Read O Debleskro Drom - I Bibla an o Romano Rakepen 2021 3. Mose 7 Bible Online

3. Mose 7 - O Debleskro Drom - I Bibla an o Romano Rakepen 2021 bible

3. Mose 7

¹Jaake hunte well kerdo ko viecheha, hoi i menshe anenn, te well lengri doosh pale mishto kerdo. O mass sau viechestar nai chan kokres i rashaja un kek wawar.

²Ap koi platsa, kai well ninna ko viecho maredo, koleskro tselo mass chatchedo well, ap kai platsa hunte well ko viecho maredo, hoi jek anas, te well leskri doosh pale mishto kerdo. Un o viecheskro rat well win tchoredo trul o Debleskri chatchepaskri.

³Leskro tselo thulepen anell o rashai o baro Debleske, koi thulli pori un ko thulepen, hoi ap i buke hi,

⁴kol dui niere un ko thulepen, hoi ap lende hi, un ko thullo kotar, hoi ap i lebra hi. Pash i niere hunte well o thulepen tele tchinlo.

⁵O rashai mukell kowa lauter ap i chatchepaskri pre te chatchrell o baro Debleske. Jaake well ko mensheskri doosh pale mishto kerdo.

⁶I mursha un i mursh tchawe dran i rashajengre familje nai chan o mass ap i Debleskri platsa. Ko mass well i viechestar, hoi o baro Debleske anlo was. Doleske nai chal les kek wawar.

⁷Jaake har pash ko viecho, hoi i doshake maredo well, jaake hi ninna pash ko viecho, hoi maredo well, te well o mensheskri doosh pale mishto kerdo. O viecheskro mass hi ko rashajeske, kai o viecheskro thulepen chatchrell, te well pale lauter mishto mank ko mensheste un o Debleste.

⁸Ko rashai, kai o viecho jekestar glan o baro Debleste anell, koleskro tselo mass chatchedo well, koleske hi o viecheskri hauta.

⁹Un o tselo chapen dran djob, hoi an o bob peklo was, an i piri keredo was, oder an i sasterno tcharo peklo was, kowa hi ko rashajeske, kai ko chapen glan o baro Debleste anas.

¹⁰Ko wawar chapen dran djob, o djeteha oder kek djeteha, kowa hi i tsele rashajenge dran o kheer Aron, ko jekeske har ko wawareske.

¹¹Un jaake hunte well kerdo ko viecheha, hoi well glan o baro Debleste anlo, te chan les i menshe palle khetne.

¹²Te anell jek les, te kamell lo pes pash o baro Debleste te parkrell, palle hunte anell lo ninna merklia kerdo djeteha, an kolende kek shutlo jarro hi, un sane mare an kolende kek shutlo jarro hi, kai djet pral maklo was, ninna merklia kerdo dran latcho djob un djet.

¹³Pash kowa, hoi anenn le, te parkrenn le pen pash o baro Debleste, anenn le mare, hoi shutlo jarreha kerdo was.

¹⁴Jek kotar hakenestar well glan o baro Debleste anlo. Kowa lell o rashai, kai o rat ko maredo viechestar trul o Debleskri chatchepaskri tchoras.

¹⁵Ko mass kau viechestar, hoi jek glan o baro Debleste anas, te parkrell lo pes pash leste, hunte well ap kau emligo diwes chalo, un tchi kolestar atchell tchiddo bis taissarlakro.

¹⁶Te das jek pes sowel te dell lo tchomone o Debleste, un anell doleske sau viecho o Debleske, well ko mass ko emligo diwes chalo. Te atchell tchomone pral, nai chan le les o wawar diwes ninna. Jaake hunte well ninna kerdo, te das jek i viecho pestar o baro Debleste.

¹⁷Hi gomme o triinto diwes tchomone pral, hunte well kowa an i jag chatchedo.

¹⁸Te chal jek ap o triinto diwes gomme ko massestar, palle dikell o baro Dewel gar latches ap kowa un ap koleste, kai anas ko viecho glan leste. O mass was pale-tchiddo. Un koon chal kolestar, hunte hidjrell peskri doosh, hoi job koleha ap peste las.

¹⁹Ko mass, hoi tchomoneha khetne well, hoi pale-tchiddo hi, kowa hunte well gar buder chalo. An i jag witsedo un chatchedo hunte well ko mass. Kokres kowa, kai gar pale-tchiddo hi glan o baro Debleste, nai chal ko mass, hoi o baro Debleske anlo was.

²⁰Kowa kai chal ko mass, hoi o baro Debleste dino was, un ap leste hi i pale-tchiddo koowa, kowa well infam un hi buder kek Israelitari.

²¹Te taprell jek tchomone an, hoi pale-tchiddo hi, i menshestar oder i viechestar oder i wawar pale-tchiddo koowa, un palle chal lo kau mass, hoi glan o baro Debleste anlo was, kowa well infam un hi buder kek Israelitari.

²²Un o baro Dewel rakras ap o Mose:

²³Rake ap i Israelitarja un pen lenge: “Ma chan o thulepen i grumjendar, bakrendar un busjendar!

²⁴O thulepen kol viechendar, kai meran, oder wan mulo dandedo diwje viechendar, nai lenn un krenn tchomone koleha. Ma chan les!

²⁵Kowa, kai chal ko thulepen sawe viechendar, kai o baro Debleske anlo wan, kowa well infam un hi buder kek Israelitari.

²⁶Ma chan witar kek rat — kek rat i viechestar un kek rat i tchirklestar, kai tumer ninna djiwenna!

²⁷Hakeno, kai chal o rat, well infam un hi buder kek Israelitari.”

²⁸Un o baro Dewel rakras ap o Mose:

²⁹Rake ap i Israelitarja un pen lenge: Kowa kai anell o baro Debleske i viecho, hoi chan i menshe palle khetne glan leste, kowa dell o baro Debleste kolestar ko kotar, hoi o Debleske hi.

³⁰Peskre wastentsa hunte anell lo les, te well lo chatchedo o baro Debleske: Ko thulepen un ko betch. Ko betch well pre hadedo glan o baro Debleste.

³¹O rashai mukell o thulepen te chatchrell ap i chatchepaskri. I betch hi o Aroneske un leskre mursh tchawenge.

³²O tchatchi heri kau viechestar hi ninna ko rashajeske,

³³kai anell o rat un o thulepen glan o baro Debleste kol viechendar, hoi chan i Israelitarja palle khetne glan o Debleste.

³⁴O baro Dewel penell i Israelenge, kai anenn leske i vieches, te chan le les khetne glan leste, te denn le o betch un i tchatchi heri o rashajeste, o Aroneste, un leskre mursh tchawende. Kal kotja mass hi i rashajenge dran o kheer Aron hako tsireske fun ko diwes, kai wan le dren tchiddo an pengri rashajengri budi. Un i Israelitarja hunte denn len i rashajende. Kau lab atchell jaake hako tsireske, hoi wella.

³⁷Kawa hi hoi glan tchinlo was: pral ko viecho, koleskro tselo mass chatchedo well; pral o chapen dran djob, hoi o Debleske anlo well; pral ko viecho, hoi maredo well, te well i doosh un o pale-tchiddo koowa krik lino; pral ko viecho, hoi maredo well, te well o mensheskri doosh pale mishto kerdo; pral ko viecho, hoi maredo well ap ko diwes, kai well o rashai an peskri budi dren tchiddo; pral ko viecho, hoi chan le khetne, koleskre feteder kotja o Debleske chatchedo wan.

³⁸Jaake penas kowa o baro Dewel ap o Moseste, har his lo pral ap i berga Sinai, ap ko diwes, kai job i Israelenge penas, te anenn le viechen o baro Debleske an o mulo tato them Sinai.