Read O Debleskro Drom - I Bibla an o Romano Rakepen 2021 Jeremia 14 Bible Online

Jeremia 14 - O Debleskro Drom - I Bibla an o Romano Rakepen 2021 bible

Jeremia 14

¹O baro Dewel penas ap o Jeremia pral ko them, kai i rah tsiro kek brishin das.

²O them Juda hi bibachtelo koi tchiddo. I menshe an i forja merenna i bokatar. Lenge hi ropaske un jon beshenn pen ap i phub. Un an Jerusalem denn le i wasta pral o shero khetne.

³Kol brawele bitchrenn pengre budepangren pal pani. Kolla djan pash i brunna, un hatsenn kek pani. Lengre khore anenn le kek panjeha pale. Lenge hi ropaske, un khatrenn pengro mui i ladjatar.

⁴I phub hi truk un dell gole pal brishin. Doleske hi kol hachenge ropaske, un khatrenn pengro mui.

⁵Ninna koi wesheskri grumni, kai las peskro ternepen, hatsell kek senlepen, mukell peskro ternepen tchiddo un djal peske.

⁶Kol diwje burike hi tardo ap nange berge, un lenn pharo ducho, har diwje djukle, kai trushenna. Jon hatsenn kek senlepen buder, un lengre jaka wenn korelo.

⁷Baro Dewel, mari doosh hi glan mare jaka tardo. Bud kope djam tutar krik, un shunam gar ap tute. Ab pale ap mari rig, te dikell hakeno, har kamlo hal!

⁸Ap tute dikenn i Israelitarja, te wess ap lengri rig, un leh len win dran kai bibacht. Hoske kreh tu, har te wals i wi-themari an maro them, un har jek, kai atchell jek rati un djal palle dureder?

⁹Hoske kreh tu, har te djinals gar, hoi te kress, har te wals i kurepaskro kek sorjah? Tchatchepah, baro Dewel, tu hal pash mende. Mer ham tire menshe. Ma muk men!

¹⁰Jaake penas o baro Dewel kal menshendar: Jon nashenn jek rigjatar ap i wawar, jaake har kamenn le. Doleske dikell o baro Dewel gar latches ap lende. Leske well an o shero, hawo tchilatcho koowa jon kran. Un lengri doshake dell job len i phagi.

¹¹Un o baro Dewel penas ap mande: Tu mangess gar kal menshenge, te wap latches ap lende.

¹²Jon nai rikrenn pen pale o chapastar, un rowenn ap mande jaake bud har kamenn le, me shunau len gar. Ninna te chatchrenn jon mange viechen un chapen, dikau gar latches ap lende. Me marau len an o kurepen, ninna i bok un o nasslepen marenn le.

¹³Koi penom me: Baro Dewel, miro rai, tire rakepangre penan lenge: ‘Kek kurepen un kek bok well pash tumende. O baro Dewel krell, te well kek kurepen pash tumende an kek tsiro.’

¹⁴O baro Dewel penas ap mande: Kol rakepangre rakran chochepen an miro lab. Me bitchrom len gar. Un me penom lenge tchi, hoi te krenn le, un rakrom lentsa witar gar. Jon rakrenn pral kowa, hoi dikan le, — kowa was gar mandar. Un kowa, hoi le glan-wi penan, hi chochepen un durkepen, un hi tchi moldo un well dran lengre djia.

¹⁵Kowa hi, hoi me, o baro Dewel, krau ap kol rakepangre, kai penenn, te rakrenn le an miro lab, ninna te bitchrom len gar. Jon penenn ninna, te well kek kurepen un kek bok an kau them. Sawe rakepangre hunte merenn an o kurepen un i bokatar.

¹⁶Jaake djal ninna kol menshenge, kai shunenn ap lende. Jon hi mulo tchiddo ap i dromma an Jerusalem. I bok un o charo maras len. Un kek paskrell len, lengre romjen un lengre tchawen. Me anau tchilatchepen pral lende, jaake har jon tchilatchepen kran.

¹⁷Un tu peness lenge kal laba: Me rowau ap o diwes un ap i rati, un nai mukau gar tele. Mire menshe, kolen kamau har miri tchai, hi khetne dino, un lengro dukepen well gar buder sasto.

¹⁸Djau me win ap o them, dikau me menshen, kai peran an o kurepen. Wau me an o foro, hi koi menshe tchiddo, kai meran i bokatar. Ninna Debleskre rakepangre un rashaja nashenn trujel an o them, un djinenn gar, hoi te krenn.

¹⁹Dal tu kol menshen an Juda pre? Kameh tu o forestar Zion tchi buder djinell? Hoske dal tu men jaake, kai nai krell men kek buder sasto? Mer patsam, kai well lauter mishto. Tchi was mishto! Mer kamam, te well i tsiro, kai kowa, hoi an mende nasselo hi, sasto wals. Kowa was gar. I daar was.

²⁰Baro Dewel, mer dikah dren, kai djiwam gar tuha, un mare phure tchilatchepen kran. Mer lam doosh ap mende glan tute.

²¹Bitche men gar tutar krik, te well gar djungeles rakedo pral tute! Muk kek te sal pral Jerusalem, kai tiri raili beshepaskri tardo hi! Ma biste, hoi tu mentsa win kral, un le tire laba gar pale!

²²Kek dewel, koles i menshe an wawar themma an-mangenna, nai bitchrell brishin! Witar gar dell o bolepen dran peste brishin! Na-a, maro baro Dewel, tu hal kowa, kai krell sawo koowa. Doleske dikah ap tute.