Read O Debleskro Drom - I Bibla an o Romano Rakepen 2021 Jeremia 12 Bible Online

Jeremia 12 - O Debleskro Drom - I Bibla an o Romano Rakepen 2021 bible

Jeremia 12

¹Baro Dewel, kamoms gar te penap, kai tu doosh ap tute anal. Djinau, tu hal an tiro tchatchepen. Ninna te hi jaake, kamau te putchap tutar, har nai haiwap tiro tchatchepen. Hoske djal kolenge mishto, kai djiwenn i tchilatcho djipen? Hoske hi kolen, kai tutar krik djan, halauter, hoi len hunte well?

²Jon hi har ruka, kai tu tchiwal an i phub. Jon wan baro un sorelo, un hidjrenn bud rukengre. Lengro mui rakrell latchepen tutar, lengro dji hi dur tutar krik.

³Baro Dewel, tu dikeh un prindjreh man, un djineh, kai miro dji hako tsiro pash tute his. Kol wawaren tserde krik har bakre krik tserdedo wenn, te wenn jon maredo! Un tchip len ap i rig, te wenn jon mulo dino!

⁴I rah tsiro hi kau them kek brishineha, un ko tselo senlepen meras tele. I vieche un i tchirkle meran. Kowa lauter was dran o tchilatchepen kol menshendar, kai kate djiwenn. Jon penenna: O Dewel dikell gar, hoi krah.

⁵Te kras tut kowa khino, har nashal khetne wawar menshentsa, har kameh khetne i grajentsa te nashell? Te kameh tu tut ninna kate an o them te khatrell, kai bud menshe hi, hoi kameh tu an o pesso weesh te krell, hoi pash o pani Jordan hi?

⁶Ninna tire phrala un i menshe dran tiro dadeskro kheer mukan tut te perell, un dan tchilatches gole pal tute har kol wawar. Dik tut glan lendar, ninna te rakrenn jon kamlo tuha.

⁷Me mukom mire menshen, ko kheer Israel. Kolen, kai mange win rodom, tradom mandar krik. Kol menshen, kai o djijestar kamau, dom an i wasta kolendar, kai kamenn len te marell.

⁸Mire menshe wan mange har i lewo an o weesh, kai kras o mui pre, un das man tchilatches an-gole. Doleske kamau len buder gar.

⁹O them mire menshendar was i them, kai i diwje djukle khetne wan. Un trul lende hi sawe tchirkle, kai chan mass: Awenn khetne tumer tsele diwje vieche! Kate hi chapen!

¹⁰Bud raja dran wawar themma wan, un kran miro drakengro them paash, un stakran miro kotar phub khetne. Dran miro shukar kotar them kran jon i mulo them.

¹¹Hi ropaske, har paash ko them glan mande tchiddo hi, kek djiwell buder koi. O tselo them hi paash, un kek khaitell les.

¹²Pral ko nango pralstuno them wenn kol kurepangre, kai denn lauter khetne. O baro Dewel anas len kai, te kurenn le pen i menshentsa an o tselo them, jek rigjatar bis ap i wawar. Un kek nai nashell peske lendar.

¹³Mire menshe tchiwan djob an i phub, un subjengro senlepen lan le khetne. Jon maran pen tele, un lan tchi dran lengri phari budi. Lauter his tchitcheske! His koi bari choli o baro Deblestar, hoi kras lauter paash.

¹⁴O baro Dewel penella: Kol tchilatche menshe, kai djiwenn trul mire menshende, un tapran lengro them an, hoi dom mire menshende Israel, te well ko them lengro hako tsireske, kolen lauter tradau dran lengro them win. Un o kheer Juda lau dran lengre wasta win.

¹⁵Pal kowa, kai anom kol wawar menshen dran lengro them, krau me lenge miro dji pale pre, un anau len pale an lengro them, kote, kai jon glan ko tsiro djiwan.

¹⁶Jon sikran mire menshende, har te denn le pen sowel ap o debleste Baal. Kanna well jaake: Te mukenn jon pen mire menshendar te sikrell, har te denn jon pen ap miro lab sowel, un penenn: Pash o djido Debleste … palle mukau len mashkral mire menshende te djiwell.

¹⁷Te hi jek natsjona koi, hoi kamell gar ap mande te shunell, lau lake lakro them hako tsireske krik, un kai natsjona djal tel. Kowa penell o baro Dewel.