Read O Debleskro Drom - I Bibla an o Romano Rakepen 2021 Jeremia 13 Bible Online

Jeremia 13 - O Debleskro Drom - I Bibla an o Romano Rakepen 2021 bible

Jeremia 13

¹O baro Dewel penas mange: Dja un gin tuke i laintikro pereskro pandepen! Un pande kowa trul tute! Muk les gar sapeno te well!

²Un me ginom kowa un pandom les trul mande, har o baro Dewel penas.

³Pal i tsiro rakras o baro Dewel o duito kopo mantsa:

⁴Le ko pereskro pandepen, hoi tu ginal un tchiwal trul tute, un dja pash o lengsto pani Eufrat un khate les mashkral kol bare barra.

⁵Me djom koi un khatrom kowa pash o Eufrat, jaake har o baro Dewel mange kowa penas.

⁶Pal i rah tsiro penas o baro Dewel ap mande: Dja pash o Eufrat un le ko pereskro pandepen pale, hoi mukom tut kote khatrell.

⁷Me djom pash o Eufrat un lom ko pandepen kotar, kai khatrom les. O pandepen his gar buder tselo, un tchi buder moldo.

⁸Koi rakras o baro Dewel mantsa un penas:

⁹Kowa penell o baro Dewel: Ninna kamau me o tselo pre-phurdepen i menshendar dran Juda un Jerusalem paash te krell.

¹⁰Kalla tchilatche menshe, kai kamenn mire laba gar shunell, djan pal pengro shero, un djan wawar deblenge pal, anenn lenge viechen, un mangenn len an. Jon hunte wenn har ko pereskro pandepen, hoi buder tchi molella.

¹¹Jaake har i mursh ko pandepen trul peste pandella, jaake pandom me kol tsele menshen dran Israel un kol tsele menshen dran Juda trul mande, te wenn jon mire menshe. Kamom, te wap dran lende sharedo un miro lab bares un prindjedo well; jon kaman gar ap mande shunell, penell o baro Dewel.

¹²O baro Dewel penas mange: Pen kal menshenge: Kowa penell o baro Dewel, kai o Israeleskro Dewel hi: An i tsele khore well mool tchoredo. Un te penenn jon ap tute: Koon djinell kowa gar, kai an i khore mool dren tchoredo wella?

¹³Palle pen lenge: Kowa penell o baro Dewel: Me kamau lauteren mato te krell, kai djiwenn an kau them: kol bare rajen, kai ap o Davideskri beshepaskri beshdo hi, i rashajen un o Debleskre rakepangren un i tsele menshen, kai djiwenn an o foro Jerusalem.

¹⁴Jaake har kol khore phagenn, te wenn le khetne dino, jaake krau, te phagell jek ap o wawareste, ninna i dada ap lengre tchawende. Jon khaitenn man gar, un i dji hi man witar gar lenge, un rikrau man gar pale, te marap len lauter. Kowa penell o baro Dewel.

¹⁵O baro Dewel rakras tumentsa. Doleske krenn tumare kanda pre, un wenn gar pre-phurdo!

¹⁶Hadenn tumaro baro Debles, jaake rah har o diwes hi, un tumen tumare pire gar an o tamlepen ap i berge dukrenna. Ninna te lurenn tumer ap koi momeli, anell o baro Dewel tamlepen un kali rat pral tumende.

¹⁷Te kamenn tumer kowa gar te shunell, hunte rowap tchorchanes pral tumare pre-phurde djia. O Debleskre menshe wenna pandles krik anlo. Un mire swa herenn gar pre te nashell.

¹⁸Pen o baro rajeske un leskri dake: Awenn tele tumari beshepaskri! I raili rajeskri stadi peras tumaro sherestar tele.

¹⁹Kol forja an o mulo tato them Negev hi pandlo, un koi hi kek, kai krenn len nai pre. Kol tsele menshe dran Juda wan halauter krik anlo.

²⁰Jerusalem, dik hoi wella! Kurepangre wenna kotar, kai norden hi! Hoi well kanna dran kol forja an Juda? Tu hals lenge har i bakrengro, un i menshe koi dren har tire bakre, kolentsa sharal tut.

²¹Hoi peneh tu, te kamell o baro Dewel, te wenn kolla rai pral tute, kai an tire jaka tire mala his? I dukatar deh tu gole har i djuwel, kai lell i ternepen.

²²Un te putcheh tu tutar: Hoske well koi bibacht pral mande, palle penau tuke: Kowa well pral tute ko bud tchilatchepaske, hoi kral. Un kolla hadenn tiro ripen un djan sorjah ap tute.

²³Nai krell i kalo mensho peskri kali hauta wawartchandes? Na-a! Nai krell i diwji margodja peskre balla wawartchandes? Na-a! Jaake nai krenn tumer kek latchepen, ko tchilatchepen djas tumenge an o mass un o rat.

²⁴Doleske tradau tumen kate te kote, te atchenn gar buder khetne, jaake har phurdell o ducho dran o mulo tato them o phuss kate te kote.

²⁵Tumer bistran man un djan chochene deblen palla. Doleske well kai phagi pral tute, Jerusalem, hoi me, o baro Dewel tut dau.

²⁶Kowa well jaake har te hadaus me tiro ripen pral tiro shero, te dikell hakeno, kai nango hal.

²⁷Jerusalem, me dikom, har mukal man, dikom tiri chantch pal wawar deblen, tiro wi-ladjedo koowa, tire figure, kolentsa choiral man ap i berge un ap o them. Tu bibachteli, hal pale-tchiddo glan mande! Har rah kameh tu kowa te atchell?