleske.

²¹Te was ko mass keredo an i piri, hoi dran tchik kerdo was, hunte well koi piri an kotja phagedo. Te was ko mass an i sasterni piri keredo, palle well li sorjah un panjeha win thodo.

²²I tsele mursha un mursh tchawe an i rashajengre familje nai chan kau mass. Jon kokres doleske, kai kau mass ko viechestar was, hoi o baro Debleske anlo was.

²³Te was o rat sau viechestar an o Debleskro kheer dren lino, te well lauter pale mishto mank i menshende un o baro Debleste, palle hunte chal kek leskro mass. Kau mass well an i jag chatchedo.