Read O Debleskro Drom - I Bibla an o Romano Rakepen 2021 Jeremia 16 Bible Online

Jeremia 16 - O Debleskro Drom - I Bibla an o Romano Rakepen 2021 bible

Jeremia 16

¹O baro Dewel penas ap mande:

²Tu hunte less tuke kek romni un less kek tchawen an kau them.

³Me, o baro Dewel penau tuke, hoi djal kol tchawenge, kai wan kate boldo, un lengre dajenge un lengre dadenge an kau them.

⁴Lendar hunte merenn ap pharo nasslepen, un kek rowell pral lende un paskrell len. Jon atchenn tchiddo ap i hachetikri phub har viechengro ful. Wawar merenn an o kurepen. Un ninna wawar merenn i bokatar. Un i tchirkle un i diwje vieche chan len pre.

⁵O baro Dewel penas ap mande: Tu djas an kek kheer, kai rowenn le pral jekeste, kai meras. Tu rowess gar lentsa, witar gar peness lenge latche laba; me hom buder gar i maal kal menshendar, hom lenge buder gar latcho, un krau miro dji lenge pandlo. Kowa penell o baro Dewel.

⁶Kol bare un kol tikne hunte merenn an kau them, un wenn gar paskedo. Un kek rowell pral lende. Un kek tchinell pes ratles lenge oder tchinell peskre tsele balla lenge tele.

⁷Koi hi kek buder, kai dell chapen kolen, kai pral atchan un rowenn. Ninna te meras lengro dad un lengri dai, hi kek koi, kai dell len tchomone te pijell, te wenn le pale soreles.

⁸Tu djas witar gar an i kheer, kai krenn le i bijab, te wess pash lende beshdo, te chas un pijess!

⁹O baro Dewel, ko rai pral o bolepen un i phub, kai ninna o Israeleskro Dewel hi, penell: Me mukau o tsiro te well, kai khelell un giwell kek buder i bachtjatar an o them Juda. I bachteli gole o pirnestar un leskri pirnjatar shunenn buder gar. Kowa well glan tumare jaka un jaake rah har djiwenna.

¹⁰Te penal tu kowa lauter kol menshenge, putchenn jon tutar: Hoske dell men o baro Dewel trad, kai well sawo midjak koowa pral mende? Hawi doosh anam ap mende? Hawo tchilatchepen kram mer ap o baro Debleste, kai maro Dewel hi?

¹¹Palle hunte peness tu lenge: Tumare phure djan mandar krik, un nashan wawar deblenge palla. Jon witsran pen tele glan lende un mangan len an. Man mukan le un rikran pen gar ap kol laba, hoi lenge penom.

¹²Tumer kran budeder tchilatchepen har tumare phure. Hakeno tumendar djiwell pal peskro shero un peskro tchilatcho dji. Ap mande shunell kek.

¹³Doleske tradau me tumen dran kau them win an i them, kai prindjrenn tumer gar un kai prindjran tumare phure witar gar. Kote hunte wenn wawar deblenge koi ap o diwes un ap i rati; me krau miro dji tumenge pandlo.

¹⁴Dikenn, well ko tsiro, penell o baro Dewel, kai well gar buder sowel dino kal labentsa: … pash o djido Debleste, kai las kol Israelitarjen win dran o them Egiptia.

¹⁵Na-a, jon penenna: … pash o djido Debleste, kai las kol Israelitarjen win dran ko them, hoi kote tchiddo hi, kai norden hi, ninna dran kol tsele wawar themma, kai job len tradas. Tchatchepah, me kamau len pale anell an ko them, kai dom lengre phurende.

¹⁶Me kamau bud matchepangren win bitchrell. Kolla hunte matchrenn len. Pal kowa bitchrau bud jegarjen win, te taprenn jon len, kai jon ninna hi: ap haki bari un tikni berga, un mank kol bare barra, kai khatran le pen.

¹⁷Mire jaka dikenn halauter, hoi jon krenna. Jon nai khatrenn pen gar glan mande. Lengri doosh hi glan mire jaka tardo.

¹⁸Jon lenn mandar pengri tseli phagi lengri doshake un ko tchilatchepaske, hoi jon kran. Me mukau lenge tchi. Jon kran miro them pengre mule deblentsa pale-tchiddo. Ko them, hoi mange win rodom, hi pherdo ko koweha, hoi djungelo glan mire jaka hi.

¹⁹Baro Dewel, tu deh man soor un deh garda ap mande. Pash tute nai wau me un khatrau man an i bibacht. Dran i tsele themma ap i phub wenn i menshe pash tute, un penenn: Kol debla mare phurendar hi lauter chochepen, tchi-moldo hi le, un nai wenn gar ap mari rig.

²⁰Kek mensho nai krell peske deblen. Hoi lo krell, hi kek dewel.

²¹Doleske dikenn: Kau kopo sikrau me lenge miri bari soor, te haiwenn le, kai me o baro Dewel hom.