Read O Debleskro Drom - I Bibla an o Romano Rakepen 2021 Jeremia 17 Bible Online

Jeremia 17 - O Debleskro Drom - I Bibla an o Romano Rakepen 2021 bible

Jeremia 17

¹Tumer menshe an o them Juda, tumaro tchilatchepen hi dren tchinlo an tumare djia, un ap kol shinga ap kol chatchepangre, kai tumer viechen chatchrenn. Ko tchilatchepen hi jaake dren tchinlo, te nai krenn kowa gar buder krik, har te was kowa an o bar dren dino i sasteha, hoi les i diamantikro shero hi.

²Ninna lengre tchawe witsrenn pen tele glan kol chatchepangren un glan kol figuren, hoi sikrenn i debletsa Ashera, un hoi le pre tchiwan tel kol senele ruka, un ap i tikne un bare berge un ap o them. Me dau tumaro tselo brawlepen un kutch koowa wawarende, te tchorenn le kowa tumendar. Koja hi koi phagi ko tchilatchepaske, hoi tumer an kau tselo them kran.

⁴Un tumer hunte djan dran kau them, hoi dom tumen hako tsireske. Un me krau, te wenn tumer budepangre kolenge, kai rikrenn tumen tele an i them, kai prindjrenn gar. Miri choli hi har i jag, hoi gar buder win djala.

⁵O baro Dewel penell: Praassedo well ko mursh, kai mukell man, o baro Debles, un rikrell pes ap i menshende, un putchell lendar, te wenn le ap leskri rig.

⁶Job hi har i subjengri bur an o diwjo truk them, un dikell kek latchepen an ko tsiro wella. Job atchell an o mulo tato them, kai kek pani hi, un tchi wawar bares well, un kek mensho djiwell.

⁷O Debleskri bacht hi tchiddo ap kol mursheste, kai rikrell pes ap o baro Debleste.

⁸Kowa hi har i ruk, kai pash o pani tardo hi, un tchiwell peskre draba an o pani. Ninna te well o baro tatepen, hi les kek traash. Leskre patria atchenn senelo. Te well i bersh, kai dell kek brishin, hunte well les kek daar. Job mukell gar tele, te hidjrell lo rukengre.

⁹Koon nai prindjrell o mensheskro dji? Tchi hi jaake tchilatcho un chocheno har o mensheskro dji.

¹⁰Me, o baro Dewel prindjrau o mensheskro dji, un dikau dur dren an kowa, hoi an leste hi, un dau hakeneste pal kowa, hoi job kras.

¹¹Har i diwji kachni, kai beshell pes ap i jare, kai gar lakre hi, jaake djal koleske, kai lell peske brawlepen khetne chochepah. An o feteder tsiro nashrell lo peskro brawlepen, un hi koi tardo har i narwelo.

¹²Maro Debleskro kheer hi har i rajeskri beshepaskri, pherdo o Debleskro railepen, un tardo ap i bari berga, jaake rah har lo koi hi.

¹³Tu, baro Dewel, hal kowa, ap koleste i Israelitarja dikenn. Pral halauterende, kai mukan tut, well ladj. Un kolla, kai djan tutar krik, kolengre laba wenn bistedo har te wans le tchinlo an i tchik. Jon mukan tut, o baro Debles, kowa, kai hi har i quella, dran kolate djido pani well.

¹⁴Kre man sasto, baro Dewel, Te kreh man sasto, palle hom sasto. Le man win dran i bibacht! Palle nai krell man kek tchi. Tu hal kowa, kones sharau.

¹⁵Jon penenn ap mande: Kai atchell kowa, kolestar o baro Dewel rakras? Mu well kowa pral mende!

¹⁶Tu djineh, me homs lenge har i bakrengro, un krom hoi mange penal. Me kamom gar, te well bibacht pral lende. Lauter, hoi lenge penom, djineh tu.

¹⁷Kameh tu man traashnes te krell? Pash tute wau me un khatrau man ap o tchilatcho diwes.

¹⁸Muk ladj pral kolende te well, kai man palla lenn, un gar pral mande! Jon hunte trashenn pen, un gar me! Muk ko diwes te well, kai well koi bibacht ap lende! Un phage len an kotja!

¹⁹O baro Dewel penas ap mande: Dja pash ko baro wudar o forestar, kai djan i bare raja pral Juda dren un win, un ninna pash kol tsele wawar wudja o forestar Jerusalem,

²⁰un pen i menshenge: Shunenn, hoi o baro Dewel penella, tumer bare raja an Juda, un tumer lauter an Juda un Jerusalem, kai djan an kal wudja dren un win!

²¹O baro Dewel penell: Denn tumen jak, te hidjrenn tchi ap o Debleskro diwes dren an kol wudja o forestar Jerusalem.

²²Un hidjrenn tchi ap o Debleskro diwes dran tumare khera. Un budrenn gar! Ko diwes hi o Debleske. Rikrenn les jaake dren, har me kowa tumare phurenge penom.

²³Jon shunan gar ap mande, un dan gar jak ap mire laba, djan pal pengro shero, un rikrenn pen gar ap kowa, hoi lenge penom.

²⁴Te shunenn tumer kanna ap mande, penell o baro Dewel, un hidjrenn ap o Debleskro diwes tchi dren an wudja kau forestar, un rikrenn ko diwes dren un budrenn gar ap ko diwes,

²⁵palle nai djan ninna bare raja dran o Davideskri familja dren an kau foreskre wudja, kai beshenn ap graja un wurdja, jon un wawar pralstune, un lauter, kai an Juda un Jerusalem djiwenna. Un an kau foro djiwenn hako tsiro menshe.

²⁶Un menshe wenna dran kol forja o themestar Juda, un dran i gaba trul Jerusalem, un dran o them Benjamin un dran kol tikne un bare berge un dran o them Negev. Un jon anenn an o baro Debleskro kheer viechen chatchepaske un chapaske, djob un kutch sungepaskro koowa, un wawar koowa, koleha parkrenn le pen pash o baro Debleste.

²⁷Te shunenn tumer gar ap mande, un djiwenn ap o Debleskro diwes har ap hako wawar diwes, un hidjrenn tumaro koowa ap o Debleskro diwes dren an kol wudja o forestar Jerusalem, palle tchiwau me jag an kol wudja, te chatchrenn i sorele khera pre an Jerusalem. Un kek nai krell koi jag win.