Read O Debleskro Drom - I Bibla an o Romano Rakepen 2021 3. Mose 9 Bible Online

3. Mose 9 - O Debleskro Drom - I Bibla an o Romano Rakepen 2021 bible

3. Mose 9

¹Har o ochtato diwes was, kharas o Mose o Arones un leskre mursh tchawen un i phureder dran Israel pash peste,

²un penas ap o Aron: “Le tuke i terno gurum[14] un i mursh bakro, ko gurum, te well lo maredo, te well i doosh krik lino, un ko bakro, te well lo maredo, un leskro tselo mass o baro Debleske chatchedo. Kal dui hunte wenn sasto. Kolla an glan o baro Debleste:

³Un rake i Israelentsa un pen lenge: Anenn jek mursh busni, hoi well maredo, te well i doosh krik lino, ninna i terno gurum un i terno bakro, hoi jek bersh phuro hi, te well lengro mass tseles chatchedo o Debleske. Kol dui hunte wenn sasto.

⁴Anenn ninna i gurum un i mursh bakro, te maras mer len glan o baro Debleste, un chan len kote khetne. Koi pashel anenn jarro, kai djet dren hi, te chatchras mer les o baro Debleske. Kau diwes hi ko diwes, kai o baro Dewel pes tumenge sikrell.”

⁵Jon anan kowa, hoi o Mose penas, glan o wudar o baro Debleskro plachteno kherestar. Un i tsele Israelitarja wan kote khetne glan o baro Debleste.

⁶un o Mose penas: “O baro Dewel penas, te krenn tumer kawa, te sikrell lo pes tumenge an peskro railepen.”

⁷Un o Mose penas ap o Aron: “Ab glan o Debleskri chatchepaskri, un an leske ko vieches, koleha tiri doosh krik lino well, un mare ninna tuke ko vieches, koleskro tselo mass o Debleske chatchedo well. Palle kre kowa kol viechentsa, hoi i Israelitarja anan, te well lengri doosh krik lino. Jaake penas kowa o baro Dewel.”

⁸O Aron was glan i chatchepaskri un maras ko terno gurum, hoi job anas, te well peskri doosh krik lino.

⁹Un leskre mursh tchawe anan leske o rat. Un job tchiwas peskro gushto an o rat, un makas tchomone ko ratestar ap i shinga[15], hoi ap i star ekke pral ap i chatchepaskri hi. Un o wawar rat tchoras lo tella pash i chatchepaskri.

¹⁰O thulepen un i niere un ko thullo kotar ap i lebra chatchras lo ap i chatchepaskri, jaake har o baro Dewel kowa o Moseske penas.

¹¹O mass un i hauta chatchras lo win glan koi platsa, kai i menshe his.

¹²Palle maras lo ko vieches, koleskro tselo mass o baro Debleske chatchedo well. Un leskre tchawe anan leske o rat. Un job tchoras les trul o Debleskri chatchepaskri ap leskre star rigja.

¹³Un jon anan leske kol kotja mass, ninna o shero. Un job chatchras len ap i chatchepaskri.

¹⁴Job thowas i buke, un i palstune herja, un tchiwas len pral ap ko wawar mass ap i chatchepaskri, un chatchras len.

¹⁵Pal kowa anas lo glan o baro Debleste kol viechen, hoi i Israelitarja anan. Job maras koi mursh busni, te well i doosh i Israelendar krik lino, un kras kau viecheha jaake, har lo glan kowa koleha kras, hoi lo peskri doshake maras.

¹⁶Palle maras lo ko viecho, koleskro tselo mass chatchedo well, un kras leha har o baro Dewel penas.

¹⁷Ninna anas lo ko jarro, kai djet dren hi, las i wast pherdo un chatchras les ap i chatchepaskri, jaake har kras lo ap i tsalla, har lo o vieches o Debleske anas, koleskro tselo mass chatchedo was.

¹⁸Palle maras lo ko gurum un ko bakro ko chapaske, hoi i menshe khetne chan glan o baro Debleste. Leskre tchawe anan leske o rat. Un o Aron las ko rat un tchoras les trul i chatchepaskri ap leskre star rigja.

¹⁹Ko thulepen kol dui viechendar, koi thulli pori un o thulepen ap i buke, un i niere un o thullo kotar, hoi ap i lebra hi,

²⁰kau tselo thulepen tchiwas lo ap i betcheskre kotja. Un o Aron chatchras ko thulepen.

²¹Kol betcheskre kotja un i tchatche palstune herja hadas o Aron glan o baro Debleste pre, te sikrell lo, kai kal tsele vieche o baro Debleske his. Jaake penas kowa o baro Dewel o Moseske.

²²Har anas o Aron kal tsele viechen o Debleske, hadas lo peskre wasta pre pral i tsele menshende, un rakras o Debleskri bacht pral lende win. Palle djas lo koi treppa tele fun koi chatchepaskri.

²³Un o Mose un o Aron djan pale an o Debleskro plachteno kheer. Un har le pale win wan, rakran le o Debleskri bacht win pral i tsele menshende. Kote sikras pes o baro Debleskro railepen glan i tsele menshende.

²⁴I jag djas win o baro Deblestar, un chatchras ko mass pre kol viechendar, koleskro tselo mass chatchedo well, ninna kol thulle kotja, hoi ap o Debleskri chatchepaskri tchiddo his. Har kowa i tsele menshe dikan, dan le i bachtjatar gole, un tchiwan pen tele glan o baro Debleste ap i phub.