Read O Debleskro Drom - I Bibla an o Romano Rakepen 2021 3. Mose 8 Bible Online

3. Mose 8 - O Debleskro Drom - I Bibla an o Romano Rakepen 2021 bible

3. Mose 8

¹Un o baro Dewel penas ap o Mose:

²Le o Arones un leskre mursh tchawen tuha, un i rashajengre koola, un o djet un ko terno gurum, hoi i doshake maredo well, un kol dui mursh bakre un koi korba, kai i mare dren hi, kai kek shutlo jarro dren hi.

³Muk i tsele Israelitarjen glan o wudar o Debleskro plachteno kherestar khetne te well.

⁴O Mose kras jaake har o baro Dewel penas. Un i tsele Israelitarja wan khetne glan o wudar o Debleskro plachteno kherestar.

⁵Un o Mose penas ap lende: Kawa hi, hoi o baro Dewel penas, te hunte kras mer.

⁶Un job mukas o Arones un leskre mursh tchawe glan te well, un thowas len o panjeha.

⁷Job riwas o Aroneske o laintikro gad an un tchiwas leske o pereskri dori trujel, palle i baja un o rashajeskri damdira. Palle pandas lo ko pereskro pandepen, hoi ap i damdira hi, trul leste.

⁸Palle tchiwas lo o betcheskri possita ap leste. Un an koi possita tchiwas lo kol dui tikne koola[12], hoi kharenna ‘momeli’ un ‘tchatchepen’.

⁹Palle tchiwas lo o shereskro pandepen trul leskro shero, un glan ap koleste i tikno sonakaskro kotar, jaake har o baro Dewel les o Moseske penas.

¹⁰O Mose las o djet un witsras[13] kolestar tchomone ap o tselo plachteno kheer, kai o baro Dewel djiwell, un ap lauter hoi dren hi. Jaake sikras lo, kai kowa lauter o baro Debleske hi.

¹¹Efta kope witsras lo ko djetestar tchomone ap i chatchepaskri un kol tsele koola, kolentsa budrenn le, ninna ap o panjeskro tcharo un ap kol herja koi tel, te well kowa lauter o baro Debleske.

¹²Palle las o Mose ko djet, un tchoras kolestar ap o Aroneskro shero, un kras jaake, te well job o baro Debleskro rashai.

¹³Un o Mose mukas o Aroneskre tchawe glan te well, un riwas lenge i laintikre gada an, un pandas lenge i pereskro pandepen trujel, un tchiwas i rashajengre stadja ap lengre shere. Kowa lauter kras lo jaake, har o baro Dewel kowa leske penas.

¹⁴Job mukas o terno gurum te anell, hoi i doshake maredo well. O Aron un leskre tchawe tchiwan pengre wasta ap o shero ko terno viechestar.

¹⁵Un o Mose maras les kote, un las tchomone ko ratestar, un makas peskro gushteha ko rat ap i shinga, hoi pral ap i star ekke ap i chatchepaskri hi. Ko tselo wawar rat tchoras lo tella pash i chatchepaskri win. Jaake las lo koi tseli doosh un ko tselo pale-tchiddo koowa krik, hoi ap koi chatchepaskri his, te nai well li o Debleske dino.

¹⁶Job las o tselo thulepen, hoi ap i buke hi, un ko thullo kotar, hoi pral i lebra hi, un kol dui niere un lengro thulepen, hoi ap lende hi! Kowa lauter chatchras lo ap o Debleskri chatchepaskri.

¹⁷Kowa, hoi pral atchas kau viechestar, leskri hauta un leskro mass, un ko chapen, hoi an leskre buke his, chatchras lo an i jag win glan koi platsa, kai i menshe his, jaake har o baro Dewel leske penas, te krell lo.

¹⁸Palle las lo ko jek bakro, koleskro tselo mass chatchedo well o baro Debleske. Un o Aron un leskre tchawe tchiwan pengre wasta ap o viecheskro shero.

¹⁹Un o Mose maras les, las leskro rat un tchoras les trul o Debleskri chatchepaskri win.

²⁰Un job tchinas o mass an kotja, un tchiwas o shero, kol kotja mass un o thulepen ap i chatchepaskri.

²¹Un job thowas leskre buke un leskre herja o panjeha, un tchiwas len ninna ap i chatchepaskri, un mukas ko tselo vieches pre te chatchrell ap o Debleskri chatchepaskri. Jaake har o baro Dewel penas, was ko tselo bakro leske chatchedo. Un o latcho sungepen, hoi was win, sungas mishto o baro Debleske.

²²Job mukas o duito mursh bakro te anell, kai doleske maredo well, te wenn i rashaja an pengri budi dren tchiddo. Un o Aron un leskre tchawe tchiwan pengre wasta ap o viecheskro shero.

²³Un o Mose maras les, las leskro ratestar un makas les tella ap o Aroneskro tchatcho kand, ninna ap o pesso gushto ap leskro tchatcho wast, un ap o baro tsebo leskro tchatcho pirestar.

²⁴Palle mukas lo o Aroneskre mursh tchawe te well. un makas ko ratestar tella ap lengro tchatcho kand, ninna ap o pesso gushto ap lengre tchatche wasta, un ap o baro tsebo lengre tchatche pirendar. O tselo wawar rat tchoras o Mose trul i chatchepaskri win.

²⁵Job las o thulepen kau maredo bakrestar: i thulli pori, ninna o thulepen, hoi ap i buke hi, un ko kotar, hoi pral i lebra hi, un kol dui niere un lengro thulepen, hoi ap lende hi, un o pralstuno kotar i tchatchi herjatar.

²⁶Dran koi korba an kolate o maro hi, an koleste kek shutlo jarro hi, un hoi o baro Debleske dino was, las lo jek merkli, kai kek shutlo jarro dren hi, jek djeteskri merkli, un jek sano maro. Un tchiwas len ap ko kotja thulepen, un ap ko pralstuno kotar o tchatchi herjatar.

²⁷Kowa lauter das lo an i wasta o Aronestar un leskre mursh tchawendar. Un jon hadan les pre glan o baro Debleste, te sikrenn le, kai kowa leske hi.

²⁸Un o Mose las lauter pale dran lengre wasta, tchiwas les ap o Debleskri chatchepaskri pral pre ap ko mass ko viechestar, hoi well tseles chatchedo, un mukas les te chatchrell. Kawa hi ko chapen, hoi was o baro Debleske chatchedo, har wan i rashaja an pengri budi dren tchiddo. Un o latcho sungepen, hoi was win, sungas mishto o baro Debleske.

²⁹O Mose las o betch ko duito bakrestar, un hadas les pre glan o baro Debleste, te sikrell lo, kai kowa leske hi. Kau betch his ko kotar, hoi nai las o Mose peske, te chal lo les. Jaake penas kowa o baro Dewel.

³⁰Palle las o Mose ko djetestar, hoi o Aroneske un leskre tchawenge ap lengre sherja tchoredo was, ninna ko ratestar hoi ap i chatchepaskri his, un witsras tchomone kolestar ap o Aron un ap leskre koola, ninna ap leskre mursh tchawende un ap lengre koola. Jaake tchiwas lo len ap i rig o baro Debleske, te wenn le leskre rashaja.

³¹O Mose penas ap o Aron un leskre tchawende: Kerenn ko mass pash o wudar glan o Debleskro kheer, un chan les kote, khetne ko mareha dran koi korba! Jaake penas mange kowa o baro Dewel.

³²Kowa, hoi o massestar un ko marestar pral atchell, chatchrenn an i jag!

³³Atchenn efta diwessa glan o wudar o baro Debleskro kherestar! Djan gar kotar krik, bis te kol diwessa trujel hi, kai i vieche maredo un chatchedo wenn doleske, kai wenn tumer dren tchiddo an tumari budi.

³⁴Jaake har kau diwes vieche un chapen glan o baro Debleste anlo wan, jaake hunte well kerdo ap kol diwessa, kai wenna, te well tumari doosh krik lino. Kowa penas o baro Dewel.

³⁵Efta diwessa un ratsja hunte atchenn tumer glan o wudar o baro Debleskro plachteno kherestar. Krenn, hoi job penas, te merenn gar! Jaake penas lo kowa mange.

³⁶O Aron un leskre mursh tchawe kran lauter jaake, hoi o baro Dewel ap o Moseste penas.